Deuteronomi 16 - AHYERƐLƐ KRONGRON

Abɔtra aluolue

¹ Di Abɔtra aluolue ne hyɛ AWURADE wɔ Nyameɛ animnyam wɔ bosome Abibo nu, ofikyɛ bosome Abibo nu yeɛ AWURADE wɔ Nyameɛ yele wɔ fili Misraim kɔngɔen ɔ.

² Abɔtra afɔleɛ ne, ku mmoaen ne nandwie ma AWURADE wɔ Nyameɛ, wɔ nekaa bɔ AWURADE wɔ Nyameɛ kɔneanea nu kɔye kosie berɛ kyɛ ɔ́ma ye dumaa da so ne.

³ Nnɛfa paanoo harewaa bɔ naen ne aso di. Fa paanoo kabrɛdi bɔ naen ne aso di ye ɛlɛsoo. Ɔte amaneɛnwunɛ paanoo, ofikyɛ ndɛndɛ so yeɛ etu fili Misraim aseɛ so ɔ; amaa ɔnate so mmerɛ biala bɔ ɛte ngoa nu ne, akaye kyẽa bɔ etu fili Misraim aseɛ so ɔ.

⁴ Ɛlɛsoo, ɔnzɛ kyɛ benwu mɔle harewaa wɔ w’aseɛ so nekaa biala; yeɛ naen bɔ ekohu ye kyẽa bɔ oli moa ne nɔsoa ne, nnɛma ebie ka ma aleɛ kye so.

⁵ Nguro bɔ AWURADE wɔ Nyameɛ ɔ́fa ma wɔ ne, nnɛbɔ Abɔtra afɔleɛ ne wɔ nu biala so.

⁶ Sana nekaa bɔ AWURADE wɔ Nyameɛ kɔneanea nu kɔye kosie berɛ kyɛ ɔ́ma ye dumaa da so ne. Berɛ angome yeɛ bɔ Abɔtra afɔleɛ ne ɔ, nɔsoa bɔ eyia kwaatɔ ne, bɔ ɔte mmerɛ bɔ etuli wɔ bo fili Misraim nen.

⁷ To naen ne, ná di ye wɔ nekaa bɔ AWURADE wɔ Nyameɛ kɔneanea nu kɔye kosie berɛ ne. Na aleɛ kye ngyerɛmɔ a, sá kɔ wɔ tena sua nu.

⁸ Di paanoo kabrɛdi toonn elesia, na kyẽa bɔ ɔtɔ so nzoo ne, ɔsɛ kyɛ ɔyɛ nyianu krongron hyɛ AWURADE wɔ Nyameɛ animnyam, nnɛyɔ adwuma biala.

Fieso aleɛ falɛ aluolue

⁹ “Ka dapɛn nzoo; hyɛ ye bo ka dapɛn nzoo ne fi kyẽa bɔ ɛkɔfa dadeɛ koateɛ kɔpɛ aburoo ɔ.

¹⁰ Afei di Dapɛn Dapɛn aluolue ne hyɛ AWURADE wɔ Nyameɛ animnyam. Nea kyɛbɔ AWURADE wɔ Nyameɛ asi ayira wɔ ɔ ná bɔ w’akyɛdeɛ afɔleɛ.

¹¹ Di ahurusi wɔ AWURADE wɔ Nyameɛ nyunu, ɛne wɔ mma mmienzua ne mmrasua, wɔ nganga mmienzua ne mmrasua, Lewifoɛ bɔ bɛte wɔ kuro, ɛwɔfoɛ mɔ, nyisiaafoɛ ne kunafoɛ bɔ bɛte wɔ kuro ɔ, wɔ nekaa bɔ AWURADE wɔ Nyameɛ kɔneanea nu kɔye kosie berɛ kyɛ ɔ́ma ye dumaa da so ne.

¹² Kaye kyɛ né ɛte kanga wɔ Misraim, ná di sɔ ahyɛdeɛ nemɔ aso nahorɛ nu.

Asese aluolue ne

¹³ Di Asese aluolue ne ɛlɛsoo, mmerɛ bɔ ɛkɔboro w’aburoo ná ekohwi wɔ nzaa ne.

¹⁴ Aluolue mmerɛ ne, di ahurusi, ɛne wɔ mma mmienzua ne mmrasua, wɔ nganga mmienzua ne mmrasua, Lewifoɛ, ɛwɔfoɛ mɔ, nyisiaafoɛ, ɔne kunafoɛ bɔ bɛte wɔ kuro ɔ.

¹⁵ Aluolue ne, di ye ɛlɛsoo fa hyɛ AWURADE wɔ Nyameɛ animnyam, wɔ nekaa bɔ AWURADE kɔneanea nu kɔye kosie berɛ ne; ofikyɛ AWURADE wɔ Nyameɛ koyira wɔ wɔ wɔ fieso nningyein ne wɔ sa noa adwuma mukoraati nu, na wɔ nye kɔgye paa.

¹⁶ “Afoɛ biala, ɔsɛ kyɛ wɔ mmienzua mukoraati ba AWURADE wɔ Nyameɛ nyunu pɛen nza, wɔ nekaa bɔ okohyire ne: wɔ Paanoo Kabrɛdi aluolue ne, Dapɛn Dapɛn aluolue ne, yeɛ Asese aluolue ne anu. Nnɛmaa bɛfa bɛ sa mbaen bɛba AWURADE nyunu.

¹⁷ Ma ebiala ɔfa bɔ ye sa kɔsõ so ɔ, kyɛbɔ AWURADE wɔ Nyameɛ wasi wayira wɔ ɔ.

Ndɛenbualɛ turoloo

¹⁸ “Wɔ nguro amukoraati bɔ AWURADE wɔ Nyameɛ ɔ́fa ma wɔ ne, neanea nu ná yeye ndɛenbualɛfoɛ ne mbanyi fi w’abusua kure nemɔ anu, na bɛ yeɛ bɛkɔfa ndɛen bɔ ɔtengyɛ bekobu maen ne ɔ.

¹⁹ Nnɛbua ndɛengyea, nnɛsisi ebie wɔ ndɛenbualɛ nu, yeɛ nnɛde fea-ase-ma, ofikyɛ fea-ase-ma ma nworɛniɛ bu ye nye gua ndɛen turoloo so, na ɔmaa mmenia bua bɛ bɔ bedi be ɔ ndɛengyea.

²⁰ Fa wɔ nye sie pɛpɛɛpɛyɛlɛ ngome so, na ɔnate so ekonya ngoa, ná atena aseɛ bɔ AWURADE wɔ Nyameɛ ɔ́fa ma wɔ ne aso.

²¹ “Nnɛdua bakaa biala fa kakyi bosoen Asera dosii wɔ AWURADE wɔ Nyameɛ afɔleɛ bokyea bɔ ekosi ne anwo;

²² yeɛ nnɛfa nyɔboɛ biala pena berɛ kyɛ ɔte bosoen atenaleɛ, bɛte nningyein bɔ AWURADE wɔ Nyameɛ kyi ɔ.