Edwein 102 - AHYERƐLƐ KRONGRON

Nya anyelasoɛ wɔ Nyameɛ nu

Sona bɔ wahɔ amaneɛ nu bɔ odi yealɛ ɔ, ye mbaeɛ

¹ Ao AWURADE, tie me mbaeɛ; ma me sufrɛ oodwu wɔ nyunu.

² Nnɛye wɔ nye fea me wɔ m’amaneɛnwunɛ mmerɛ nu. Yɛ asoɛ tie me; sɛ mesu mefrɛ wɔ a, bua me ndɛndɛ.

³ Ofikyɛ me ngyẽa pɛ nu kɔ kyɛ nwosina, na me mmowue nu yerayera me kyɛ see.

⁴ M’ahone akese wayɛ twindwann kyɛ ndire, na me wora afi kyɛ ngodidi ɔ po.

⁵ Ɔnate kyɛ mepene serɛserɛ ne ati, me nwo ayeye mmowue.

⁶ Mayɛ kyɛ ɛserɛ so pɛtɛ, mayɛ kyɛ kurofoen so patue.

⁷ Nnakorɔkorɔ atɔ me so, mayɛ kyɛ anomaa bɔ waha ye ngome wɔ sua so ɔ.

⁸ Daa biala, me pɔfoɛ mɔ bɛkã me anyinga; bɛ bɔ bɛgoro me nwo ne, bɛfa me dumaa bɛwa amoen.

⁹ Ofikyɛ medi nzoen kyɛ aleɛ, na mefa me nye moen mefra me nzue,

¹⁰ ɔnate wɔ ɛyaafɛlɛ ne w’ahonehulɛ ne ati; ofikyɛ apagya me afindi me ato.

¹¹ Me ngyẽa ba ayieleɛ kyɛ nɔsoa wawoɛ; na mekese kyɛ ndire.

¹² Nakoso, ao AWURADE, ɛte w’ahennie bia so afebɔɔ; wɔ dumaa timu berɛ daa wɔ aworɛ ndoatoasoɛ amukoraa nu.

¹³ Ekodwɔso konwu Sion anwumvoin, ofikyɛ mmerɛ aso kyɛ ɛdo ye ɔ, mmerɛ bɔ ahyehyɛ ato berɛ ne waso.

¹⁴ Ofikyɛ ye nyɔboɛ mɔ bedi mu ma wɔ somvoɛ mɔ, na wɔ somvoɛ benwu ye mvuture anwumvoin.

¹⁵ Maen maen mɔ bekosuro wɔ dumaa ne, na aseɛ so ahemvo amukoraa bekosuro w’animnyam ne.

¹⁶ Ofikyɛ AWURADE kosa kɔkyekye Sion; ɔkɔye ye nwo ali wɔ ye animnyam nu.

¹⁷ Okotie sona bɔ olle bie ɔ ye mbaeɛ, ná ɔngɔpo bɛ mbaeɛ.

¹⁸ Odi kyɛ bɛkyerɛ ɛhe bɛto berɛ bɛma aworɛ ndoatoasoɛ bɔ ɔbaawa ɔ, amaa ɔnate so mmenia bɔ bennya bɛwwole bɛ ne, baye AWURADE ayɛ kyɛ,

¹⁹ Ɔtole ye nye fili ye nekaa krongron bɔ ɔwɔ anwuro ne, ɔneane ase, AWURADE tole ye nye fili nyameɛso neane ase,

²⁰ kyɛ okotie kukunufoɛ bɛ penenɛ, kyɛ ɔkɔpepɛ kole bɛ bɔ bɛbaahu bɛ ɔ,

²¹ amaa ɔnate so mmenia babɔ AWURADE dumaa nwo dawure wɔ Sion, ná babɔ ye ayɛyelɛ nwo dawure wɔ Yerusalem,

²² wɔ mmerɛ bɔ maen maen mɔ ne ahennie mɔ bɛkɔboa bɛ noa kyɛ bɛsɔne AWURADE ɔ.

²³ Wama m’anwoserɛ so ate wɔ me mmerandeɛ nu, na wapɛ me ngyẽa so.

²⁴ Menwa, “Ao me Nyameɛ, wɔ bɔ ɛwɔ berɛ afebɔɔ wɔ aworɛ ndoatoasoɛ amukoraa nu ɔ, nnɛde me ngoa fi me sa nu wɔ me mmerandeɛ nu.”

²⁵ Daa tetetete yeɛ ɛtole aseɛ fapem ɔ, na anwuro te wɔ sa noa adwuma.

²⁶ Bɛ boso konua, nakoso wɔ de, ɛwɔ berɛ daa; amba, bɛ mukoraa bɛkɔtete kyɛ ɛtena. Ɛkɔsesã bɛ kyɛ ndaadeɛ, na bɛ boso komini.

²⁷ Nakoso wɔ de, bɔ ɛte ala yeɛ ɛte ɔ, wɔ ngyẽa olle ayieleɛ.

²⁸ Wɔ somvoɛ mɔ, bɛ mma mɔ kɔtena ase asomdwee nu, bɛ boso ama mɔ, bɛ bo kotimu wɔ wɔ nyunu.