Edwein 106 - AHYERƐLƐ KRONGRON

Yisrael kã ye bɔne

¹ Ɛ́mɔye AWURADE ayɛ! Ao, ɛmɔla AWURADE ase, ofikyɛ ɔte paa; na ye ɔdɔ bɔ onni ngasi ne, ɔwɔ berɛ afebɔɔ.

² Nwa yeɛ ɔkɔhora kɔhã AWURADE nnwumaa mbiri mbiri ne ɔ, anaa ɔkɔhora kɔbɔ ye ayɛyelɛ amukoraa nwo dawure ɔ?

³ Bɛ bɔ bebua ndɛen turoloo ne, ɔne bɛ bɔ bɛyɔ bɔ ɔtengyɛ daa biala ne, benya saleɛ.

⁴ Ao AWURADE, sɛ ɛdo wɔ maen a, kaye me bie; sɛ ɛpepɛ de bɛ a, de me bie;

⁵ amaa ɔnate so manwu bɛ bɔ aneanea nu aye bɛ ne bɛ ngɔsoɛ, ná mali ahurusi wɔ wɔ maen anigye ne anu, ná me ne w’agyapadeɛ yahoahoa yɛ nwo.

⁶ Yɛne yɛ nana mɔ yayɔ bɔne; yayɔ amumuyɛɛ, na yayɔ bɔne piri.

⁷ Yɛ nana mɔ, mmerɛ bɔ né bɛwɔ Misraim ne, bande w’anwanwadeɛ nemɔ abo, yeɛ bangaye wɔ ɔdɔ kandinga bɔ onni ngasi ne, na mmom bɛyɛle Anwuro Anwuro Nyameɛ ne aso lɔen wɔ Ɛpo Kɔkorɛ ne anwo.

⁸ Nakoso ɔnate ye dumaa ti, ɔpepɛ lele bɛ, amaa ɔnate so wala ye tumi kandinga ne ali.

⁹ Ɔhane Ɛpo Kɔkorɛ ne anyunu maa ɔwewele koraa; olili bɛ nyunu maa bɛfale buma ne anu kyɛ ɛserɛ so ahɔ ɔ.

¹⁰ Yiti ɔpepɛ lele bɛ fili mmenia bɔ bekyi bɛ ɔ nemɔ sa nu, na olele bɛ fili pɔfoɛ nemɔ sa nu.

¹¹ Nzue ne mene bɛ pɔfoɛ nemɔ bɔ bɛ nu ko po wanga ɔ.

¹² Afei Yisraelfoɛ lele ye dwirɛ ne belili, na bɛtole ye nwo ayɛyelɛ dwein.

¹³ Nakoso wangyɛ yeɛ bɛ wora fili ye nnwumaa ɔ, na banwondɛ bandie ye ahyɛdeɛ.

¹⁴ Na mmom benyane akɔnnɔ tɛɛ wɔ ɛserɛ ne aso, na besole Nyameɛ bɛneane wɔ aseɛ pralaa ne aso.

¹⁵ Ɔfale bɔ bɛpena ɔ mane bɛ, nakoso ɔtele anwonyerɛ tɛɛ guale bɛ so.

¹⁶ Bɛ nye borole Mose wɔ asikyeleɛ ne anu, ɔne AWURADE krongronniɛ Aarɔn koso.

¹⁷ Aseɛ nu pakyele, na ɔmene Datan, na ɔkatale Abiram kure ne aso siele bɛ.

¹⁸ See koso sɔle wɔ bɛ kure ne anu, na buruburugya ne yerale bɔnefoɛ nemɔ.

¹⁹ Bɛyɔle nandwie ba wɔ Horebo, na bɛsɔnene amoen bɔ bahuro nikyee bayɔ ɔ.

²⁰ B’animnyam ne, bɛfale nandwie bɔ odi ndire ɔ ye sɛso besili ye gya nu.

²¹ Bɛ wora fili Nyameɛ bɔ ɔte bɛ Defoɛ ne, bɔ ɔyɔle nningyein mbiri mbiri wɔ Misraim ne,

²² bɔ ɔyɔle anwanwadeɛ wɔ Ham aseɛ so ne, ɔne nningyein suronyisuronyi wɔ Ɛpo Kɔkorɛ nwo ne.

²³ Yiti ɔhane kyɛ okohũhũ bɛ. Nakoso Mose bɔ waneanea nu waye ye ne, ɔpale kyerɛ mane bɛ wɔ Nyameɛ nyunu, kyɛ ɔma ye ahone ɔtɔ nzue nu, ná nnɛmaa okũkũ bɛ.

²⁴ Afei aseɛ kamakama ne, bɛtole ye nwo, na bannya gyidie wɔ ye bɔhyɛ ne anu.

²⁵ Bɛyɛle nwuhunwuhu wɔ b’ɛtena sua nemɔ anu, na bandie AWURADE dwirɛ.

²⁶ Yiti ɔmane ye sa so tale ndaen guale bɛ so kyɛ, ɔkɔmaa bɛkɔtotɔ wɔ ɛserɛ ne aso,

²⁷ na ɔkɔbɔ bɛ boso ama kɔsande kɔhɔ maen maen mɔ so, ɔkɔto bɛ kɔpete aseɛ nemɔ aso.

²⁸ Afei bɛfale bɛ nwo bɛɛbɔle bosoen Baal Peɔ, na belili afɔleɛ mɔ bɔ babɔ bama awufoɛ ɔ.

²⁹ Bɛfale bɛ yɔleɛ bewurale AWURADE apue, na amaneɛ pirikua tole bɛ.

³⁰ Yeɛ Finehase dwɔso gyinane lili bɛ ti dwirɛ mane bɛ, na ewue anwonyerɛ ne abo pɛle.

³¹ Ɔnate ɛhe ati bebuli ye kyɛ ɔtengyɛ wɔ aworɛ ndoatoasoɛ amukoraa nu afebɔɔ.

³² Behuli AWURADE ahone wɔ Meriba nzue ne anwo, na ɔnate bɛ ti Mose nyane edwirɛ.

³³ Ofikyɛ bɛmane Mose ahone huli, na ole ɛyaa dwudwole.

³⁴ Yisraelfoɛ banguku maen maen nemɔ so mmenia bɔ AWURADE fale bɛ nwo ahyɛdeɛ mane bɛ ne,

³⁵ na mmom bɛ ne bosoensolɛfoɛ nemɔ bɛtenane bɛbɔle nu, na besuane bɛ yɔleɛ nemɔ bɛyɔle bie.

³⁶ Bɛsɔnene bɛ mmosoen nemɔ, na ɛhe yɛle bɛ so ngaen.

³⁷ Bɛfale bɛ mma mmienzua ne mmrasua bɛbɔle afɔleɛ bɛmane sunzummɔne mɔ.

³⁸ Bɛhane mogya bɔ onni fɔ ɔ beguale, bɔ ɔte bɛ mma mmienzua ne mmrasua bɛ mogya, bɔ bɛfa bɛbɔle afɔleɛ bɛmane Kanaan mmosoen mɔ ɔ; na mogya ne mane efiɛ hane aseɛ ne.

³⁹ Yiti bɛ yɔleɛ mane bɛ nwo guale fiɛ, na bɛ yɔleɛ ne kakyili adwamanbɔlɛ.

⁴⁰ Yeɛ AWURADE fɛle ye maen ne aso yaa paa, na ohyili ye agyapadeɛ ne.

⁴¹ Ɔfale bɛ wurale maen maen mɔ sa maa ɔnate so bɛ pɔfoɛ mɔ lili bɛ so.

⁴² Bɛ pɔfoɛ mɔ hyɛle bɛ so, na belili bɛ so tumi maa bewurale bɛ bo.

⁴³ AWURADE pepɛ lele bɛ mmerɛ pee, nakoso bɛhyɛle da bɛhɔle so bɛyɛle ye so asoserɛ, na ɔnate b’amumuyɛɛ ti, bɛbrɛle bɛ ase.

⁴⁴ Nakoso onwuni amaneɛ bɔ né benwu ye ne, na otiele bɛ sufrɛ.

⁴⁵ Ɔnate bɛ ti, AWURADE kayele ye apam ne, na onwuni bɛ anwumvoin, kyɛbɔ ye ɔdɔ bɔ onni ngasi ne, ye piri si te ɔ.

⁴⁶ Na bɛ bɔ bɛhyele Yisraelfoɛ nnure amukoraa, Nyameɛ maa benwuni Yisraelfoɛ anwumvoin.

⁴⁷ Ao AWURADE yɛ Nyameɛ, pepɛ de yɛ, ná boa yɛ noa fi maen maen nemɔ aso, amaa ɔnate so yala wɔ dumaa krongron ne ase, ná yahoahoa yɛ nwo wɔ w’ayɛyelɛ nu.

⁴⁸ AWURADE Yisrael Nyameɛ ne, animnyam hã ye ofi tetetete bɔ ɔkwaadwu afebɔɔ ɔ! Ma maen ne amukoraa bɛhã kyɛ, “Amen.” Ɛ́mɔye AWURADE ayɛ!