Deuteronomi 23 - AHYERƐLƐ KRONGRON

Nnɛma ɛhemɔ ba AWURADE badwa nu

¹ “Bienzua biala bɔ ye ndɔma abɔ anaa bapɛ ye bienzua so ne, nnɛmaa ɔba AWURADE badwa nu.

² “Ebiala bɔ bɛbɔle adwaman bɛwole ye ne, nnɛmaa ɔba AWURADE badwa nu. Ye boso ama bɔ ɔkwaadwu aworɛ ndoatoasoɛ bɔ ɔtɔ so buru po, nnɛma ebiala ba AWURADE badwa nu.

³ “Nnɛma Amonniɛ anaa Moaboniɛ biala ba AWURADE badwa nu. Bɛ boso ama bɔ ɔkwaadwu aworɛ ndoatoasoɛ bɔ ɔtɔ so buru po, nnɛma ebiala ba AWURADE badwa nu;

⁴ ofikyɛ mmerɛ bɔ né ɛmɔfi Misraim bɛ́ba nen, bamva aleɛ ne nzue bamma anyia ɛmɔ ate. Asa koso Beɔ awa Balaam, bɔ ofi Petore bɔ ɔwɔ Mesopotamia ne, bɛbɔle ye paa kyɛ ɔnoma wɔ.

⁵ Nakoso AWURADE wɔ Nyameɛ wandɛ Balaam so, na mmom AWURADE wɔ Nyameɛ kakyili ɛnomalɛ ne maa ɔyɛle saleɛ mane wɔ, ofikyɛ AWURADE wɔ Nyameɛ kuro wɔ dwirɛ.

⁶ Nnɛpena bɛ ne asomdwee, yeɛ nnɛpena bɛ paa, mmerɛ biala bɔ ɛte ase ɔ.

⁷ “Nnɛpɔ Edomniɛ, ofikyɛ ɔte eliɛma. Nnɛpɔ Misraimniɛ, ofikyɛ né ɛte ɛwɔfoɛ wɔ ye aseɛ so.

⁸ Ofi b’aworɛ ndoatoasoɛ bɔ ɔtɔ so nza ne aso de, bɛ bosofoɛ kora ba AWURADE badwa nu.

Bɛ nwo ni lilɛ wɔ asikyeleɛ ne anu

⁹ “Sɛ ɛne wɔ pɔfoɛ mɔ bɛkwaaho, ná ɛkyekye asikyeleɛ a, twe wɔ nwo fi nikyee biala bɔ ɔmma wɔ nwo nde nwo.

¹⁰ Sɛ bienzua bie wɔ wɔ nu bɔ ye nwo nde, ɔnate kyɛ ye nwo nzue wale kɔngɔen a, ye de ɔsɛ kyɛ ofite kɔ asikyeleɛ ne asi; nnɛmaa ɔba asikyeleɛ ne anu.

¹¹ Sɛ aleɛ baadwo a, ɔsɛ kyɛ ɔfa nzue bia; na sɛ eyia tɔ a, ye de ɔkora sá ba asikyeleɛ ne anu.

¹² “Pena nekaa bie wɔ asikyeleɛ ne asi dɔ bɔ ɛkɔhɔ bakaa so ɔ.

¹³ Fa bakaa boka w’akodeɛ ne aso, amaa sɛ ɛkɔ bakaa so wɔ asikyeleɛ ne asi dɔ a, afa afu kumaa, na sɛ eyie a, akata so.

¹⁴ Na ɔnate kyɛ AWURADE wɔ Nyameɛ natenate w’asikyeleɛ ne anu, kyɛ ɔbaale wɔ, ná ɔfa wɔ pɔfoɛ mɔ wura wɔ sa ne ati, ma w’asikyeleɛ ne anu yɛ krongron, ná wannwu nikyee tɛɛ biala wɔ wɔ nu, ná wanyakyi wɔ berɛ wangɔ.

Mmeraa ahoroɔ biemɔ

¹⁵ “Sɛ kanganiɛ bie nwati fi ye mene berɛ ba wɔ berɛ a, nnesa fa ye kɔma ye mene.

¹⁶ Maa ɔne wɔ bɛtena, wɔ wɔ berɛ, wɔ wɔ nguro nemɔ ko aso nekaa bɔ okuro kyɛ ɔkɔtena ɔ; nnɛhyɛ ye so.

¹⁷ “Nnɛma Yisrael brasua biala yɛ ye nwo asɔneyɛɛ so adwamanbɔlɛniɛ; yeɛ nnɛma Yisrael bienzua biala yɛ ye nwo asɔneyɛɛ so adwamanbɔlɛniɛ.

¹⁸ Brasua bɔ adwaman nya sikaa, anaakyɛ kyea (bienzua adwamanbɔlɛniɛ) bɔ adwaman nya sikaa a, nnɛfa sikaa ne ba AWURADE wɔ Nyameɛ awuro batua bɔhyɛ biala, ofikyɛ bɛ munyɔ bayɛ bɛ nwo akyiwadeɛ bama AWURADE wɔ Nyameɛ.

¹⁹ “Sɛ ɛfa nikyee fɛmo eliɛma Yisraelniɛ a, nnɛfa nzihoɛ si ye nwo: mekyire sikaa nwo nzihoɛ, aleɛ nwo nzihoɛ, anaa nikyee biala bɔ ɛfa fɛmo nwo nzihoɛ.

²⁰ Ɛfa fɛmo amanvraniɛ a, ye de, de ye nwo nzihoɛ. Nakoso ɛfa fɛmo eliɛma Yisraelniɛ de a, ye de, nnɛde ye nwo nzihoɛ, na ɔnate so AWURADE wɔ Nyameɛ koyira wɔ wɔ wɔ sa noa adwuma mukoraati nu, wɔ aseɛ bɔ ɛkwaafa tena so ne aso.

²¹ “Sɛ ɛhyɛ AWURADE wɔ Nyameɛ bɔ a, nnɛtwetwe wɔ bo ase wɔ ye tualɛ nu; ofikyɛ ɔyɛ sɛɛ ala a AWURADE wɔ Nyameɛ kobisa kofi wɔ berɛ, na ɔkɔkakyi wɔ so bɔne.

²² Nakoso sɛ anhyɛ bɔ biala de a, ye de ɔngɔkakyi wɔ so bɔne.

²³ Wɔ noa dwirɛ biala, nea kyɛ ekoli so ɔ, ofikyɛ wɔ noa bɔ ɛfa hyɛle AWURADE wɔ Nyameɛ bɔ ne, ebiala anhyɛ wɔ so.

²⁴ “Sɛ ɛkɔ ebiɛngo bobe boo nu a, ɛkora di ye mma ne somaa bɔ ekuro ɔ ma wɔ ko yi, nakoso nnɛfa bie gua wɔ kɛndɛen nu.

²⁵ Sɛ ɛkɔ ebiɛngo aburoo boo nu a, ɛkora fa wɔ sa pomba ye mma ne bie, nakoso nnɛfa dadeɛ koateɛ bu ebiɛngo aburoo ne.