Deuteronomi 22 - AHYERƐLƐ KRONGRON

¹ “Sɛ enwu kyɛ eliɛngo nandwie anaa boaen ate, ná wamini a, nnɛyakyi ye maa ɔkɔ, na mmom fa ye sá kɔma ye mene.

² Nekaa bɔ eliɛngo ne te ne, sɛ ɔne wɔ berɛ nu twe, anaakyɛ sɛ ɛnze kaka ne mene a, ye de fa kaka ne kɔ w’awuro. Maa ɔwɔ wɔ berɛ toonn kɔpem kyɛ eliɛngo ne kɔwa kɔɔpena ye ɔ; na odi kyɛ esa fa ye nikyee ma ye.

³ Eliɛngo afunum koso, yɔ ye sɔ ala; ye tena, anaa ye nikyee biala bɔ okomini ná ekonwu ye ne, sɔ ala yeɛ yɔ ye ɔ. Nnɛyakyi ye berɛ.

⁴ “Sɛ enwu kyɛ eliɛngo afunum anaa ye nandwie afi ase wɔ atunu a, nnɛyakyi ye berɛ; boka ye maa ɔpagya ye gyina berɛ.

⁵ “Nnɛma brasua fa bienzua nikyee wura, yeɛ nnɛma bienzua fa brasua tena kera; ofikyɛ ebiala bɔ ɔyɔ sɔ nningyein nen, wayɛ ye nwo akyiwadeɛ wama AWURADE.

⁶ “Sɛ ekofite anomaa saen so atunu, wɔ bakaa bie so anaa aseɛnwo, bɔ nnomaa mmaa anaa ngyiremvua wɔ nu, ná bɛ ni butu nnomaa mmaa anaa ngyiremvua ne aso a, nnɛkye bɛ ni ne boka ye mma ne aso.

⁷ Ye ye mma nemɔ, ná ma bɛ ni ne ɔhɔ, amaa ɔnate so anya ngoa tendenn, ná wayie wɔ yé.

⁸ “Sɛ esi sua foforɛ a, sua ne anwuro nekaa bɔ basamo ne, to ɛwaen fa ye nwo bra yia. Anyɔ ye sɔ, ná ebie fi so te tɔ a, mogya nwo foɛlilɛ kɔla wɔ sua ne aso.

⁹ “Nnɛdua nikye foforɛ bieku wɔ wɔ bobe boo nu. Ɛyɔ sɔ a, bekole nikyee bɔ alua ne mma, ɔne bobe mmaa ne amukoraa bekofi wɔ sa nu.

¹⁰ “Nnɛfa kɔnnua to nandwie ne afunum kɔme bɔ nu fa bɛ fundam aseɛ.

¹¹ “Nnɛkera ɛtena bɔ bafa boaen nwiaa ne gyese babɔ nu banwo ɔ.

¹² “Ɛtena bɔ ɛfa gurɔ wɔ nwo ne, nwo nikyee fa sosɔ ye ahinanan nemɔ aso.

Agyaa nu animguaseɛ

¹³ “Sɛ bienzua bie gya braa, ná ɔfa ye nwo ka ye, nakoso onguro ye ko,

¹⁴ ná ɔto ye soen, ná ogua ye nyunu ase kyɛ, ‘Ngyale sɔ braa he, nakoso mvale me nwo ngane ye nen, nikyee fee ngyire kyɛ ɔte ababunu bɔ onnwuni biaa le hɔ ɔ’ a,

¹⁵ ye de ɔsɛ kyɛ taluwa ne baba ne ye maame bɛfa nikyee bɔ odi adanzeɛ kyɛ taluwa ne te ababunu bekokyire kuro berɛ mbanyi wɔ pambim ne anu.

¹⁶ Taluwa ne baba ɔɔhã hyire mbanyi nemɔ kyɛ, ‘Mafa mma brasua mama biaa he agya, nakoso onguro ye ko.

¹⁷ Na afei de po, wato ye soen. Ɔnwa: Nikyee fee ngyire kyɛ ɛwa ne te ababunu bɔ onnwuni biaa le ɔ. Nakoso ɛhe te mma n’ababunuyɛlɛ nwo adanzeɛ.’ Na ɔsɛ kyɛ bɛtrɛ nnasoɛ ne anu wɔ kuro berɛ mbanyi nyunu.

¹⁸ Afei ɔsɛ kyɛ kuro berɛ mbanyi bɛkye biaa bɔ ogyale braa ne befi ye mbire;

¹⁹ ná bɛbɔ ye kerɛ ɛdwetɛ sekel ɛyaa ko bɛfa bɛma taluwa ne baba, ofikyɛ wato Yisrael ababunu bɔ onnwuni biaa le ɔ soen. Ɔkɔhɔ so kɔyɛ ɔye, na sɛ biaa ne te ase de a, ye de atee nne berɛ kyɛ biaa ne koyira ye ɔ.

²⁰ “Nakoso sɛ edwirɛ ne te nahorɛ, ná ɔda adi kyɛ saa taluwa ne wanwu biaa le a,

²¹ ye de ɔsɛ kyɛ bɛfa taluwa ne befite bɛbagyina ye baba awuro anoa nu, ma ye kuro berɛ mmienzua bɛboro ye nyɔboɛ beku ye, ofikyɛ wabɔ nyanzoen bra wɔ Yisrael, kyɛ wabɔ adwaman wɔ ɔse awuro ɔ. Yiti ɔsɛ kyɛ etu bɔne ne bo fi wɔ nu.

²² “Sɛ bɛkye bienzua bie kyɛ ɔne ebie aye bɛda a, odi kyɛ beku bɛ munyɔ: bienzua bɔ ɔne braa ne lale ne, yeɛ braa ne. Yiti ɔsɛ kyɛ etu bɔne ne bo fi Yisrael.

²³ “Sɛ babɔ taluwa ababunu bɔ onnwuni biaa le ɔ asiwa, ná sɛ bienzua bie nwu ye kuro nu, ná ɔne ye bɛda a,

²⁴ odi kyɛ ɛmɔfa bɛ munyɔ bɛba kuro berɛ pambim ne anu, ná ɛmɔboro bɛ nyɔboɛ beku bɛ. Ɛ́mɔhu braa ne, ofikyɛ né ɔwɔ kuro nu, nakoso wandeatea nu wamvrɛ mmenia; ɛ́mɔhu biaa ne koso, ofikyɛ wafa obiɛngo aye. Yiti ɔsɛ kyɛ etu bɔne ne bo fi wɔ nu.

²⁵ “Nakoso sɛ bienzua bie nwu taluwa bɔ babɔ ye asiwa wɔ eburo, ná bienzua ne kye ye ɔne ye bɛda a, ye de bienzua bɔ ɔne ye bɛlale ne ngome yeɛ ɔsɛ kyɛ beku ye ɔ.

²⁶ Taluwa ne de, nnɛyɔ ye hwee; taluwa ne ɔyyɔle bɔne biala bɔ ɔfata ewue ɔ, ofikyɛ, kyɛbɔ sona kɔ obiɛngo so koku ye ne, sɔ ala yeɛ sɔ dwirɛ he te ɔ.

²⁷ Ofikyɛ biaa ne nwuni taluwa bɔ babɔ ye asiwa ne wɔ eburo, na ɔwɔ nu kyɛ taluwa ne teateane nu de, nakoso né ebiala nne berɛ bɔ okole ye ɔ.

²⁸ “Sɛ bienzua bie nwu ababunu bɔ onnwuni biaa le ɔ, bɔ bennya bɛbbɔle ye asiwa, ná ɔkye ye ɔne ye bɛda, ná bɛkye bɛ a,

²⁹ ye de bienzua bɔ ɔne ababunu ne lale ne, ɔsɛ kyɛ otua ɛdwetɛ sekel aburannu ma ababunu ne baba, ná ogya ababunu ne. Atee nne berɛ kyɛ biaa ne yira taluwa ne wɔ mmerɛ biala bɔ biaa ne te ngoa nu ɔ, ofikyɛ wagua taluwa ne nyunu ase.

³⁰ “Nnɛma bienzua biala gya ɔse aye, ná wannwu ɔse mvealeɛ nu nningyein nwo.