Deuteronomi 14 - AHYERƐLƐ KRONGRON

Amammerɛ tɛɛ

¹ Ɛmɔte AWURADE ɛmɔ Nyameɛ mma. Nnɛma ɛmɔtete ɛmɔ nwo ayire bɛma awufoɛ, yeɛ nnɛma ɛmɔpiapia ɛmɔ nwoma so bɛma awufoɛ.

² Ofikyɛ ɛte maen krongron ma AWURADE wɔ Nyameɛ, na AWURADE aneanea nu waye wɔ wafi aseɛ so mmenia mukoraati nu kyɛ ɛyɛ ye bɔbɔ ye maen.

Ngaka bɔ bɛ nwo te ne bɛ bɔ bɛ nwo nde

³ “Nnɛdi akyiwadeɛ biala.

⁴ Naen bɔ ɛmɔkɔhora bekoli hɔ ɛhe: nandwie, boaen, abɔngye,

⁵ dabɔɔ, ɛwanzane, ɛhoɛ, gyane, adowa, kɛtɛbɔɔ ne gyane.

⁶ Kaka biala bɔ ye gya ne anu apakye, bɔ nu apakye ndaa nyɔ, ná opu ye aleɛ sá pesa ne, ye de ɛmɔkora bedi.

⁷ Nakoso ngaka bɔ bepu b’aleɛ besa bɛpesa, anaa bɛ gya mbaboa ne anu apakye koraa ne, bɛ nu hemɔ de, nnɛma ɛmɔdi: afupɔngɔ, adango, yeɛ akrande. Ofikyɛ, ɔwɔ nu kyɛ bepu b’aleɛ besa bɛpesa de, nakoso bɛ gya mbaboa ne anu mbakye nyɔ. Bɛ nwo nde mma ɛmɔ.

⁸ Prako koso, ofikyɛ ye gya mbaboa ne anu apakye de, nakoso ombu ye aleɛ nza mbesa. Yiti ye nwo nde mma ɛmɔ. Nnɛma ɛmɔdi ye naen, yeɛ nnɛma ɛmɔka ye fuin.

⁹ “Nzue nu naen amukoraa, ɛmɔkora bedi ɛhemɔ: ebiala bɔ ye si ole ndɛtɛ ne ɛboen ne, ɛmɔkora bedi.

¹⁰ Nakoso ebiala bɔ ye si olle ndɛtɛ ne ɛboen ne de, nnɛma ɛmɔdi. Ye nwo nde mma ɛmɔ.

¹¹ “Anomaa biala bɔ ye nwo te ne, ɛmɔkora bedi.

¹² Nakoso ɛhemɔ de, nnɛma ɛmɔdi: kɔleɛ, ɛpɛtɛ, akorɔma bire,

¹³ senza, akompɛtɛ, akom mɔ nu biala;

¹⁴ adene ahoroɔ amukoraati;

¹⁵ soholi, kɔngɔen akorɔma, ɛpo so dabodabo, akorɔma, ɔne akorɔma ahoroɔ amukoraati;

¹⁶ patue mmaa mmaa, patue mbiri, asudabo,

¹⁷ ɛserɛ so patue, ɛpɛtɛ fufue, nandwinoma,

¹⁸ akyemvona katakyie, asunoma ahoroɔ, asuakwaa ne apena.

¹⁹ Ngaka mmaa mukoraati bɔ bele ndaa betu ne, bɛ nwo nde mma ɛmɔ; nnɛma ɛmɔdi.

²⁰ Nakoso nnomaa bɔ bɛ nwo te amukoraati de, ɛ́mɔli.

²¹ “Nnɛma ɛmɔdi kaka fuin biala. Ɛkɔhora kɔfa kɔma ɛwɔfoɛ bɔ ɔwɔ wɔ kuro maa okoli, anaakyɛ ɛkɔhora kɔyɛ ye atɔen kɔma ɛwɔfoɛ; ofikyɛ ɛte maen krongron ma AWURADE wɔ Nyameɛ. “Nnɛfa abɔngye ba oni nyɔfonesue gua ye nwo to.

Buru nu ngyɛmuɛ ko nwo mmeraa

²² “Afoɛnoa biala, fa wɔ fieso nningyein buru nu ngyɛmuɛ ko (ma AWURADE).

²³ W’aburoo, wɔ nzaa ne wɔ ngoo, yeɛ wɔ nandwie ne wɔ mmoaen bamuɛbaa nemɔ, so buru nu ngyɛmuɛ ko ne, di wɔ AWURADE wɔ Nyameɛ nyunu, wɔ nekaa bɔ okohyire kyɛ ɔ́ma ye dumaa da so ne; amaa ɔnate so asua kyɛ ekosuro AWURADE wɔ Nyameɛ daa.

²⁴ Nakoso sɛ AWURADE wɔ Nyameɛ yira wɔ, ná sɛ atee ne wale bɔ ɛngɔhora ngɔfa buru nu ngyɛmuɛ ko ne ngɔhɔ, ofikyɛ nekaa bɔ AWURADE wɔ Nyameɛ kɔye kosie berɛ kyɛ ɔ́ma ye dumaa da so ne, ɔne nekaa bɔ ɛwɔ ne anu twe a,

²⁵ ye de ma buru nu ngyɛmuɛ ko ne ɔyɛ sikaa nu. Fa sikaa ne wura wɔ nwo, ná kɔ nekaa bɔ AWURADE wɔ Nyameɛ kɔneanea nu kɔye kosie berɛ ne.

²⁶ Fa sikaa ne tɔ nikyee biala bɔ ekuro ɔ: nandwie, boaen, bobe nzaa, nzaa serɛ, anaa nikyee biala bɔ wɔ komvi wɔ so ɔ. Na ɛne w’awuro ama beli ye berɛ wɔ AWURADE wɔ Nyameɛ nyunu, ná ɛ́mɔli ahurusi.

²⁷ Lewifoɛ bɔ bɛte wɔ nguro nemɔ anu ne, nnɛbu wɔ nye gua bɛ so, ofikyɛ bɛ de belle kyɛfa anaa agyapadeɛ biala kyɛbɔ wɔ de anya ye ne.

²⁸ “Afoɛ nza biala ayieleɛ, fieso nningyein bɔ ekonya ye sɔ afoɛ ne anu ne, fa buru nu ngyɛmuɛ ko sie wɔ wɔ nguro nemɔ anu.

²⁹ Ofikyɛ Lewiniɛ (ye de, olle kyɛfa anaa agyapadeɛ biala kyɛbɔ wɔ de anya ye ne), yeɛ afei ɛwɔfoɛ, nyisiaafoɛ ne akunafoɛ bɔ bɛwɔ wɔ kuro ne anu ne, bɛkɔwa bekooli kɔma bɛ ko koyi; na ɔnate so AWURADE wɔ Nyameɛ koyira wɔ wɔ wɔ sa noa adwuma mukoraati bɔ ɛkɔyɔ ɔ nu.