Deuteronomi 13 - AHYERƐLƐ KRONGRON

¹ “Sɛ ngɔmhyɛlɛniɛ bie, anaa ebie bɔ ɔnate laleɛ so hyɛ ngɔm fite wɔ ɛmɔ nu, ná ɔka nzɛngyerɛnneɛ anaa anwanwadeɛ bie nwo dwirɛ kyire wɔ,

² ná sɛ nzɛngyerɛnneɛ ne anwanwadeɛ bɔ ɔka kyire wɔ ne ba nu, ná ɔka kyɛ, ‘Maa yɛɛli nyameɛ foforɛ biemɔ (bɔ ɛnze bɛ) si, ná yɛso bɛ’ a,

³ ye de nnɛtie sɔ ngɔmhyɛlɛniɛ anaa sɔ sona bɔ ɔnate laleɛ so hyɛ ngɔm ne dwirɛ. Ofikyɛ AWURADE ɛmɔ Nyameɛ óso ɛmɔ nea onwu ye kyɛ, aso ɛmɔ ahone mukoraati ne ɛmɔ kra mukoraati yeɛ ɛmɔfa bekuro AWURADE ɛmɔ Nyameɛ dwirɛ ne a.

⁴ AWURADE ɛmɔ Nyameɛ ngome yeɛ ɔsɛ kyɛ ɛmɔdi ye si ná ɛmɔsuro ye ɔ. Ye mmeraa dwirɛ yeɛ ɔsɛ kyɛ ɛmɔdi so ɔ, na ye dwirɛ yeɛ ɔsɛ kyɛ ɛmɔtie ɔ. Ye yeɛ ɔsɛ kyɛ ɛmɔso ye ná ɛmɔfa bɛ nwo bɛbɔ ye ɔ.

⁵ Nakoso sɔ ngɔmhyɛlɛniɛ anaa sɔ sona bɔ ɔnate laleɛ so hyɛ ngɔm ne de, ɛ́mɔhu ye, ofikyɛ wafa ye noa dwirɛ wabɔ mmenia asɔne wafi AWURADE wɔ Nyameɛ bɔ ɔyele ɛmɔ fili Misraim aseɛ so, ná olele wɔ fili ngoaasolɛ nu ne nwo. Na ɔtwetwe wɔ fi atee bɔ AWURADE wɔ Nyameɛ hyɛle wɔ kyɛ ɛfa so ne aso. Yiti ɔsɛ kyɛ etu bɔne ne bo fi wɔ nu.

⁶ “Na sɛ eliɛma bienzua, ɛse awa bienzua anaa eni awa bienzua, anaa ɛwa bienzua anaa brasua, anaa ɛye bɔ ɔla w’ahone nwo, anaa ebiɛngo bɔ ɛne ye bɛbɔ kyiremvua bɛtafe po lakalaka wɔ ahameɛ kyɛ, ‘Maa yɛɛso nyameɛ foforɛ biemɔ’ (bɔ wɔ anaa wɔ nana mɔ bɛnze bɛ),

⁷ mmenia bɔ bapɛ ɛmɔ nwo bayia ne bɛ mmosoen nemɔ nu biala, sɛ mmenia nemɔ pingye ɛmɔ oo, sɛ bembingye ɛmɔ oo, fite aseɛ ti kɔka ye ti,

⁸ nnɛpene so, nnɛtɛ ye so, nnɛnwu ye anwumvoin, nnɛmaa ɔfa ye nwo di, yeɛ nnɛbutubutu ye dwirɛ ne aso.

⁹ Na mmom ɔsɛ kyɛ eku ye. Wɔ yeɛ ɔsɛ kyɛ edi moa bɔ ye kyɛ eku ye ɔ, ná afei mmenia ne amukoraa bate bagua ye so.

¹⁰ Fa nyɔboɛ boro ye ku ye, ofikyɛ AWURADE wɔ Nyameɛ bɔ ɔyele wɔ fili Misraim aseɛ so, fili ngoaasolɛ nu ne, ahaa sɔ sona ne maa ɛtwe wɔ nwo fi ye nwo.

¹¹ Na Yisraelfoɛ amukoraati bɛkɔte, bekosuro, na bɛngɔyɔ amumuyɛɛ bɔ ɔte sɔaa ko wɔ ɛmɔ nu.

¹² “Nguro bɔ AWURADE wɔ Nyameɛ ɔ́fa ma wɔ kyɛ ɛtena so ne, sɛ ɛte ye kyɛ bɛ́keka bɛ́fa ko anwo kyɛ,

¹³ busuefoɛ biemɔ adwɔso wɔ ɛmɔ nu, na balakalaka kuro ne anu mmenia kyɛ, ‘Ɛ́mɔma yɛɛso nyameɛ foforɛ biemɔ’ (nyameɛ mɔ bɔ ɛmɔnze bɛ a),

¹⁴ ye de ɔsɛ kyɛ ɛneanea edwirɛ ne anu, ná ebisa nu yé paa nea. Na sɛ ɔte nahorɛ kyɛ babɔ sɔ musue ne wɔ ɛmɔ nu a,

¹⁵ ye de ɔsɛ kyɛ ɛfa ngrandɛ kuku kuro ne aso ama. Sɛkye kuro ne bɔkɔɔ, nu nningyein amukoraati, nu mmenia ne nu nyɛmmoa.

¹⁶ Koɛ nu nzesadeɛ bɔ ekonya ye kuro ne anu ne, boaboa ye mukoraati noa wɔ dwaaso, ná afei fa see yera kuro ne ɔne nu nzesadeɛ ne ma ɔyɛ afɔleɛ mumua yeralɛ ma AWURADE wɔ Nyameɛ. Na ɔkɔyɛ kurofoen, bɔ bɛngɔkyekye ye ko le ɔ.

¹⁷ Sɔ musue nningyein ne, nnɛfa bie sie, na ɔnate so AWURADE kɔye ye yaafɛlɛ piri ne kofi wɔ so. Okonwu wɔ anwumvoin, na ɔkɔlo wɔ maa ɛkɔta pee, kyɛbɔ ɔtale ndaen hyirele wɔ nana mɔ ne.

¹⁸ Nakoso, sana etie AWURADE wɔ Nyameɛ dwirɛ, edi ye mmeraa dwirɛ mukoraati bɔ méhyɛ méma wɔ ɛnɛ ne aso, ná ɛyɔ bɔ ɔtengyɛ wɔ AWURADE wɔ Nyameɛ nyunu koraka.