Edwein 135 - AHYERƐLƐ KRONGRON

Nyameɛ tumi te piri

¹ Ɛ́mɔye AWURADE ayɛ! Ɛ́mɔye AWURADE dumaa ne ayɛ! O AWURADE somvoɛ mɔ, ɛ́mɔye ye ayɛ,

² ɛmɔ bɔ ɛmɔsɔne wɔ AWURADE awuro berɛ, wɔ yɛ Nyameɛ awuro n’aluo berɛ ɔ!

³ Ɛ́mɔye AWURADE ayɛ, ofikyɛ AWURADE te paa; ɛ́mɔto ye dumaa nwo dwein, ofikyɛ ɔyɛ fɛ.

⁴ Ofikyɛ AWURADE aneanea nu waye Yakob wama ye nwo, wafa Yisrael wayɛ ye bɔbɔ ye agyapadeɛ.

⁵ Na me de, mese kyɛ AWURADE te piri; yɛ Mene ne tra nyameɛ mɔ amukoraa.

⁶ Bɔ AWURADE kuro biala yeɛ ɔyɔ ɔ, wɔ nyameɛso ne aseɛ so, wɔ ɛpo nu ne buma mɔ amukoraa nu.

⁷ Ye yeɛ ɔma munungum fi aseɛ noa dɔ kɔ anwuro ɔ; esue tɔ a, ɔma agralaa tete, na ɔma mvrama tu fi nekaa bɔ osie ye nningyein ne.

⁸ Ye yeɛ ohuhuni Misraimfoɛ bamuɛbaa mɔ ɔ: mmenia ne ngaka bɛ bamuɛbaa mɔ.

⁹ Ao Misraim, ɔsomane nzɛngyerɛnneɛ ne anwanwadeɛ maa ɔwale wɔ nu, ɔfa tiale Faro ne ye somvoɛ mɔ amukoraa.

¹⁰ Ɔsɛkyele maen maen mɔ pee, na ohuhuni ahemvo tumifoɛ mɔ:

¹¹ Amorifoɛ hene Sihon, ne Basan hene Ogo, ne Kanaan ahennie amukoraa,

¹² na ɔfale b’aseɛ ne kakyili agyapadeɛ, ɔfa kakyili agyapadeɛ mane ye maen Yisrael.

¹³ Ao AWURADE, wɔ dumaa timu berɛ daa, Ao AWURADE, wɔ nwo ngayeɛ wɔ aworɛ ndoatoasoɛ amukoraa nu.

¹⁴ Ofikyɛ AWURADE kobua ye maen be, na okonwu ye somvoɛ mɔ anwumvoin.

¹⁵ Amaen maen mɔ bɛ mmosoen nemɔ, bɛte ɛdwetɛ ne esikaa kɔkorɛ, bɛte mmenia sa noa adwuma.

¹⁶ Bele noa, nakoso bendwudwo, bele anyeɛ, nakoso bennwu nikye,

¹⁷ bele asoɛ, nakoso bɛnde dwirɛ, na nwomeɛ biala nne bɛ nu.

¹⁸ Bɛ bɔ bɛyɔ mmosoen nemɔ ne, bɛte kyɛ mmosoen nemɔ ala; na ebiala bɔ ɔfa ye wora wura mmosoen nemɔ anu ne, ɔte kyɛ mmosoen nemɔ ala.

¹⁹ Ao Yisrael awuro ama, ɛ́mɔye AWURADE ayɛ! Ao Aarɔn awuro ama, ɛ́mɔye AWURADE ayɛ!

²⁰ Ao Lewi awuro ama, ɛ́mɔye AWURADE ayɛ! Ɛmɔ bɔ ɛmɔsuro AWURADE ne, ɛ́mɔye AWURADE ayɛ!

²¹ AWURADE bɔ ɔte Yerusalem ne, animnyam hã ye wɔ Sion, Ɛ́mɔye AWURADE ayɛ!