Edwein 114 - AHYERƐLƐ KRONGRON

Abɔtra aluolue dwein

¹ Mmerɛ bɔ Yisrael fili Misraim ne, bɔ Yakob boso ama fili maen bɔ bɛkã dwudwolɛ foforɛ so ne,

² Yuda yɛle Nyameɛ nekaa krongron, Yisrael yɛle ye maen bɔ odi so ɔ.

³ Ɛpo nwuni ye, na ɔnwatili; asue Yɔɔdan sale ye si.

⁴ Mmokaa nemɔ huruhuruli kyɛ mmoaen nyii, pambaa nemɔ huruhuruli kyɛ mmoaen mmaa.

⁵ Ao ɛpo, nzikyɛ yeɛ wayɔ wɔ maa anwati ye? Ao asue Yɔɔdan, nzikyɛ yeɛ wamaa asa wɔ si ye?

⁶ Ao mmokaa mɔ, nzikyɛ yeɛ ɔmaa ɛmɔhuruhuruli kyɛ mmoaen nyii ye? Ao pambaa mɔ, nzikyɛ yeɛ ɔma ɛmɔhuruhuruli kyɛ mmoaen mmaa ye?

⁷ Ao aseɛ, ma wɔ nwo wosowoso wɔ wɔ AWURADE nyunu, ma wɔ nwo wosowoso wɔ wɔ Yakob Nyameɛ nyunu,

⁸ ye bɔ ɔmane nyɔbotaen ne kakyili ɛkwaa, ná ɔmane twerɛboɛ ne kakyili mbombonzue ne.