Edwein 101 - AHYERƐLƐ KRONGRON

Nana Dawide bɔhyɛ

Dawide dwein

¹ Ngɔto anwumvoinnwunɛ ne ndɛenbualɛ turoloo nwo dwein; ao AWURADE, wɔ nwo dwein yeɛ ngɔto ɔ.

² Atee bɔ ɔte pɛpɛɛpɛ ne, so yeɛ ngɔfa ɔ. Ao, kyinzu yeɛ ɛkɔwa me nwo wa ɔ? Ngɔfa ahone bɔ nu te ɔ ngɔnate m’awuro berɛ.

³ Mengɔfa nikyee biala bɔ mvasoɛ nne so ɔ mengosie me nye so. Bɛ bɔ bedi wɔ dwirɛ nwo makyebu ne, mekyi bɛ yɔleɛ; mengɔma bɛ yɔleɛ ne ngɔte ngɔmata me.

⁴ Ngondombo adwene de, mengɔmaa ongopingye me le. Mengɔfa me nwo mengɔfɔlefɔle bɔne biala.

⁵ Ebiala bɔ ɔfea toatoa obiɛngo ne, ngɔmaa ɔkɔhã ye noa kɔto nu. Sona bɔ ɔte nduhoɛ ne anwomasoɛ ne de, mengɔpene ye.

⁶ Maen ne anu nahorɛlilɛfoɛ nemɔ, ngɔlo bɛ, amaa ɔnate so bɛ ne me atena. Sona bɔ ɔnate atee bɔ ɔtengyɛ so ne, ye yeɛ ɔkɔso me ɔ.

⁷ Nnakannakaniɛ biala de, ɔngɔtena m’awuro berɛ; yeɛ ngondomboniɛ biala koso, ongogyina me nyunu.

⁸ Ngyerɛmɔ biala, ngohũhũ aseɛ ne aso bɔnefoɛ amukoraa, amaa ɔnate so matu amumuyɛɛfoɛ amukoraa bɛ bo mafi AWURADE kuro ne anu.