Edwein 109 - AHYERƐLƐ KRONGRON

Nyameɛ yeɛ ɔtɔ wereɛ ɔ

Dawide dwein. Ɔfa mane edweinhyirelɛniɛ ne

¹ Ao me Nyameɛ bɔ meye wɔ ayɛ ɔ, nnɛmua wɔ noa,

² ofikyɛ bɔnefoɛ ne nnakannakafoɛ batu bɛ noa basie me so, na bɛpepɛ anoanu dwirɛ begua me so.

³ Bafa ɛpɔen dwirɛ babɔ me nwo mborɔkaa bayia, na bɛfa ngondii bɛtoa me mbaen.

⁴ Bɛ nwo ɔdɔ bɔ manya ye ne, bɛto me soen bɛfa besi ye gya nu, wɔ aberɛ bɔ mebɔ mbaeɛ (mema bɛ) po ɔ.

⁵ Yiti bɛfa bɔne betua me paa so kerɛ, yeɛ bɛfa ɛpɔen betua me ɔdɔ so kerɛ.

⁶ Ye bɔnefoɛ maa ɔho tia ye; ma Abɔnzam ogyina ye sa famaa so.

⁷ Ndɛenbualɛ nu, maa oli fɔ; ma ye mbaeɛ ɔkakyi ye so bɔne.

⁸ Ma ye ngoa ɔyɛ tika, ma sona foforɛ ole ye dibea ne.

⁹ Ma ye mma mɔ bɛyɛ nyisiaa, ná ɔye koso ɔyɛ kunaniɛ.

¹⁰ Ma ye mma mɔ bɛbɔ asesa ná bɛsrɛsrɛ; maa betu bɛ befi b’awuro buburuwaa bɔ bɛte nu ne anu.

¹¹ Ma sona bɔ wabisa ye berɛ bosea ne, ole ye nwo nningyein amukoraa, ná ɛwɔfoɛ mɔ bɛɛfẽ bɔ wafɛ wanya ye ɔ bɛfa.

¹² Nnɛma ebiala yɛ ye paa, yeɛ nnɛma ebiala nwu ye mma ayisiaafoɛ nemɔ anwumvoin.

¹³ Ma ye boso ama bɛ boso onua, nnɛmaa bɛkaye bɛ dumaa wɔ aworɛ ndoatoasoɛ bɔ ɔtoa so ne anu.

¹⁴ Mesrɛ kyɛ AWURADE ɔkaye ye nana mɔ b’amumuyɛɛ wɔ ye nyunu, yeɛ nnɛmaa okyikyi oni bɔne fi berɛ.

¹⁵ Bɛ bɔne ne, ɔ́tena AWURADE nyunu daa, na bɛ boso ngayeɛ okyikyi fi aseɛ ye aso.

¹⁶ Ofikyɛ wangaye kyɛ okonwu anwumvoin ɔ, na mmom ɔtanene ehiafoɛ ne bɛ bɔ bɛyɛ anwumvo ɔne bɛ bɔ baboto ɔ nye kyɛ ɔpena bɛ ne ewue.

¹⁷ Ohurole amoenwaa, yiti maa obu osa ye. Né ɔmbena saleɛ mma ye mmango, yiti maa saleɛ ɔbɔ ye.

¹⁸ Ɔfale amoenwaa yɛle kyɛ ataadeɛ wurale, yiti maa ɔmeme hɔ ye nwonaen nu kyɛ nzue, kyɛ ngoo oowura ye mmowue nu.

¹⁹ Maa ɔyɛ kyɛ ɛtena bɔ ɔkera ɔ, kyɛ abɔsoɛ bɔ ɔbɔ ye daa ɔ.

²⁰ Bɛ bɔ bɛto me soen ne bɛ bɔ bɛkã me nwo dwirɛ tɛɛ ne, maa ɛhe ɔyɛ b’akatuaa bɔ ofi AWURADE berɛ ɔ.

²¹ Nakoso, ao Nyameɛ m’AWURADE, wɔ dumaa ti, di me dwirɛ ma me; pepɛ de me, ofikyɛ wɔ ɔdɔ bɔ onni ngasi ne ɔte paa.

²² Ofikyɛ nde ehianiɛ, na meyɛ anwumvo, na me kra aboto wɔ me nu.

²³ Me boso kyikyi kyɛ nɔsoa wawoɛ, na mvrama bɔ me kɔ kyɛ abɛbɛ.

²⁴ Ɛhɔenhyelɛ ama m’aporɛ nu ayɛ hodwoo, na mafɔ kangenaen.

²⁵ Makakyi ngorohoɛ nikyee mama bɛ; sɛ benwu me a, bɛwoso bɛ ti.

²⁶ Ao AWURADE me Nyameɛ, boka me! Pepɛ de me kyɛbɔ wɔ ɔdɔ bɔ onni ngasi ne osi te ɔ.

²⁷ Maa benwu kyɛ wɔ tumi ɔ; kyɛ AWURADE, wɔ yeɛ ayɔ ɔ.

²⁸ Bɛ de bɛnoma, nakoso wɔ de eyira. Sɛ bɛba me so a, ma bɛ nyunu gua ase, nakoso wɔ somvoɛ de, ma ye nye gye.

²⁹ Ma me pɔfoɛ mɔ bɛfa nyanzoen bɛhera, ma bɛ bɔbɔ b’animguaseɛ owura bɛ kyɛ ataadeɛ.

³⁰ Ngɔfa me noa ngɔla AWURADE ase paa; ngɔye ye ayɛ wɔ ɛlɔen kandinga nu.

³¹ Ofikyɛ ogyi sona bɔ ɔyɛ anwumvo ɔ ye sa famaa so, kyɛ ode ye fi bɛ bɔ babua ye ewue foɛ ɔ bɛ sa nu.