Deuteronomi 2 - AHYERƐLƐ KRONGRON

¹ Afei yɛsale yɛ si yɛwale ɛserɛ so, wɔ Ɛpo Kɔkorɛ atee ne aso dɔ, kyɛbɔ AWURADE ha hyirele me ne. Na yɛhyinihyinini Sɛre bokaa ne anwo alaa ngyẽa pee.

² Afei AWURADE sele me kyɛ,

³ “Ɛmɔahyinihyini sɔ mmokaa aseɛ he anwo bahyɛ, yiti ɛ́mɔfa ɛmɔ nye behyire ye sorɔ dɔ.

⁴ Ná se maen ne kyɛ, ‘Ɛmɔ aliɛma mɔ Yisɔ bosofoɛ bɔ bɛte Sɛre ne, waha kãa né ɛmɔkwaapɛ nu wɔ b’aseɛ so. Bekosuro ɛmɔ, yiti ɛ́mɔnea ɛmɔ nwo yé,

⁵ ná ɛmɔ ne bɛ annya ngondii, ofikyɛ mengɔfa b’aseɛ ne agyirɛ ko po mengɔma ɛmɔ, ɔnate kyɛ mafa Sɛre mmokaa aseɛ ne mama Yisɔ kyɛ ɔ́fa.

⁶ Ɛmɔkɔfa sikaa bɛkɔtɔ aleɛ bɔ ɛmɔkoli ɔ bekofi bɛ berɛ; na nzue bɔ ɛmɔkɔno ɔ koso, ɛmɔkɔfa sikaa bɛkɔtɔ bekofi bɛ berɛ.

⁷ Ofikyɛ AWURADE wɔ Nyameɛ ayira wɔ wɔ wɔ sa noa adwuma mukoraati nu, na wanea wɔ so wɔ ɛserɛ piri ye aso natelɛ nu. Afoɛ aburanna ɛhe yeɛ AWURADE wɔ Nyameɛ agyina wɔ si bɔ anhia nikye fee ɔ.’

⁸ Yiti y’eliɛma mɔ Yisɔ bosofoɛ bɔ bɛte Sɛre ne, yɛɛpɛle nu bɛ berɛ. Yamva Araba atee bɔ ɔkɔ Elate ne Esion Gebɛre ne aso, na mmom yɛfale yɛ nye yɛhyirele Moabo ɛserɛ atee ne aso.

⁹ Na AWURADE sele me kyɛ, ‘Nnɛha Moabo, yeɛ nnɛfa koɛ kɔtoa ye, ofikyɛ mengɔfa ye aseɛ ne kaala po mengɔma wɔ kyɛ ɛfa, ɔnate kyɛ mafa Are mama Lɔto bosofoɛ kyɛ bɛfa.’

¹⁰ (Né berɛ yeɛ Emimfoɛ bɛte ɔ. Né Emimfoɛ bɛte maen pirikua, bɛsone, na bɛwoware kyɛ Anakefoɛ ne ala.

¹¹ Na kyɛbɔ né bebu Anakefoɛ kyɛ bɛte Refaimfoɛ nen, sɔ ala yeɛ né bebu Emimfoɛ ɔ, nakoso né Moabofoɛ frɛ bɛ Emimfoɛ.

¹² Daa ne de, né Horifoɛ yeɛ bɛte Sɛre ɔ, nakoso Yisɔ bosofoɛ tuli bɛ fili berɛ. Behuhuni bɛ, na bɛtenane b’aseɛ ne aso, kyɛbɔ Yisraelfoɛ yɔle ye wɔ aseɛ bɔ AWURADE fa mane bɛ kyɛ bɛfa ne aso ne.)

¹³ Na AWURADE sele kyɛ, ‘Afei ɛ́mɔdwɔso, ná ɛmɔɔpɛ Serede bɔnza ne.’ Yiti yɛɛpɛle Serede bɔnza ne.

¹⁴ Afoɛ aburasa ne mmɔtwɛ mumua yeɛ yɛfa yɛnatele toonn yɛfili Kadese Banea yɛɛpɛle Serede bɔnza ne ɔ; kɔpem kyɛ sɔ koɛhonɛfoɛ aworɛ ndoatoasoɛ ne amukoraati wuwuli fili asikyeleɛ ne anu ɔ, kyɛbɔ AWURADE tale bɛ nwo ndaen hane ne.

¹⁵ Nahorɛ nu, AWURADE tuli ye nye siele bɛ so, kyɛ ɔkɔma bɛ boso konua kofi asikyeleɛ ne anu, kɔpem kyɛ ohuhuni bɛ mukoraati ɔ.

¹⁶ “Koɛhonɛfoɛ ne amukoraati wuwuli ná bɛ boso yerale fili mmenia ne anu nen,

¹⁷ AWURADE sele me kyɛ,

¹⁸ ‘Ɛnɛ kyẽa ye, ɔsɛ kyɛ ɛkɔpɛ nu wɔ Are, wɔ Moabo ɛwɛen so;

¹⁹ na sɛ edwu Amonfoɛ ɛwɛen so a, nnɛha bɛ, yeɛ nnɛfa koɛ kɔtoa bɛ, ofikyɛ mengɔfa Amonfoɛ aseɛ ne kaala po mengɔma wɔ kyɛ ɛfa, ɔnate kyɛ mafa mama Lɔto bosofoɛ kyɛ bɛfa.’

²⁰ (Bebu sɔ aseɛ ne kyɛ Refaimfoɛ aseɛ. Daa ne, né Refaimfoɛ yeɛ bɛte berɛ ɔ, nakoso Amonfoɛ frɛ Refaimfoɛ Samsumin.

²¹ Ɔte maen pirikua, bɛsone, na bɛwoware kyɛ Anakefoɛ ne ala. Nakoso AWURADE huhuni bɛ fili Amonfoɛ nyunu. Amonfoɛ tuli bɛ fili berɛ, na bɛtenane b’aseɛ ne aso.

²² Sɔ ala yeɛ AWURADE yɔ mane Yisɔ bosofoɛ bɔ bɛte Sɛre ne ɔ. Ohuhuni Horifoɛ fili bɛ nyunu. Yisɔ bosofoɛ tuli bɛ fili berɛ, na batena b’aseɛ so toonn maa waadwu ɛnɛ.

²³ Na Awifoɛ koso bɔ né bɛtete namue nemɔ anu wɔ Gasa mbɔtam ne, Kafitorimfoɛ bɔ befi Kafito bɛwale ne huhuni bɛ, na bɛtenane b’aseɛ ne aso.)

²⁴ Na AWURADE sele kyɛ, ‘Ɛ́mɔdwɔso bɛ́toa ɛmɔ atee ne aso bɛɛpɛ asue Anɔn bɔnza ne. Tie, Hesebon hene Sihon bɔ ɔte Amoriniɛ ne, mafa ye ne ye aseɛ mawura wɔ sa. Fa koɛ toa ye, ná hyɛ ye bo kyɛ ɛkɔfa aseɛ ne ɔ.

²⁵ Ofi ɛnɛ bɔ ɔkɔ ɔ, ngɔma wɔ nwo suronyi ne esurolɛ piri kɔtɔ mmenia bɔ bɛwɔ ewiase amukoraati so. Na ebiala bɔ ɔkɔte wɔ nga nen, ɔnate wɔ ti ye nwo kɔwosowoso ye, na ahunundetelɛ kɔtɔ ye so.’

Yisrael di ɛhene Sihon so ngonim

²⁶ “Yiti nzomane ɛbɔfoɛ wɔ Kedemote ɛserɛ ne aso maa bɛfale asomdwee nwo ngraa bɛɛmane Hesebon hene Sihon kyɛ,

²⁷ ‘Ma me ate ma mbɛ nu wɔ w’aseɛ ne aso. Atee ne aso ala yeɛ ngɔfa ɔ, mengɔmakye ngɔfa famaa so anaa bɛen so.

²⁸ Aleɛ bɔ ngoli ne, yɛ ye atɔen ma me de sikaa, ná fa nzue bɔ ngɔno ɔ koso ma me de sikaa. Bɔ mepena ala ole kyɛ, wɔ de ma me ate maa mva ase mbɛ nu ngɔ,

²⁹ kyɛbɔ Yisɔ bosofoɛ bɔ bɛte Sɛre, ɔne Moabofoɛ bɔ bɛte Are yɔ mane me ne ala, kɔpem kyɛ ngɔpɛ asue Yɔɔdan ngɔhɔ aseɛ bɔ AWURADE yɛ Nyameɛ ɔ́fa ma yɛ ne aso ɔ.’

³⁰ Nakoso Hesebon hene Sihon wambene kyɛ yɛkɔfa ye aseɛ aso ɔ, ofikyɛ AWURADE wɔ Nyameɛ mane ye so yɛle se, maa obubuli mmakaa tuale ye so, amaa ɔnate so wafa ye wawura wɔ sa, kyɛbɔ kekesaala ye wayɔ ye.

³¹ Na AWURADE sele me kyɛ, ‘Tie, mahyɛ ye bo mafa Sihon ne ye aseɛ ne mawura wɔ sa; hyɛ ye bo kyɛ ɛkɔho kɔfa ye aseɛ ne ɔ.’

³² Afei Sihon wale yɛ so, ɔne ye lɔen amukoraati, kyɛ bɛ ne yɛ baaho koɛ wɔ Yahase.

³³ Na AWURADE yɛ Nyameɛ fale ye wurale yɛ sa, yɛhuhuni ye ne ye mma ne ye mmenia mukoraati.

³⁴ Sɔ mmerɛ ne, yɛho yɛfale ye nguro nemɔ amukoraati, yɛbɔle nguro nemɔ amukoraati bɔkɔɔ, yɛhuhuni mmienzua ne mmrasua ne ngwadaa amukoraati, na yanyakyi bɛ nu ko po.

³⁵ Nakoso nguro bɔ yɛlili bɛ so ngonim ne, nu nyɛmmoa ngome yeɛ yɛfa yɛyɛle yɛ koɛ nu nzesadeɛ ɔ, na yɛfene nu nningyein yɛfale.

³⁶ Fite Aroye bɔ ɔwɔ Anɔn bɔnza ne noa dɔ, ɔne kuro bɔ ɔwɔ bɔnza ne anu ne, bɔ ɔkwaadwu Gileade ne, kuro biala nne berɛ bɔ yangora yanni so ngonim ɔ. AWURADE yɛ Nyameɛ fale nikyee biala wurale yɛ sa.

³⁷ Nakoso Amonfoɛ aseɛ de, amva wɔ sa anga ye; yeɛ amva wɔ sa anga aseɛ bɔ ɔla Yabɔko bɔnza noa, ɔne mmokaa aseɛ ne aso nguro nemɔ, ɔne nekaa biala bɔ AWURADE yɛ Nyameɛ berale yɛ kyɛ nnɛmaa yɛkɔ ne.