Deuteronomi 18 - AHYERƐLƐ KRONGRON

Asɔfo mɔ ne Lewifoɛ kyɛfa

¹ “Lewifoɛ bɔ bɛte asɔfo ne, mekyire Lewi abusua kure ne amukoraa, ɔnzɛ kyɛ benya kyɛfa anaa agyapadeɛ biala wɔ Yisrael. See so afɔleɛ bɔ mmenia kɔbɔ kɔma AWURADE, ɔne nningyein bɔ bɛkɔfa kɔma ye ne yeɛ bekoli ɔ.

² Ɔnzɛ kyɛ benya agyapadeɛ bɔ b’eliɛma mɔ anya ye ne bie; AWURADE yeɛ ɔte b’agyapadeɛ ɔ, kyɛbɔ ɔhyɛle bɛ bɔ ne.

³ Asɔfo nemɔ kyɛfa bɔ bekonya bekofi mmenia bɔ bɛbɔ afɔleɛ ne berɛ ne, sɛ ɔte nandwie oo, anaa boaen oo, ɔsɛ kyɛ bɛfa ye waen ne, ye awogyee nyɔ ne, ɔne ye fure ne bɛma bɛ.

⁴ W’aburoo, wɔ nzaa ne wɔ ngoo bɔ ekoli moa konya ye ne, ɔne wɔ mmoaen nwo nwiaa bɔ ekoli moa kɔpepɛ ne, fa ma ɔsɔfo.

⁵ Ofikyɛ AWURADE wɔ Nyameɛ waneanea nu waye Lewi wafi w’abusua kure ne amukoraa nu, kyɛ ɔne ye bosofoɛ bégyina bɛ́yɔ ɔsɔfo adwuma wɔ AWURADE dumaa nu mmerɛ biala.

⁶ “Sɛ Lewiniɛ bie tu ye bo fi wɔ nguro nemɔ bie aso, nekaa bɔ ɔte wɔ Yisrael ne, ná mmerɛ biala bɔ okuro ne ɔba nekaa bɔ AWURADE kɔneanea nu kɔye kosie berɛ ne a,

⁷ ye de ɔkora yɔ ɔsɔfo adwuma wɔ AWURADE ye Nyameɛ dumaa nu, kyɛbɔ ye mmango Lewifoɛ begyina AWURADE nyunu berɛ bɛyɔ ɔsɔfo adwuma ne.

⁸ Ɔsɛ kyɛ onya ye kyɛfa pɛpɛɛpɛ odi, kyɛ asɔfo ngaa ne ala, ɔwɔ nu kyɛ wanya sikaa wafi ɔse agyapadeɛ bɔ bayɛ ye atɔen ne anu de.

Amaenmaensofoɛ akyiwadeɛ yɔleɛ

⁹ “Sɛ edwu aseɛ bɔ AWURADE wɔ Nyameɛ ɔ́fa ma wɔ ne aso a, nnɛsua kyɛ ɛkɔyɔ maen maen nemɔ b’akyiwadeɛ yɔleɛ ne bie.

¹⁰ Ɔnzɛ kyɛ benwu ebiala wɔ wɔ nu bɔ ɔfa ɔwa bienzua anaa brasua ɔbɔ afɔleɛ wɔ see nu ɔ, anaa bɔ odi ahɔen, anaa ngonyaayelɛniɛ, anaa bayifoɛ, anaa musueyelɛniɛ,

¹¹ anaa bɔ ɔkyekye obiɛngo, anaa bɔ ɔtwe ngɔndwema, anaa nzamangɔmhyɛlɛniɛ.

¹² Ofikyɛ ebiala bɔ ɔyɔ sɔ nningyein nen, wayɛ ye nwo akyiwadeɛ wama AWURADE. Na ɔnate sɔ akyiwadeɛ yɔleɛ nemɔ ati yeɛ AWURADE wɔ Nyameɛ ɔ́foa bɛ fi wɔ nyunu ɔ.

¹³ Di nahorɛ turoloo ma AWURADE wɔ Nyameɛ.

¹⁴ Maen hemɔ bɔ ɛkwaatu bɛ ne, bekyini ngonyaayelɛfoɛ ne ahɔmeɛ so, nakoso wɔ de, AWURADE wɔ Nyameɛ ɔmma wɔ ate kyɛ ɛyɔ sɔ bie.

Nyameɛ kɔsoma ngɔmhyɛlɛniɛ

¹⁵ AWURADE wɔ Nyameɛ kɔye ngɔmhyɛlɛniɛ bɔ ɔte kyɛ me kofi eliɛma nemɔ nu, kofi wɔ nu kɔma wɔ, na ye yeɛ ɔsɛ kyɛ ɛmɔtie ye ɔ.

¹⁶ Na ɛhe yeɛ ɛsrɛle AWURADE wɔ Nyameɛ wɔ Horebo bokaa ne anwo, wɔ nyianu kyẽa ne kyɛ, ‘Nnɛmaa mete AWURADE me Nyameɛ dwudwolɛ ko, yeɛ nnɛmaa menwu sɔ see totohyia ne ko, ná manwu.’

¹⁷ Na AWURADE buale me kyɛ, ‘Bɔ baha ne te nahorɛ.

¹⁸ Ngɔye ngɔmhyɛlɛniɛ bɔ ɔte kyɛ wɔ, bɔ ofi b’eliɛma nemɔ anu ngɔma bɛ. Ngɔfa me dwirɛ ngotua ngɔmhyɛlɛniɛ ne noa, na ɔkɔha bɔ ngɔhyɛ ye kyɛ ɔha ne amukoraati kohyire bɛ.

¹⁹ Na sona biala bɔ ondie me dwirɛ bɔ ngɔmhyɛlɛniɛ ne kɔha ye me dumaa nu nen, me bɔbɔ ngɔmaa okobu ye nwo ngondaa.

²⁰ Nakoso ngɔmhyɛlɛniɛ biala bɔ okodwudwo nyameɛ foforɛ biemɔ dumaa nu, anaa bɔ okoli ye bɔbɔ ye ti piri kɔfa me dumaa kɔha edwirɛ bɔ nnhyɛle ye kyɛ ɔhã nen, ɔsɛ kyɛ beku ye.

²¹ Ebiaa ekobisa wɔ nwo kyɛ, ‘Ɔkɔyɛ sɛɛ né yanwu edwirɛ bɔ nna AWURADE yeɛ ɔhane ɔ?’

²² Tie, sɛ ngɔmhyɛlɛniɛ bie dwudwo AWURADE dumaa nu, nakoso edwirɛ ne anzi anaa wamma nu a, né ɔte edwirɛ bɔ nna AWURADE yeɛ waha ɔ. Ngɔmhyɛlɛniɛ ne wabɔ ye bɔbɔ ye ti anu yeɛ waha ɔ, nnɛma ɛmɔsuro ye.