Edwein 136 - AHYERƐLƐ KRONGRON

Fa asennaa ma Nyameɛ

¹ Ao, ɛmɔla AWURADE ase, ofikyɛ ɔte paa, na ye ɔdɔ bɔ onni ngasi ne, ɔwɔ berɛ afebɔɔ.

² Ao, ɛmɔla nyameɛ mɔ nu Nyameɛ ne ase, ofikyɛ ye ɔdɔ bɔ onni ngasi ne, ɔwɔ berɛ afebɔɔ.

³ Ao, ɛmɔla meneɛ mɔ nu Meneɛ ne ase, ofikyɛ ye ɔdɔ bɔ onni ngasi ne, ɔwɔ berɛ afebɔɔ.

⁴ Ye bɔ ye ngome yeɛ ɔyɔ anwanwadeɛ mbiri mbiri ne, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

⁵ ye bɔ yeɛ ole nimdeɛ ɔbɔle anwuro ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

⁶ ye bɔ ɔtrɛtrɛle aseɛ nu tole nzue so ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

⁷ ye bɔ ɔbɔle kanea mbiri mbiri nemɔ ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ.

⁸ Ɔbɔle eyia kyɛ oli tumi wɔ alehyeleɛ nu, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

⁹ ɔbɔle ɛsraen ne nzramaa kyɛ beli tumi wɔ alesaleɛ nu, ofikyɛ ye ɔdɔ bɔ onni ngasi ne, ɔwɔ berɛ afebɔɔ.

¹⁰ Ye bɔ ohuhuni Misraimfoɛ bɛ bamuɛbaa mɔ ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹¹ ye bɔ ɔyele Yisrael fili bɛ nu ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹² ye bɔ ole tumi piri ne tumi asaa yeɛ ɔyele bɛ ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹³ ye bɔ ɔpakyele Ɛpo Kɔkorɛ nu nyɔ ne, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹⁴ na ɔfale Yisrael pɛle nu hɔle, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹⁵ nakoso Faro ne ye lɔen de, ɔhane bɛ guale Ɛpo Kɔkorɛ ne anu, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹⁶ ye bɔ olili ye maen nyunu fale ɛserɛ ne aso ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹⁷ ye bɔ ohuhuni ahemvo titire mɔ ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹⁸ na ohuhuni ahemvo mɔ bɔ bale dumaa ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

¹⁹ Amorifoɛ hene Sihon, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

²⁰ yeɛ Basan hene Ogo, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

²¹ na ɔfale b’aseɛ ne kakyili agyapadeɛ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

²² ɔfa kakyili agyapadeɛ mane ye somvoɛ Yisrael, ofikyɛ ye ɔdɔ bɔ onni ngasi ne, ɔwɔ berɛ afebɔɔ.

²³ Ye yeɛ ɔkayele yɛ wɔ mmerɛ bɔ né yɛyɛ anwumvo ne ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

²⁴ na ɔpepɛ lele yɛ fili yɛ pɔfoɛ mɔ sa nu, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

²⁵ ye bɔ ɔma abɔdeɛ biala aleɛ ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ.

²⁶ Ao, ɛ́mɔfa asennaa bɛ́ma nyameɛso Nyameɛ ne, ofikyɛ ye ɔdɔ bɔ onni ngasi ne, ɔwɔ berɛ afebɔɔ.