Deuteronomi 31 - AHYERƐLƐ KRONGRON

Yosua si Mose gya nu

¹ Afei Mose hane sɔ dwirɛ ne hyirele Yisraelfoɛ amukoraa yiele nen,

² osa toale so sele bɛ kyɛ, “Kekesaala ye, mali afoɛ ɛyaa ko ne aburanyɔ. Me a mengora kɔ, yeɛ mengora ba. Na AWURADE aha ahyire me kyɛ, ‘Nnɛpɛ asue Yɔɔdan kɔ ye si.’

³ AWURADE wɔ Nyameɛ bɔbɔ okoli wɔ nyunu moa kɔpɛ asue ne; na ɔkɔsɛkye maen maen hemɔ kofi wɔ nyunu maa ɛkɔfa b’aseɛ ne. Na Yosua koso okoli wɔ nyunu kɔpɛ asue ne, kyɛbɔ AWURADE aha ne.

⁴ Nikyee bɔ AWURADE fa yɔle Amorifoɛ ahemvo Sihon ne Ogo, bɔ ɔsɛkyele bɛ ne b’aseɛ ne, sɔ ala yeɛ ɔkɔfa kɔyɔ maen maen hemɔ ɔ.

⁵ AWURADE kɔfa bɛ kowura ɛmɔ bo, na kyɛbɔ mmeraa dwirɛ bɔ mahyɛ mama ɛmɔ ne amukoraa te ne, sɔ ala yeɛ ɛ́mɔfa bɛ́yɔ bɛ ɔ.

⁶ Ɛ́mɔgyina pindinn, ná ɛ́mɔma ɛmɔ ahone yɛ se. Nnɛma ɛmɔsuro, yeɛ nnɛmɔma bɛ nwo suronyi tɔ ɛmɔ so, ofikyɛ AWURADE wɔ Nyameɛ ne, ye yeɛ ɔne wɔ nate ɔ. Ongoli wɔ ngasi, yeɛ ɔngɔyakyi wɔ nu.”

⁷ Afei Mose frɛle Yosua, na osele ye wɔ Yisraelfoɛ amukoraati bɛ nyunu berɛ kyɛ, “Gyina pindinn, ná ma w’ahone yɛ se, ofikyɛ aseɛ bɔ AWURADE ata ye nwo ndaen wahyire mmenia hemɔ bɛ nana mɔ kyɛ ɔkɔfa kɔma bɛ ne, wɔ yeɛ ɛkɔfa bɛ kɔhɔ so ɔ, na wɔ yeɛ ɛkɔhyɛ kɔma bɛ ɔ.

⁸ AWURADE yeɛ oli wɔ nyunu ɔ; okoli wɔ si, ongoli wɔ ngasi, yeɛ ɔngɔyakyi wɔ nu. Nnɛsuro, yeɛ nnɛma wɔ kunu tete wɔ.”

Ɔsɛ kyɛ ɛmɔkenga mmeraa ne afoɛ nzoo biala

⁹ Afei Mose hyerɛle sɔ mmeraa he, na ɔfa mane asɔfo nemɔ, bɔ bɛte Lewi bosofoɛ bɔ bɛsoa AWURADE apam alaka ne, yeɛ afei Yisrael mbanyi amukoraati koso.

¹⁰ Na Mose hyɛle bɛ kyɛ, “Afoɛ nzoo biala ayieleɛ, bɔ ɔte kerɛ-fahyɛlɛ afoɛ ne, wɔ Asese aluolue mmerɛ ne anu,

¹¹ bɔ yeɛ Yisraelfoɛ amukoraati bɛba AWURADE wɔ Nyameɛ nyunu, wɔ nekaa bɔ okohyire ne, ɔyɛ a kenga mmeraa he ma Yisraelfoɛ amukoraati bɛte bie.

¹² Ma mmenia ne bɛ́bɔ dwaa: mmienzua, mmrasua, ngwadaa ne ɛwɔfoɛ mɔ bɔ bɛtete wɔ nguro nemɔ aso ɔ; amaa ɔnate so batie, ná basua kyɛbɔ besuro AWURADE ɛmɔ Nyameɛ ɔ, ná bali mmeraa he anu dwirɛ mukoraa so nahorɛ nu.

¹³ Na ɔnate so bɛ mma mɔ, bɔ bɛnze mmeraa he nen, bɛkɔte ná basua kyɛbɔ besuro AWURADE ɛmɔ Nyameɛ ɔ, mmerɛ biala bɔ ɛmɔte aseɛ bɔ yeɛ ɛ́mɔpɛ asue Yɔɔdan bɛkɔɔfa ne aso ɔ.”

AWURADE ne Mose ngitahoɛ bɔ ɔpɛ ye bo ɔ

¹⁴ Na AWURADE sele Mose kyɛ, “Ɔngɔhyɛ biala né awu. Frɛ Yosua ná ɛne ye bɛbra ɛtena sua atenaleɛ nu berɛ, ná mva m’adwuma nwura ye sa.” Yiti Mose ne Yosua bɛhɔle ɛtena sua atenaleɛ nu berɛ.

¹⁵ AWURADE yele ye nwo ali munungum ningɔnn nu wɔ ɛtena sua atenaleɛ nu berɛ, na munungum ningɔnn ne oogyinane ɛtena sua atenaleɛ nu anoa nu berɛ.

¹⁶ Na AWURADE sele Mose kyɛ, “Ɔngɔhyɛ biala, ɛkɔtoa wɔ mbanyi mɔ. Nakoso mmenia hemɔ de, Amaenmaensofoɛ nyameɛ mɔ bɔ bɛwɔ aseɛ bɔ bɛ́kɔ so ne aso ne, bɛkɔbɔ adwaman bekooli bɛ si. Bɛkɔpo me, yeɛ bekobu m’apam bɔ me ne bɛ yɛyɛle ne aso.

¹⁷ M’ahone kohu bɛ so sɔ kyẽa ne, ngɔpo bɛ, ngɔye me nye ngofi bɛ so, bɛ pɔfoɛ mɔ kohũhũ bɛ, na musue ne amaneɛ pee kɔtoto bɛ. Na sɔ kyẽa ne yeɛ bɛkɔhã kyɛ, ‘Aso nna yɛ Nyameɛ bɔ ɔnne yɛ nu wa bie ye ati yeɛ amaneɛ hemɔ atoto yɛ ye?’

¹⁸ Na ɔnate bɔne amukoraati bɔ bayɔ, bɔ baali nyameɛ foforɛ biemɔ asi ne ati, ngɔye me nye ngofi bɛ so sɔ kyẽa ne.

¹⁹ “Yiti ɛmɔhyerɛ sɔ dwein he bɛ́to berɛ, ná kyire Yisraelfoɛ maa ɔha bɛ ti anu, ná edwein he oli m’adanzeɛ otia Yisraelfoɛ.

²⁰ Ofikyɛ, mefa bɛ mekodwu aseɛ bɔ nyɔfonesue ne woɛ tengyɛ wɔ so, bɔ ndale ndaen kyɛ ngɔfa ngɔma bɛ nana mɔ ne aso, ná bedidi ma bɛ ko yi, ná bɛyɛ mbiri mbiri a, bekooli nyameɛ foforɛ biemɔ si bɛkɔso bɛ, bɛkɔpo me, ná babu m’apam ne aso.

²¹ Na sɛ musue ne amaneɛ pee toto bɛ a, sɔ dwein he koli adanzeɛ kotia bɛ, ofikyɛ ongofi bɛ bosofoɛ ti anu. Na aseɛ bɔ ndale ndaen kyɛ ngɔfa ngɔma bɛ ne, anzana ngɔfa bɛ ngoodwu so ne po, mese porɛ horɛ bɔ kekesaala ye babɔ ye bɛ ti anu ɔ.”

²² Mose hyerɛle sɔ dwein ne sɔ kyẽa ne ala, na ohyirele Yisraelfoɛ.

²³ Afei AWURADE fale ye adwuma wurale Nun awa Yosua sa kyɛ, “Gyina pindinn, ná ma w’ahone yɛ se; ofikyɛ aseɛ bɔ ndale ndaen kyɛ ngɔfa ngɔma Yisraelfoɛ ne, wɔ yeɛ ɛkɔfa bɛ kɔhɔ so ɔ, na ngogyina wɔ si.

²⁴ Na mmerɛ bɔ Mose hyerɛle mmeraa he anu dwirɛ guale nwomaa nu yiele bɔkɔɔ nen,

²⁵ Mose hyɛle Lewifoɛ bɔ bɛsoa AWURADE apam alaka ne kyɛ,

²⁶ “Ɛ́mɔle mmeraa nwomaa he, ná ɛ́mɔfa bɛ́to AWURADE ɛmɔ Nyameɛ apam alaka ne anwo. Maa ɔla berɛ oli adanzeɛ tia wɔ.

²⁷ Ofikyɛ mese wɔ nye bɔ ɔnzɔ nikye ɔne w’asoserɛ. Me ne ɛmɔ yɛte ase ye po yeɛ ɛmɔahwi bafa AWURADE dwirɛ so sɔa ye, na me wue asi koso ɛ!

²⁸ Ɛ́mɔma ɛmɔ abusua kure mbanyi mukoraati ne mbanyi mɔ bɛɛbɔ dwaa wɔ me nwo wa, ná nga edwirɛ he amukoraa ma bɛte, ná mvrɛ anwuro ne aseɛ ma beli adanzeɛ betia bɛ.

²⁹ Ofikyɛ, mese kyɛ me wue asi ne, edwirɛ tɛɛ ala yeɛ ɛmɔkoli ɔ, na mmeraa bɔ mahyɛ mama ɛmɔ ne, ɛmɔkobu so. Na musue kɔto ɛmɔ kyẽa bie, ofikyɛ ɛmɔkɔyɔ AWURADE nyunu bɔne, na ɛmɔ sa noa adwuma kɔma ye ahone kohu.”

Mose dwein ne

³⁰ Afei Mose kengale edwein he anu dwirɛ amukoraati, fite ye ti kɔka ye bo, maa Yisrael maen ye amukoraa bɛtele.