Deuteronomi 17 - AHYERƐLƐ KRONGRON

¹ “Nnɛfa nandwie bɔ wali nnɛen, anaa boaen bɔ wali nnɛen, anaakyɛ bɔ nikyee tɛɛ bie wɔ ye nwo ɔ bɔ afɔleɛ ma AWURADE wɔ Nyameɛ, ofikyɛ ɔte AWURADE wɔ Nyameɛ akyiwadeɛ.

² “Nguro bɔ AWURADE wɔ Nyameɛ ɔ́fa ma wɔ ne, sɛ benwu bienzua anaa brasua biala wɔ nu biala so, kyɛ ɔyɔ bɔne wɔ AWURADE wɔ Nyameɛ nyunu, obu AWURADE apam ne aso,

³ kyɛ waaso nyameɛ foforɛ biemɔ wakoto bɛ: kyɛ eyia oo, ɛsraen oo, anaa anwuro abɔdeɛ mɔ bɔ mabera ne oo,

⁴ ná sɛ bɛbɔ wɔ amaneɛ, anaakyɛ ɛte, ná sɛ ebisabisa tie nu yé, ná sɛ ɔte nahorɛ kyɛ babɔ sɔ musue ne wɔ Yisrael a,

⁵ ye de, fa sɔ bienzua anaa brasua bɔ wabɔ sɔ musue ne kɔ wɔ kuro ne tiwaa, ná boro ye nyɔboɛ ma owu.

⁶ Mmenia nyɔ anaa nza adanzeɛ so yeɛ ɔsɛ kyɛ begyina bebua sona ewue foɛ ɔ; na ɔnzɛ kyɛ begyina sona horɛ adanzeɛ so bebua sona ewue foɛ.

⁷ Adanzefoɛ nemɔ, ɔsɛ kyɛ bedi moa bɛboro sona bɔ babua ye ewue foɛ ne nyɔboɛ koraka, ná afei mmenia ne amukoraati baboro ye nyɔboɛ bie. Yiti ɔsɛ kyɛ etu bɔne ne bo fi wɔ nu.

⁸ “Sɛ edwirɛ ba wɔ gya so, bɔ ɔte aporowaasulɛ bɔ ɔfa awuelilɛ, manzoen, anaa epuralɛ nwo, wɔ wɔ nguro nemɔ anu, ná sɛ ye ndɛenbualɛ ne bo wɔ so a, ye de ka wɔ nwo kɔ nekaa bɔ AWURADE wɔ Nyameɛ kɔneanea nu kɔye kosie berɛ ne.

⁹ Lewifoɛ bɔ bɛte asɔfo ne, yeɛ ndɛenbualɛniɛ bɔ dibea wura ye sa sɔ mmerɛ nen, fa kɔto bɛ nyunu, na bekohyire wɔ kyɛbɔ esi bua edwirɛ ne ɔ.

¹⁰ Mmuayɛɛ bɔ bɛkɔfa bɛkɔma wɔ wɔ nekaa bɔ AWURADE wɔ Nyameɛ kɔneanea nu kɔye kosie berɛ ne, nea kyɛ ɛkɔfa kɔyɔ adwuma pɛpɛɛpɛ ɔ. Nea kyɛ ekoli bɔ bekohyire wɔ ne amukoraati so ɔ.

¹¹ Mmeraa bɔ bekohyire ye bo bekohyire wɔ ne, ɔne ndɛenbualɛ bɔ bɛkɔfa bɛkɔma wɔ ne, di so. Bɛ mmuayɛɛ bɔ bɛkɔfa bɛkɔma wɔ ne, nnɛdi ye nwo makyebu kɔ bɛen anaa famaa so.

¹² Na sɛ ebie yɛ anwomasoɛ, ná wandie ɔsɔfo bɔ baye ye kyɛ ɔ́yɔ ɔsɔfo adwuma wɔ berɛ ma AWURADE wɔ Nyameɛ ne, anaakyɛ ndɛenbualɛniɛ ne a, ɔsɛ kyɛ beku sɔ sona ne. Yiti ɔsɛ kyɛ etu bɔne ne bo fi Yisrael.

¹³ Mmenia ne amukoraati bɛkɔte ná basuro, na bɛngɔyɛ anwomasoɛ ko.

Ɛhenelilɛ nwo foɛtulɛ

¹⁴ “Sɛ edwu aseɛ bɔ AWURADE wɔ Nyameɛ ɔ́fa ma wɔ ne aso, wɔ sa ka ye, ná ɛtena so, ná afei ɛkã kyɛ, ‘Ngɔfa sona maa okoli me so hene, kyɛbɔ maen maen mukoraa bɔ bapɛ me nwo bayia ne bayɔ ne’ a,

¹⁵ ye de, sona bɔ AWURADE wɔ Nyameɛ kɔneanea nu kɔye ye ne, ye yeɛ maa oli wɔ so hene ɔ. Wɔ bɔbɔ eliɛma nemɔ anu bie yeɛ fa ye ma oli wɔ so hene ɔ. Amanvoraniɛ de, nna eliɛma ɔ, yiti nnɛfa ye maa odi wɔ so hene.

¹⁶ Nakoso sona bɔ okoli hene ne de, ɔnzɛ kyɛ ɔma ye mbɔngɔ mɔ sone pee, yeɛ ɔnzɛ kyɛ ɔma mmenia ne sá kɔ Misraim kyɛ ɔkwaapena mbɔngɔ pee, ofikyɛ AWURADE aha ahyire ɛmɔ kyɛ, ‘Ɔnzɛ kyɛ ɛmɔsa bɛ si bɛfa sɔ atee ne aso ko.’

¹⁷ Nnɛmaa ogyigya mmraa pee, ná ye wora amvi Nyameɛ. Nnɛmaa ɔsesa ɛdwetɛ ne sikaa kɔkorɛ pee bɔ so.

¹⁸ Na sɛ odi bia ne a, ɔ́nea kyɛ ɔkɔmaa bɛkɔhyerɛ mmeraa he bie bɛkɔma ye wɔ Lewifoɛ bɔ bɛte asɔfo ne nyunu ɔ.

¹⁹ Ɔsɛ kyɛ ɔfa to ye nwo, ná ɔkenga ye mmerɛ biala bɔ ɔte ngoa nu ɔ, amaa ɔnate so wasua kyɛ okosuro AWURADE ye Nyameɛ, ná wali mmeraa ne anu dwirɛ amukoraa ne ahyɛdeɛ hemɔ aso.

²⁰ Ɔba ye sɔ a, ɔngɔdwene kyɛ ɔte paa tra ye mmango Yisraelfoɛ, yeɛ ɔngɔhwe ye nwo ngofi mmeraa dwirɛ ne anwo ngɔhɔ bɛen anaa famaa so; amaa ɔnate so ye, yeɛ ye bosofoɛ bali hene bahyɛ wɔ Yisrael.