Deuteronomi 3 - AHYERƐLƐ KRONGRON

Yisrael di Basan hene Ogo so ngonim

¹ Afei yɛkakyili yɛ nwo yɛfale yɛ nye yɛhyirele Basan, na Basan hene Ogo wale yɛ so, ɔne ye lɔen amukoraati, kyɛ bɛ ne yɛ baaho koɛ wɔ Yedrei.

² Nakoso AWURADE sele me kyɛ, ‘Nnɛsuro ye, ofikyɛ mafa ye ne ye lɔen amukoraati ne ye aseɛ mawura wɔ sa. Na nikyee bɔ ɛfa yɔle Amorifoɛ hene Sihon bɔ né ɔte Hesebon nen, sɔ ala yeɛ fa yɔ ye ɔ.’

³ Yiti AWURADE yɛ Nyameɛ fale Basan hene Ogo koso ne ye lɔen amukoraa wurale yɛ sa, yɛhuni ye, na bɛ nu ko po anga.

⁴ Sɔ mmerɛ ne, yɛfale ye nguro ne amukoraati. Nguro aburasia ne, nu ko po nne berɛ bɔ yanne yamvi bɛ sa nu ɔ: mekyire Agɔbo manzini amukoraati, nekaa bɔ Ogo di ye bia wɔ Basan ne.

⁵ Né bato fasue tendetende bafa sɔ nguro nemɔ amukoraa nwo bayia, na né bafa mmuralɛ babeabea bɛ pambim nyɔ nemɔ asi. Né namue pee koso bɔ fasue nne bɛ nwo ɔ wɔ berɛ.

⁶ Yɛsɛkyele bɛ bɔkɔɔ, kyɛbɔ yɛyɔle Hesebon hene Sihon ne: yɛsɛkyele kuro biala, na yɛhuhuni mmienzua ne mmrasua ne ngwadaa mukoraati.

⁷ Nakoso yɛfale nguro nemɔ anu nyɛmmoa yɛyɛle yɛ koɛ nu nzesadeɛ, na yɛfene nu nningyein yɛfale.

⁸ Yiti sɔ mmerɛ ne, asue Yɔɔdan si dɔ aseɛ ne, fite Anɔn bɔnza nu kodwu Hɛmɔn bokaa ne, yɛle yɛfili Amorifoɛ hene nyɔ nemɔ sa nu.

⁹ (Sidonfoɛ frɛ Hɛmɔn Sirion, yeɛ Amorifoɛ frɛ ye Seniri).

¹⁰ Nguro amukoraati bɔ bɛwɔ bokaa frɛtɛɛ ne aso, ɔne Gileade ne Basan aseɛ amukoraati, kodwu nguro Saleka ne Yedrei bɔ bɛwɔ ɛhene Ogo maen nu wɔ Basan ne, yɛlili bɛ so ngonim.

¹¹ Refaimfoɛ bɛ bosofoɛ ne, né Basan hene Ogo ngome twe yeɛ waha ɔ. Né ye mba te buralɛ. Ye tendenn nu te agyirɛ ngona, yeɛ ye tɛtrɛtɛɛ nu te agyirɛ nna, kyɛbɔ sona agyirɛ nzusuleɛ te ɔ. Na ɔtɛ gyi Amonfoɛ kuro Raba so.

Bɛhyɛle asue Yɔɔdan si aseɛ ne

¹² “Yɛ sa hane aseɛ ne sɔ mmerɛ nen, mvale Aroye sorɔ dɔ mane Rubenfoɛ ne Gadefoɛ. Mekyire aseɛ bɔ ɔla Anɔn bɔnza ne anu dɔ, ɔne Gileade mmokaa aseɛ ne bue, ɔne ye nguro mɔ.

¹³ Na Gileade ngaa bɔ waha ne, ɔne Basan amukoraa bɔ Ogo di hene ne, mva mane Manase abusua kure ne bue. (Aseɛ amukoraa bɔ ɔla Agɔbo mbɔtam wɔ Basan ne, né bɛfrɛ ye Refaimfoɛ aseɛ.

¹⁴ Manase bosoniɛ Yari, ɔho fale Agɔbo bɔ besa bɛfrɛ ye Basan ne. Mekyire aseɛ amukoraa bɔ ɔkwaadwu Gesurefoɛ ne Maakatifoɛ ɛwɛen so ne, na ɔfale ye dumaa tole so kyɛ, Hawote Yari, na dumaa ne la so maa waadwu ɛnɛ.)

¹⁵ Mvale Gileade mane Makyiri.

¹⁶ Na mvale aseɛ bɔ ofi Gileade ɔkwaadwu Anɔn bɔnza ne anu mane Rubenfoɛ ne Gadefoɛ. (Bɔnza ne afia yeɛ ɔte ɛwɛen ɔ). Na ɔtrɛ kodwu Yabɔko bɔnza bɔ ɔte Amonfoɛ ɛwɛen ne aso.

¹⁷ Aseɛ ne, asue Yɔɔdan wɔ ye eyia atɔleɛ, wɔ Araba ne anu dɔ, fite Kinerete kɔpem Araba po bɔ besa bɛfrɛ ye Ngyee po ne, wɔ Pisiga bokaa ne aseɛnwo dɔ, wɔ eyia afiteleɛ.

¹⁸ “Sɔ mmerɛ ne, nhyɛle ɛmɔ kyɛ, ‘Ɔwɔ nu kyɛ AWURADE ɛmɔ Nyameɛ afa aseɛ he wama ɛmɔ kyɛ ɛmɔfa bɛtena so de, nakoso ɔsɛ kyɛ ɛmɔ koɛhonɛfoɛ ne amukoraa bɛfa akodeɛ bɛse bedi ɛmɔ aliɛma mɔ Yisraelfoɛ nyunu.

¹⁹ Ɛmɔ aye mɔ, ɛmɔ mma mɔ ne ɛmɔ nyɛmmoa mɔ de, (mese kyɛ ɛmɔle nyɛmmoa pee) ɔsɛ kyɛ bɛka nguro bɔ mafa mama ɛmɔ ne anu,

²⁰ kɔpem kyɛ AWURADE kɔma ɛmɔ aliɛma mɔ konya nekaa kole bɛ nwome, kyɛbɔ wayɔ wama ɛmɔ ne; kɔpem kyɛ bɛ koso bɛ sa kɔha aseɛ bɔ AWURADE ɛmɔ Nyameɛ ɔ́fa ma bɛ wɔ asue Yɔɔdan si dɔ ne ɔ. Na ɛhe asi ne, ebiala kɔhora kosa kɔɔfa ye aseɛ bɔ mafa mama ɛmɔ ne.’

²¹ Sɔ mmerɛ ne, nhyɛle Yosua kyɛ ‘Nikyee biala bɔ AWURADE ɛmɔ Nyameɛ afa ayɔ sɔ ahemvo nyɔ hemɔ amukoraa ne, wɔ nye tua. Na maen maen mɔ bɔ ɛkwaapɛ nu berɛ kɔ ne, sɔ ala yeɛ AWURADE kɔfa kɔyɔ bɛ ɔ.

²² Nnɛma ɛmɔsuro bɛ, ofikyɛ AWURADE ɛmɔ Nyameɛ yeɛ ɔko ma ɛmɔ ɔ.’

Mose gya baa ngotia Kanaan

²³ “Sɔ mmerɛ ne, nzrɛle AWURADE kyɛ,

²⁴ ‘O AWURADE Nyameɛ, bekye ala po yeɛ ahyɛ ye bo bɔ ɛma w’akoaa nwu kyɛbɔ esi te piri, ɔne kyɛbɔ wɔ tumi te ɔ, na nyameɛ foforɛ beni yeɛ ɔwɔ anwuro anaa ase bɔ ɔkɔhora kɔyɔ nningyein mbiri mbiri ne anwanwadeɛ bɔ ɛyɔ ye ɔ?

²⁵ Mesrɛ wɔ ala, maa mbɛ asue Yɔɔdan ngɔ ye si dɔ ngɔnea aseɛ paa bɔ ɔla dɔ ne: sɔ mmokaa aseɛ nyemenenyemene ne, ɔne Lebanon.’

²⁶ Nakoso ɔnate ɛmɔ ti AWURADE fɛle me so yaa, na wandɛ me so. Na AWURADE sele me kyɛ, ‘Wayɛ yee! Nnɛkã sɔ dwirɛ ne kyire me ko!

²⁷ Fo kɔ Pisiga bokaa ne aso, ná toto wɔ nye nea eyia atɔleɛ, sorɔ ne ngwaen ne eyia afiteleɛ. Fa wɔ nye nea aseɛ ne yé, ofikyɛ asue Yɔɔdan ye de, ɛngɔpɛ ye ngɔhɔ ye si.

²⁸ Nakoso fa w’adwuma ne wura Yosua sa, kanyane ye ná hyɛ ye nguraen, ofikyɛ ye yeɛ okotua mmenia hemɔ noa maa bɛkɔpɛ asue ne ɔ, na ye yeɛ ɔkɔma bɛ sa kɔha aseɛ bɔ ekonwu ye ne ɔ.’

²⁹ Yiti yɛtenane bɔnza ne anu, wɔ Bete Peɔ ndendeneɛ so.