Deuteronomi 33 - AHYERƐLƐ KRONGRON

Mose yirayira Yisrael abusua kure nemɔ

¹ Saleɛ bɔ Nyameɛ sona Mose fa yirayirale Yisraelfoɛ koraka yeɛ owu ne ɛhe:

² Ɔnwa: “AWURADE fili Sinai wale, opukyele Sɛre kyɛ eyia tale bɛ so; ɔtale hyireinn fili Paran bokaa ne aso, ɔne krongronfoɛ apee buru yeɛ bɛwale ɔ, see bɔ ogye wuronyiwuronyi wɔ ye sa famaa nu.

³ Yoo, ohurole ye mmenia dwirɛ, ye anwoteefoɛ amukoraati bewura ye sa; bebutubutu wɔ wɔ gya bo, na bedi wɔ dwirɛ so.

⁴ Mose hyɛle mmeraa mane yɛ, kyɛ ɔte Yakob badwa agyapadeɛ.

⁵ AWURADE lili hene wɔ Yesurun, mmerɛ bɔ maen ne anu atitirefoɛ yiale ne, mmerɛ bɔ Yisrael abusua kure mukoraati yiale ne.

⁶ “Ruben abusua kure ne, mesrɛ kyɛ ɔ́tena berɛ daa, nnɛmaa ɔbɔ, yeɛ nnɛma nu mmienzua yɛ kaaba bie.”

⁷ Bɔ ɔha fale Yuda nwo ɛhe: “O AWURADE, tie Yuda abisadeɛ, fa ye kɔ maa ɔɔboka ye mmenia so; ko ye koɛ ma ye, ná boka ye ma oli ye pɔfoɛ mɔ so ngonim.”

⁸ Bɔ ɔha fale Lewi nwo ɛhe: Fa wɔ Tumim ne ma Lewi, fa wɔ Yurim ne ma wɔ krongronniɛ ne, bɔ esole ye neane wɔ Masa, ná ɛne ye perele so wɔ Meriba asue nwo ne.

⁹ Ye bɔ ɔhane edwirɛ fale ɔse ne oni nwo kyɛ, ‘Memva bɛ menyɛ huu’; obuli ye nye guale oliɛma mɔ so, na ɔpole ye mma mɔ. Ofikyɛ Lewifoɛ lele wɔ dwirɛ bɛtole nu, na belili w’apam ne aso.

¹⁰ Bekohyire Yakob wɔ nhyehyɛleɛ ne, ná bahyire Yisrael wɔ mmeraa ne; bɛkɔfa ayirefona bɛkɔwa wɔ nyunu, ná babɔ afɔleɛ mumua yeralɛ wɔ w’afɔleɛ bokyea ne aso.

¹¹ O AWURADE, yira Lewi agyapadeɛ so, ná ma ye sa noa adwuma sɔ wɔ nye; bubu ye pɔfoɛ mɔ dwongu, yɔ bɛ bɔ bekyi ye koso sɔ ala, ná bandwɔso ko.”

¹² Bɔ ɔha fale Benyamin nwo ɛhe: “Ye bɔ AWURADE kuro ye dwirɛ paa ne, ɔkɔtena AWURADE nwo asomdwee nu, AWURADE kɔbɔ ye nwo waen daa biala, na ɔkɔtena AWURADE bati nemɔ afia.”

¹³ Bɔ ɔha fale Yosef nwo ɛhe: “AWURADE, yira ye aseɛ, ma nyameɛso bosue guagua so, ná ma aseɛ bo dɔ nzue pu bra ɔɔloaloa so.

¹⁴ Maa onya aleɛ paa bɔ eyia maa beti ɔ, ɔne fieso nningyein paa bɔ bosome biala beti ɔ.

¹⁵ Ma daa tete mmokaa nemɔ bɛhye aleɛ bɛma ye, ná ma aleɛ bu wɔ mmokaa bɔ bɛwɔ berɛ afebɔɔ nemɔ aso ma ye.

¹⁶ Ma ye aseɛ so nningyein paa mukoraati. Mesrɛ kyɛ, Nyameɛ bɔ ɔyele ye nwo ali wɔ ngyɛkyerɛ nu ne, ɔlo ye. Ma saleɛ hemɔ amukoraati ɔ́yɛ Yosef ti so abotire, ye bɔ odi oliɛma mɔ so hene ne, maa ɔbɔ ye nwoma so.

¹⁷ Ɔte kyɛ nandwie nyii bamuɛbaa, ole animnyam, ye mmɛen te torɔen mmɛen, ɔfa mmɛen ne si maen maen mɔ toonn, maa bɛ mukoraati bekogua aseɛ noa dɔ. Mmɛen nemɔ ole Efraim mmenia apee buru ne, yeɛ Manase mmenia apee apee ne.”

¹⁸ Bɔ ɔha fale Sebulɔn nwo ɛhe: “Sebulɔn, ɛpo so dwaalilɛ ne, di ahurusi wɔ nu. Yisaka, di ahurusi wɔ wɔ tena sua nu.

¹⁹ Bɛkɔfrɛfrɛ mmenia maa bɛkɔwa bokaa ne aso, berɛ yeɛ bɛbɔ afɔleɛ bɔ ɔsɔ anyeɛ ɔ, ofikyɛ benya bɛ nwo befi ɛpo nu, ɔne agyapadeɛ bɔ bafa bafea anweaa nu ɔ.”

²⁰ Bɔ ɔha fale Gade nwo ɛhe: “Saleɛ te Nyameɛ bɔ ɔma Gade aseɛ trɛ ɔ deɛ! Gade suban te kyɛ gyata, ɔtete asaa ne tire nu pasaa.

²¹ Ɔneaneane nu yele aseɛ paa fale, ofikyɛ né berɛ te safohene kyɛfa; na maen mbanyi nemɔ bɔle dwaa nen, ɔyɔle AWURADE apɛdeɛ bɔ ɔtengyɛ ɔ, na olili ahyɛdeɛ bɔ ɔfa mane Yisrael ne aso.”

²² Bɔ ɔha fale Dan nwo ɛhe: “Dan te gyata akrɔngrɔma, bɔ ohuruhuru fi Basan ba ɔ.

²³ Bɔ ɔha fale Nafetali nwo ɛhe: “O Nafetali, bɔ AWURADE alo ye maa wabo so ɔ, bɔ wanya AWURADE saleɛ mmorosoɛ ɔ, fa aseɛ bɔ ofi mboanoa ɔkwaadwu ngwaen dɔ ne.”

²⁴ Bɔ ɔha fale Asɛ nwo ɛhe: “Mesrɛ kyɛ, Nyameɛ óyira Asɛ tra mmaa nemɔ nu biala, kyɛ oliɛma nemɔ béhuro ye dwirɛ, ná ɔ́ma ye olive mmakaa su biribiraa.

²⁵ Mesrɛ kyɛ, bɔ ogyigyi wɔ pambim si ne, ɔ́yɛ buralɛ ne kɔɔbere, na kyɛbɔ wɔ ngoa tendenn te ne, sɔ ala yeɛ wɔ nwo waenbɔlɛ kɔyɛ ɔ.

²⁶ “Yesurun Nyameɛ ne, nyameɛ biala nne berɛ bɔ ɔte kyɛ ye ɔ, ye yeɛ ɔnate ye tumi piri so fa munungum nu, ná ɔfa ewienu baboka wɔ ɔ.

²⁷ Ɛdangama Nyameɛ te w’afealeɛ, ɛfea ye sa afebɔɔ ne abo, Ɔfoane pɔfoɛ ne fili wɔ nyunu, na ɔhane kyɛ, ‘Kuku bɛ!’

²⁸ Yiti Yisrael te asomdwee nu, nikye fee nha Yakob atenaleɛ, bɔ ɔwɔ aburoo ne nzaa aseɛ so ne, nekaa bɔ anwuro tɔ bosue gua ase ɔ.

²⁹ O Yisrael, anya saleɛ! Nwa yeɛ ɔne wɔ bɛte pɛ ɔ? Mmenia bɔ AWURADE ale bɛ ɔ, ɔte w’akokyɛm bɔ ɔbɔ wɔ nwo waen ɔ, ɔne wɔ ngonim ngrandɛ! Wɔ pɔfoɛ mɔ kɔbrɛ bɛ nwo ase wɔ wɔ nyunu, nakoso wɔ de, ekotiatia b’asɔneyɛɛ nemɔ aso.”