Deuteronomi 30 - AHYERƐLƐ KRONGRON

AWURADE si lilɛ nwo saleɛ

¹ “Na sɛ edwirɛ he amukoraa: saleɛ ne musue bɔ mafa masie wɔ nyunu ne ba wɔ so, ná ɛkayekaye edwirɛ hemɔ wɔ maen maen mukoraa bɔ AWURADE wɔ Nyameɛ wafoa wɔ wahɔ so ne aso,

² ná esa ba AWURADE wɔ Nyameɛ berɛ, ná ɛne wɔ mma mɔ bɛfa ɛmɔ ahone mukoraati ne ɛmɔ kra mukoraati bedi ye dwirɛ so, kyɛbɔ méhyɛ wɔ ɛnɛ kyẽa ye a,

³ ye de AWURADE wɔ Nyameɛ kɔye wɔ kofi nnurehyelɛ nu, okonwu wɔ anwumvoin, na maen maen bɔ AWURADE wɔ Nyameɛ wamaa abɔ aya wɔ so ne, okosa kɔboaboa wɔ noa kofi ye mukoraati so.

⁴ Sɛ ewiase aseɛ noa dedeede dɔ po yeɛ bɛhyele wɔ nnure bɛhɔle a, AWURADE wɔ Nyameɛ kɔboaboa wɔ noa kofi berɛ, na ɔkɔɔfa wɔ kofi dɔ kɔwa.

⁵ AWURADE wɔ Nyameɛ kɔfa wɔ kɔwa aseɛ bɔ wɔ nana mɔ nyane ye ne aso, na wɔ sa kɔha ye. Nyameɛ kɔmaa okoyie wɔ yé kɔtra wɔ nana mɔ, na ɛkɔta pee kɔtra bɛ.

⁶ “AWURADE wɔ Nyameɛ kɔmaa ɛne wɔ bosofoɛ bekotie ye dwirɛ, amaa ɔnate so afa w’ahone mukoraati ne wɔ kra mukoraati ahuro AWURADE wɔ Nyameɛ dwirɛ, ná anya ngoa.

⁷ Na wɔ pɔfoɛ mɔ ne bɛ bɔ bekyi wɔ, bɔ bɛtanene wɔ nye ne, AWURADE wɔ Nyameɛ kɔprapra musue he amukoraati kogua bɛ so.

⁸ Na afei ekosa kotie AWURADE dwirɛ, ná ali ye mmeraa dwirɛ mukoraati bɔ méhyɛ méma wɔ ɛnɛ ye aso.

⁹ Na AWURADE wɔ Nyameɛ kɔmaa okoyie wɔ yé maa ɔkɔbo so, wɔ wɔ sa noa adwuma mukoraati nu, wɔ kunu mmaa, wɔ nyɛmmoa ne w’aseɛ so aleɛ nu; ofikyɛ AWURADE wɔ Nyameɛ nye kosa kɔgye kyɛ ɔkɔmaa okoyie wɔ yé, kyɛbɔ ye nye gyele kyɛ ɔkɔmaa okoyie wɔ nana mɔ yé nen;

¹⁰ nakoso sana etie AWURADE wɔ Nyameɛ dwirɛ, ná edi ye mmeraa dwirɛ ne ye ahyɛdeɛ bɔ bahyerɛ ye mmeraa nwomaa he anu so; sana esa fa w’ahone mukoraati ne wɔ kra mukoraati ɛbadi AWURADE wɔ Nyameɛ si koraka.

¹¹ “Mmeraa dwirɛ he bɔ méhyɛ méma wɔ ɛnɛ ye, ɔnyɛ se mma wɔ, yeɛ ɔne wɔ b’afia koso wanwa.

¹² Ɔnne nyameɛso, ná aha kyɛ, ‘Nwa yeɛ ɔkɔfo kɔhɔ nyameɛso kɔma yɛ, bɔ ɔkɔɔfa kɔbrɛ yɛ maa yɛkɔte ná yali so ɔ?’

¹³ Yeɛ ɔnne ɛpo asi dɔ, ná aha kyɛ, ‘Nwa yeɛ ɔkɔpɛ ɛpo ne kɔhɔ ye si kɔma yɛ, bɔ ɔkɔɔfa kɔbrɛ yɛ maa yɛkɔte ná yali so ɔ?’

¹⁴ Daabi, edwirɛ ne pingye wɔ paa, ɔwɔ wɔ noa nu ne w’ahone nu, kyɛbɔ ɔkɔyɛ ná ali so ɔ.

¹⁵ “Tie, ɛnɛ kyẽa ye, mafa ngoa ne saleɛ, yeɛ ewue ne musue masie wɔ nyunu.

¹⁶ [Sɛ edi AWURADE wɔ Nyameɛ mmeraa] bɔ mehyɛ mema wɔ ɛnɛ ye aso, ná ekuro AWURADE wɔ Nyameɛ dwirɛ, ná ɛfa ye atee so, ná edi ye mmeraa dwirɛ ne ye ahyɛdeɛ ne ye nhyehyɛleɛ so a, ye de ekonya ngoa, na ɛkɔta pee, na AWURADE wɔ Nyameɛ koyira wɔ wɔ aseɛ bɔ ɛkwaafa tena so ne aso.

¹⁷ Nakoso sɛ ɛyɛ asoserɛ, ná andie, ná ɛmaa bɛtwetwe wɔ maa ɛkɔkoto nyameɛ foforɛ biemɔ, ná ɛso bɛ de a,

¹⁸ ye de mekã mekyire ɛmɔ ɛnɛ kyɛ, ewue yeɛ ɛmɔkowu ɔ; na aseɛ bɔ ɛ́mɔpɛ asue Yɔɔdan bɛkɔɔfa bɛtena so ne, ɛmɔngɔtena so ngɔhyɛ.

¹⁹ Na ɛnɛ kyẽa ye, méfrɛ anwuro ne aseɛ maa bedi adanzeɛ bétia wɔ, kyɛ mafa ngoa ne ewue, yeɛ saleɛ ne musue masie wɔ nyunu: yiti fa ngoa, amaa ɔnate so ɛne wɔ boso ama banya ngoa.

²⁰ Kuro AWURADE wɔ Nyameɛ dwirɛ, tie ye dwirɛ, ná fa wɔ nwo bɔ ye; ofikyɛ, sɔ yeɛ ɔkɔmaa ekonya ngoa ná anyi ahyɛ ɔ. Na ɛkɔtena aseɛ bɔ AWURADE tale ndaen kyɛ ɔkɔfa kɔma wɔ nana mɔ Abraham, Yisake ne Yakob ne aso.”