Deuteronomi 7 - AHYERƐLƐ KRONGRON

AWURADE apa nu aye Yisraelfoɛ

¹ “Na sɛ AWURADE wɔ Nyameɛ fa wɔ kodwu aseɛ bɔ ɛkwaafa tena so ne aso, ná ɔfoa maen maen pee fi wɔ nyunu a, mekyire Hitifoɛ, Gɛgasifoɛ, Amorifoɛ, Kanaanfoɛ, Perisifoɛ, Hiwifoɛ ne Yebusifoɛ: maen nzoo bɔ bɛ somaa ne b’anwoserɛ tra wɔ ɔ,

² ná sɛ AWURADE wɔ Nyameɛ fa bɛ wura wɔ sa, ná edi bɛ so ngonim a, ye de ɔsɛ kyɛ ekuku bɛ bɔkɔɔ. Nnɛne bɛ yɛ apam, yeɛ nnɛnwu bɛ anwumvoin.

³ Nnɛma ɛmɔ ne bɛ begyigya bɛ nwo. Nnɛfa wɔ mma mmrasua ma bɛ mma mmienzua gya, yeɛ nnɛgya bɛ mma mmrasua ma wɔ mma mmienzua.

⁴ Ofikyɛ bɛkɔkakyi wɔ mma nemɔ adwene bɔ bengoli me si ɔ, maa bɛkɔɔso nyameɛ foforɛ biemɔ. Na ɔba ye sɔ a, AWURADE kɔfɛ ɛmɔ so yaa piri paa, na okohu wɔ ndɛndɛ.

⁵ Nakoso bɔ ɔsɛ kyɛ ɛmɔfa bɛyɔ bɛ hɔ ɛhe: Ɛ́mɔdwiri b’afɔleɛ bokyea nemɔ bégua, ná ɛ́mɔbubu bɛ bonima nemɔ nu gɔsɔgɔsɔ; ɛ́mɔpepɛ bosoen Asera dosii nemɔ bégua, ná ɛ́mɔfa see bɛ́yera b’amoen nemɔ.

⁶ “Ofikyɛ ɛmɔte mmenia krongron bɛma AWURADE ɛmɔ Nyameɛ; na ɛmɔ yeɛ AWURADE ɛmɔ Nyameɛ waneanea aseɛ ye aso mmenia mukoraati nu waye ɛmɔ ɔ, kyɛ ɛ́mɔyɛ ye bɔbɔ ye mmenia bɔ ye ahone la bɛ nwo ɔ.

⁷ Nna kyɛ ɛmɔsone bɛtra maen biala nu mmenia ti yeɛ ɔmaa AWURADE fale ɛmɔ batale ye nwo ná ɔneaneane nu yele ɛmɔ ɔ, ofikyɛ ɛmɔ yeɛ ɛmɔ te kãa paa wɔ maen maen mukoraati nu ɔ.

⁸ Na mmom, AWURADE kuro ɛmɔ dwirɛ, yeɛ osa di ndaen bɔ ɔta hyirele ɛmɔ nana mɔ ne aso. Na ɛhe ati yeɛ ɔmaa AWURADE nate tumi piri so yele ɛmɔ ɔ, na ɔyele ɛmɔ fili ngoaasolɛ nu, fili Misraim hene Faro sa nu.

⁹ Yiti ɔsɛ kyɛ enwu ye kyɛ, AWURADE wɔ Nyameɛ ne, ye ole Nyameɛ; Nyameɛ nahorɛlilɛniɛ bɔ odi ye adɔeɛ apam so ma mmenia bɔ bekuro ye dwirɛ ná bedi ye mmeraa dwirɛ so ɔ, kodwu aworɛ ndoatoasoɛ apee so.

¹⁰ Nakoso bɛ bɔ bɛpɔ ye ne de, otua bɛ so kerɛ maa bɛ boso yera. Ɔngyɛ ye nwo koraa, na otua bɛ bɔ bɛpɔ ye ne so kerɛ maa bɛ boso yera.

¹¹ Yiti mmeraa dwirɛ ne ahyɛdeɛ ne nhyehyɛleɛ bɔ méfa méma wɔ ɛnɛ kyẽa ye, di so pɛpɛɛpɛ.

Sotie nwo saleɛ

¹² “Na sɛ ɛmɔyɛ asoɛ betie sɔ nhyehyɛleɛ hemɔ, ná ɛmɔdi so pɛpɛɛpɛ a, ye de adɔeɛ apam bɔ AWURADE wɔ Nyameɛ tale ye nwo ndaen hyirele wɔ nana mɔ ne, AWURADE koli so kɔma wɔ.

¹³ Okohuro wɔ dwirɛ, okoyira wɔ, na ɔkɔma wɔ boso kɔta pee. Okoyira wɔ kunu mmaa, w’aseɛ so aleɛ, w’aburoo ne wɔ nzaa ne wɔ ngoo, wɔ nandwie ne wɔ mmoaen kɔta pee; wɔ aseɛ bɔ ɔtale ye nwo ndaen hyirele wɔ nana mɔ kyɛ ɔkɔfa kɔma wɔ ne aso.

¹⁴ Ekonya saleɛ kɔtra maen biala, na bienzua anaa brasua biala ngɔyɛ mmotaen wɔ wɔ nu, anaa wɔ nyɛmmoa nu.

¹⁵ AWURADE kɔbɔ wɔ nwo waen kofi anwonyerɛ amukoraati nwo, na Misraim anwonyerɛ tɛɛ bɔ enwuni ye ne, ɔngɔma nu ko po ngɔbɔ wɔ. Nakoso bɛ bɔ bɛpɔ wɔ ne de, ɔkɔprapra anwonyerɛ nemɔ kogua bɛ so.

¹⁶ Na ekohũhũ mmenia bɔ AWURADE wɔ Nyameɛ kɔfa bɛ kowura wɔ sa ne amukoraati. Nnɛnwu bɛ anwumvoin, yeɛ nnɛso bɛ nyameɛ nemɔ, ofikyɛ ɛhe kɔyɛ wɔ so ngaen.

¹⁷ “Ebiaa ɛkɔha ye wɔ wɔ ti anu kyɛ, ‘Maen hemɔ bɛsone bɛtra me; ɔkɔyɛ sɛɛ né mahora mafoa bɛ mafi berɛ?’

¹⁸ Nakoso nnɛsuro bɛ, na mmom kaye bɔ AWURADE wɔ Nyameɛ fa yɔle Faro ne Misraim amukoraati ne,

¹⁹ nzɔhwɛ mbiri mbiri bɔ ɛfale wɔ nye nwuni ye, nzɛngyerɛnneɛ, anwanwadeɛ, tumi piri ne tumi asaa bɔ AWURADE wɔ Nyameɛ fa yele wɔ fili berɛ ɔ. Na sɔ yeɛ AWURADE wɔ Nyameɛ kɔfa kɔyɔ mmenia bɔ esuro bɛ ne amukoraa ɔ.

²⁰ Asa koso, AWURADE wɔ Nyameɛ kɔsoma kotokuradu mɔ maa bɛkɔhɔ bɛ so, kɔpem kyɛ bɛ bɔ baha bɔ baabɔ bɛ nwo adwaa ne po bekowuwu koraa ɔ.

²¹ Nnɛma bɛ nwo suronyi tɔ wɔ so, ofikyɛ AWURADE wɔ Nyameɛ bɔ ogyi wɔ si ne, ɔte Nyameɛ bɔ ɔte piri, bɔ ye nwo yɛ suro ɔ.

²² AWURADE wɔ Nyameɛ kɔfoa sɔ maen hemɔ kofi wɔ nyunu ngaka ngaka. Ɛngɔhora ngohũhũ bɛ mukoraati berɛ ne ala, anyɔ a ngaka aboyaa nemɔ kɔsone pee kɔha wɔ.

²³ Nakoso AWURADE wɔ Nyameɛ kɔfa bɛ kowura wɔ sa, ɔkɔma bɛ nye so kɔtã paa, kɔpem kyɛ bekowuwu ɔ.

²⁴ Ɔkɔfa bɛ hene mɔ kowura wɔ sa, na odi kyɛ ɛma bɛ dumaa mini fi aseɛ ye aso. Na sona biala ngɔhora wɔ nyunu gyina kɔpem kyɛ ekohũhũ bɛ ɔ.

²⁵ Amoen mɔ bɔ bafa bayɛ bɛ nyameɛ mɔ ne, ɛ́mɔfa see bɛ́yera bɛ. Nnɛma wɔ nye boro ɛdwetɛ anaa esikaa kɔkorɛ bɔ bafa baboro amoen nemɔ nwo ne, ná amva bie ma wanyɛ ngaen wangye wɔ, ofikyɛ ɔte AWURADE wɔ Nyameɛ akyiwadeɛ.

²⁶ Nnɛfa akyiwadeɛ biala ba w’awuro, ná wɔ koso angakyi akyiwadeɛ kyɛ ye ala. Ɔsɛ kyɛ ɛmaa ɔyɛ wɔ tɛ ná ekyi ye bɔkɔɔ, ofikyɛ ɔte akyiwadeɛ.