Edwein 132 - AHYERƐLƐ KRONGRON

¹ Ao AWURADE, kaye Dawide ɔne ye amaneɛnwunɛ amukoraa,

² kyɛbɔ ɔtale ndaen hyirele AWURADE, ná ɔhyɛle Yakob ye Tuminiɛ ne bɔ kyɛ,

³ “Amba, mengowura m’awuro ɛtena sua ne anu, yeɛ mengɔla me bɛen so.

⁴ Mengɔla, yeɛ mengɔhã me nye mengogua so,

⁵ kɔpem kyɛ ngɔpena nekaa ngɔma AWURADE, Yakob ye Tuminiɛ ne, ye atenaleɛ koraka ɔ.”

⁶ Amba, yɛtele ye wɔ Efrata; yɛnwuni ye wɔ ɛhɔayeɛ aseɛ ne aso.

⁷ “Ɛ́mɔma yɛhɔ ye atenaleɛ berɛ; ɛ́mɔma yɛsɔne wɔ ye gya bo ndiasoɛ ne anyunu.”

⁸ Ao AWURADE, dwɔso ná kɔ wɔ nekaa bɔ ede wɔ nwome ne, ɛne wɔ tumi alaka ne.

⁹ Ma w’asɔfo mɔ bɛfa tenenee bɛhera, ná ma w’anwoteefoɛ mɔ bɛfa ahurusi bɛbɔ ese.

¹⁰ Ɔnate wɔ somvoɛ Dawide ti, nnɛye wɔ sa fi wɔ sona bɔ apopa ye ngoo ne abo.

¹¹ AWURADE tale ndaen kitii hyirele Dawide, bɔ ongoli ye nwo ngasi ɔ, kyɛ, “Wɔ bɔbɔ wɔ kunu mmaa nemɔ anu ko yeɛ ngɔmaa okoli wɔ bia ɔ.

¹² Sɛ wɔ mma mɔ bedi m’apam ne me noa dwirɛ bɔ ngohyirehyire bɛ ne aso a, bɛ mma mɔ koso bekoli wɔ bia afebɔɔ.

¹³ Ofikyɛ AWURADE aneanea nu waye Sion; wahuro kyɛ ɔkɔfa berɛ kɔyɛ ye atenaleɛ:

¹⁴ “Ɛwa yeɛ ɔte me nekaa bɔ mede me nwomeɛ ɔ afebɔɔ; ɛwa yeɛ ngɔtena ɔ, ofikyɛ mekuro ɛwa.

¹⁵ Ngoyira Sion ye nningyein so paa, na ngɔma ye ehiafoɛ mɔ aleɛ ma bɛ ko koyi.

¹⁶ Ye asɔfo mɔ, ngɔfa ngoalelɛ ngɔhera bɛ, na ye teneneefoɛ bɛkɔfa ahurusi bɛkɔbɔ ese.

¹⁷ Berɛ yeɛ ngɔmaa mmɛen bie kofifi kɔma Dawide ɔ; masiesie kanea mama me sona bɔ mapopa ye ngoo ne.

¹⁸ Ngɔfa animguaseɛ ngɔhera ye pɔfoɛ mɔ, nakoso ye de, ye ahennie abotire bɔ ɔbɔ ye ne, ɔkɔta hyireinn.”