Deuteronomi 12 - AHYERƐLƐ KRONGRON

Bubu bosoen asɔneyɛɛ sua mɔ gua

¹ “Aseɛ bɔ AWURADE ɛmɔ nana mɔ Nyameɛ wafa wama ɛmɔ, kyɛ ɛ́mɔfa bɛ́yɛ ɛmɔ deɛ wɔ ɛmɔ asetena mukoraati nu ne, ahyɛdeɛ ne nhyehyɛleɛ hemɔ yeɛ ɔsɛ kyɛ ɛmɔdi so nahorɛ nu wɔ aseɛ ne aso ɔ.

² Maen maen bɔ ɛmɔkwaatu bɛ befi berɛ ne, nekaa biala bɔ bɛsɔne bɛ nyameɛ mɔ nen, kyɛ mmokaa mbiri so oo, mmaa mmaa so oo, anaa bakaa monɛ biala bo oo, odi kyɛ ɛmɔsɛkye berɛ bɔkɔɔ.

³ Ɛ́mɔdwiri b’afɔleɛ bokyea nemɔ bégua, ɛ́mɔbubu bɛ bonima nemɔ nu, ná ɛ́mɔfa see bɛ́yera bosoen Asera dosii nemɔ. Ɛ́mɔpepɛ amoen mɔ bɔ bafa bayɛ bɛ nyameɛ ne begua, ná ɛ́mɔkyikyi bɛ dumaa béfi porɛ ne anu berɛ.

⁴ Nnɛma ɛmɔfa sɔ atee ne aso bɛso AWURADE ɛmɔ Nyameɛ ne.

⁵ Na mmom ɔsɛ kyɛ ɛmɔpena aseɛ bɔ AWURADE ɛmɔ Nyameɛ kɔneanea nu kɔye kosie berɛ wɔ ɛmɔ abusua kure ne amukoraati nu, kyɛ ɔ́fa ye dumaa to so ná ɔtena berɛ ne, na berɛ yeɛ ɛmɔhɔ ɔ.

⁶ Berɛ yeɛ ɔsɛ kyɛ ɛmɔfa ɛhemɔ bɛkɔ ɔ: ɛmɔ naen yeralɛ afɔleɛ, ɛmɔ ngaka afɔleɛ, ɛmɔ nningyein mɔ buru nu ngyɛmuɛ ko, ɛmɔ ndoboa afɔleɛ, ɛmɔ aboadeɛ afɔleɛ, ɛmɔ akyɛdeɛ afɔleɛ, ɔne ɛmɔ nandwie ne mmoaen bamuɛbaa mɔ.

⁷ Ɛmɔ ne ɛmɔ awuro ama bekodidi berɛ wɔ AWURADE ɛmɔ Nyameɛ nyunu, na ɔnate ɛmɔ adwuma mukoraati bɔ AWURADE ɛmɔ Nyameɛ wayira ɛmɔ ye nwo ne ati, ɛmɔkoli ahurusi.

⁸ Nnɛma ɛmɔyɔ ye kyɛbɔ yɛ́yɔ ye wa ɛnɛ ye, bɔ ebiala yɔ ye kyɛbɔ okuro ne,

⁹ ofikyɛ nekaa bɔ ɛmɔkole bɛ nwome, ɔne agyapadeɛ bɔ AWURADE wɔ Nyameɛ ɔ́fa ma wɔ ne, ɛmɔnnya beddwuli berɛ.

¹⁰ Nakoso sɛ ɛmɔpɛ asue Yɔɔdan bɛkɔɔtena aseɛ bɔ AWURADE ɛmɔ Nyameɛ ɔ́fa ma ɛmɔ maa ɔyɛ ɛmɔ deɛ ne aso, ná ɔbɔ ɛmɔ nwo waen fi ɛmɔ pɔfoɛ bɔ bapɛ ɛmɔ nwo bayia ne amukoraati sa nu, maa ɔnate so ɛmɔtena berɛ asomdwee nu a,

¹¹ ye de nekaa bɔ AWURADE ɛmɔ Nyameɛ kɔneanea nu kɔye kosie berɛ kyɛ ɔ́ma ye dumaa da so nen, berɛ yeɛ ɛ́mɔfa nningyein bɔ méhyɛ ɛmɔ ne amukoraati bɛhɔ ɔ: ɛmɔ naen yeralɛ afɔleɛ ne ɛmɔ ngaka afɔleɛ, ɛmɔ nningyein mɔ buru nu ngyɛmuɛ ko, ɛmɔ ndoboa afɔleɛ, ɔne ɛmɔ aboadeɛ afɔleɛ paa mukoraati bɔ ɛmɔfa bɛhyɛ AWURADE bɔ ɔ.

¹² Na ɛmɔkoli ahurusi wɔ AWURADE ɛmɔ Nyameɛ nyunu, ɛmɔ ne ɛmɔ mma mmienzua ne mmrasua, ɛmɔ ngoaa ne afaneɛ mɔ, ɔne Lewifoɛ bɔ bɛte ɛmɔ kuro, ofikyɛ bɛ de belle kyɛfa anaa agyapadeɛ biala kyɛbɔ ɛmɔ de ɛmɔanya ye ne.

Nekaa bɔ ɛ́mɔbɔ afɔleɛ ɔ

¹³ Nea yé né ammɔ wɔ naen yeralɛ afɔleɛ wɔ nekaa biala bɔ wɔ nye kɔpɛ so ɔ,

¹⁴ sana w’abusua kure nemɔ ko anu nekaa ko bɔ AWURADE kɔneanea nu kɔye kosie berɛ ne. Berɛ yeɛ bɔ wɔ naen yeralɛ afɔleɛ ɔ, na berɛ yeɛ di ahyɛdeɛ bɔ méhyɛ méma wɔ ne aso ɔ.

¹⁵ “Nakoso mmerɛ biala bɔ ekuro ne, ɛkɔhora kohũ naen koli wɔ wɔ kuro ne amukoraati nu, kyɛbɔ AWURADE wɔ Nyameɛ wasi wayira wɔ ɔ. Sona bɔ ye nwo nde oo, bɔ ye nwo te oo, ɔkora di bie, kyɛbɔ ɛmɔdi ɛwanzane ne dabɔɔ nen.

¹⁶ Nakoso ye mogya ne ngome yeɛ nnɛma ɛmɔdi ɔ; hwie gua aseɛnwo kyɛ nzue.

¹⁷ Nnɛdi sɔ nningyein hemɔ wɔ wɔ nguro nemɔ anu: w’aburoo buru nu ngyɛmuɛ ko, wɔ nzaa buru nu ngyɛmuɛ ko, yeɛ wɔ ngoo buru nu ngyɛmuɛ ko, anaa wɔ nandwie ne wɔ mmoaen bamuɛbaa mɔ, anaa w’aboadeɛ afɔleɛ biala, w’akyɛdeɛ afɔleɛ, anaa wɔ ndoboa.

¹⁸ Na mmom, di ye AWURADE wɔ Nyameɛ nyunu, nekaa bɔ AWURADE wɔ Nyameɛ kɔneanea nu kɔye kosie berɛ ne: ɛne wɔ mma mmienzua ne mmrasua, wɔ ngoaa ne w’afaneɛ mɔ, ɔne Lewifoɛ bɔ bɛte wɔ kuro ɔ. Na ɔsɛ kyɛ edi ahurusi wɔ AWURADE wɔ Nyameɛ nyunu wɔ w’adwuma biala bɔ ɛkɔyɔ ɔ nu.

¹⁹ Na mmerɛ biala bɔ ɛte w’aseɛ ne aso de, nea yé né ammu wɔ nye angua Lewiniɛ so.

²⁰ “Na sɛ AWURADE wɔ Nyameɛ ma wɔ maen ne trɛ, kyɛbɔ wahyɛ wɔ bɔ ne, ná ɛkã kyɛ, “ ‘Ngoli naen’ a, ɔnate kyɛ wɔ komvi wɔ naen so ne ati, ye de ɛkora di naen mmerɛ biala bɔ ekuro ɔ.

²¹ Nekaa bɔ AWURADE wɔ Nyameɛ kɔye kosie berɛ kɔfa ye dumaa kɔto so ne, sɛ ɔne nekaa bɔ ɛte ne anu twe a, ye de ɛkɔhora kohũ wɔ nandwie anaa wɔ mmoaen bɔ AWURADE afa ama wɔ ne anu bie, kyɛbɔ mahyɛ wɔ ne, na di naen ne wɔ wɔ kuro ne anu mmerɛ biala bɔ ekuro ɔ.

²² Na kyɛbɔ bedi ɛwanzane anaa dabɔɔ nen, sɔ ala yeɛ di naen ne ɔ. Sona bɔ ye nwo nde oo, bɔ ye nwo te oo, ɔkora di bie.

²³ Nakoso nea yé né anni ye mogya ne, ofikyɛ mogya ne te ngoa, na ɔnzɛ kyɛ edi ngoa ne fra naen ne.

²⁴ Nnɛdi mogya ne. Hwie gua aseɛnwo kyɛ nzue.

²⁵ Nnɛdi mogya ne, amaa ɔnate so wayie wɔ ne wɔ si ama yé; ofikyɛ ɛyɔ sɔ a, yeɛ né ɛ́yɔ bɔ ɔtengyɛ wɔ AWURADE nyunu ɔ.

²⁶ Nakoso wɔ ndoboa krongron bɔ ɔsɛ kyɛ ɛfa bɔ afɔleɛ ne, ɔne w’aboadeɛ afɔleɛ ne de, fa kɔ nekaa bɔ AWURADE kɔneanea nu kɔye kosie berɛ ne.

²⁷ Fa naen ne ne mogya ne bɔ wɔ naen yeralɛ afɔleɛ wɔ AWURADE wɔ Nyameɛ afɔleɛ bokyea ne aso. W’afɔleɛ ngaa nemɔ, hwie bɛ mogya ne gua AWURADE wɔ Nyameɛ afɔleɛ bokyea ne ngyɛnu, nakoso naen ne de, di.

²⁸ Nea kyɛ ekoli edwirɛ bɔ méhyɛ wɔ ne aso ɔ, amaa ɔnate so wayie wɔ ne wɔ si ama mɔ yé afebɔɔ; ofikyɛ ɛyɔ sɔ a, yeɛ né ɛ́yɔ bɔ ɔtengyɛ wɔ AWURADE wɔ Nyameɛ nyunu ɔ.

Bosoensolɛ nwo kɔkɔbɔlɛ

²⁹ “Maen maen mɔ bɔ ɛkwaatu bɛ fi berɛ ne, sɛ AWURADE wɔ Nyameɛ maa sɔ maen nemɔ bɛbɔ, ná etu bɛ fi berɛ, ná ɛfa aseɛ ne yɛ wɔ deɛ tena so a,

³⁰ nea wɔ nwo yé ná sɛ AWURADE sɛkye bɛ fi wɔ nyunu yie a, amma nikyee fee wandwetwe wɔ ma angɔanni bɛ si, ná ammisa bɛ mmosoen nemɔ nwo dwirɛ kyɛ, ‘Atee beni yeɛ maen hemɔ bɛfa so bɛso bɛ nyameɛ mɔ ɔ? Me koso mepena kyɛ meyɔ sɔ bie.’

³¹ Nnɛfa sɔ atee ne aso sɔne AWURADE wɔ Nyameɛ, ofikyɛ musue nningyein mukoraati bɔ ɔte AWURADE akyiwadeɛ ne yeɛ bayɔ bama bɛ nyameɛ nemɔ ɔ. Bɛyera bɛ mma mmienzua ne mmrasua po wɔ see nu bɛfa bɛbɔ afɔleɛ bɛma bɛ nyameɛ nemɔ.

³² “Bɔ méhyehyɛ méma ɛmɔ biala, ɛ́mɔnea yé kyɛ ɛmɔkoli so ɔ. Nnɛfa bie boka so, yeɛ nnɛye bie fi nu.