Edwein 130 - AHYERƐLƐ KRONGRON

Me nye la Nyameɛ so

¹ Ao AWURADE, mvi kumaa kuronguronn nu yeɛ mesu mefrɛ wɔ ɔ.

² AWURADE, tie me mbaeɛ! Yɛ asoɛ ná tie me, tie me sufrɛ.

³ AWURADE, sɛ ɛsesẽ amumuyɛɛ a, ao Yɛ Mene, ahaa nwa yeɛ ɔkɔhora kogyina ɔ?

⁴ Nakoso wɔ de bɔnefakyɛ wɔ wɔ nu, amaa ɔnate so yasuro wɔ.

⁵ Me nye la AWURADE so, me kra nye la ye so, na ye dwirɛ nu yeɛ me wora wura ɔ.

⁶ Me kra nye la AWURADE so tra awɛmvoɛ mɔ bɔ bɛnea alehyeleɛ ate ɔ, yoo, ɔtra awɛmvoɛ mɔ bɔ bɛnea alehyeleɛ ate ɔ.

⁷ Ao Yisrael, fa wɔ wora wura AWURADE nu! Ofikyɛ AWURADE yeɛ ole ɔdɔ bɔ onni ngasi ɔ, na ye yeɛ ɔpepɛ de sona mmorosoɛ ɔ.

⁸ Ye yeɛ ɔkɔpepɛ kole Yisrael kofi ye amumuyɛɛ amukoraa nu ɔ.