Edwein 113 - AHYERƐLƐ KRONGRON

Nyameɛ do sona bɔ ɔyɛ anwumvo ɔ

¹ Ɛ́mɔye AWURADE ayɛ! Ao AWURADE somvoɛ mɔ, ɛ́mɔye ye ayɛ. Ɛ́mɔye AWURADE dumaa ne ayɛ.

² Animnyam hã AWURADE dumaa, ofi ɛnɛ kodwu afebɔɔ.

³ Ofi eyia ye fitelɛ kodwu ye tɔlɛ, odi kyɛ bɛye AWURADE dumaa ayɛ.

⁴ AWURADE wɔ anwuro anwuro tra maen maen amukoraa, na ye animnyam kɔ anwuro tra ewienu.

⁵ Nwa yeɛ ɔte kyɛ AWURADE yɛ Nyameɛ bɔ ye atenaleɛ wɔ anwuro anwuro,

⁶ bɔ ɔbere ye nye ase nea ewienu ne aseɛ so ɔ?

⁷ Ɔma ehianiɛ so fi asefuo nu, na ɔma sona bɔ ɔyɛ anwumvo ɔ so fi fofoɛ so,

⁸ kyɛ ɔmaa ɔtena atitirefoɛ nu, ɔtena ye maen atitirefoɛ nu.

⁹ Ɔmaa mmotaen brasua ɔbɔ taen, maa ɔyɛ brataen bɔ ye nye agye ɔ. Ɛ́mɔye AWURADE ayɛ!