Edwein 108 - AHYERƐLƐ KRONGRON

Ayɛyelɛ dwein

Dawide dwein

¹ Ao Nyameɛ, m’ahone gyi berɛ pindinn, m’ahone gyi berɛ pindinn! Ngɔto dwein ngɔye wɔ ayɛ. Me kra, tingye!

² Sangoo ne adengum, ɛ́mɔtingye! Me koso ngotingye alebahyene.

³ Ao AWURADE, ngɔfa asennaa ngɔma wɔ wɔ maen maen mɔ nu; ngɔto wɔ nwo ayɛyelɛ dwein wɔ maen nemɔ anu.

⁴ Ofikyɛ wɔ ɔdɔ bɔ onni ngasi ne, ye piri kɔ anwuro tra ewienu dɔ paa, yeɛ wɔ nahorɛlilɛ ne, okodwu munungum nemɔ anu dɔ.

⁵ Ao Nyameɛ, kyire kyɛbɔ esi te piri ɔ wɔ anwuro anwuro. Ma w’animnyam kata aseɛ so amukoraa.

⁶ Kyɛbɔ ɔkɔyɛ ná ɛkɔpepɛ kole bɛ bɔ ekuro bɛ dwirɛ ne ati, fa wɔ sa famaa ne de yɛ ngoa, ná tie me.

⁷ Nyameɛ ahã ye wɔ ye nekaa krongron berɛ kyɛ, “Ngɔfa ahurusililɛ nu ngɔhyehyɛ Sɛkem nu, ná mapakyepakye Sukote bɔnza ne anu.

⁸ Gileade te me deɛ, yeɛ Manase koso te me deɛ; Efraim te me buralɛ kyerɛ, Yuda te me hɔtɔ.

⁹ Moabo te me nyanzɛen, Edom so yeɛ mefindi me mbaboa megua ɔ; na Filistia so yeɛ mebɔ ngonimlilɛ ese ɔ.”

¹⁰ Kuro bɔ bato ye nwo fasue ne, nwa yeɛ ɔkɔfa me kɔhɔ so ɔ? Nwa yeɛ okoli me nyunu kɔfa me kɔhɔ Edom ɔ?

¹¹ Ao Nyameɛ, aso ɛppole yɛ anaa? Ao Nyameɛ, aso ɛyyakyili yɛ koɛhonɛfoɛ bɛ si gyinalɛ?

¹² Ao, boka yɛ de yɛ fi amaneɛ nu, ofikyɛ kuro sona mmokalɛ te mbaen!

¹³ Sɛ AWURADE boka yɛ so a, yɛkoli ngonim; ye yeɛ okotiatia yɛ pɔfoɛ mɔ so ɔ.