Deuteronomi 11 - AHYERƐLƐ KRONGRON

Nyameɛ te piri

¹ “Yiti ɔsɛ kyɛ ekuro AWURADE wɔ Nyameɛ dwirɛ, ná edi ye dwirɛ, ye ahyɛdeɛ, ye nhyehyɛleɛ ne ye mmeraa dwirɛ so mmerɛ biala.

² Na ɔsɛ kyɛ ɛmɔkaye ɛnɛ kyẽa ye, kyɛ nna ɛmɔ mma mɔ (bɔ bɛnze, anaa bɔ bɛ nye annwu kyɛbɔ AWURADE ɛmɔ Nyameɛ si twe sona so), na mmom ɛmɔ yeɛ ɔsɛ kyɛ ɛmɔkaye kyɛbɔ Nyameɛ si te piri ɔ, ɔne ye tumi piri ne tumi asaa ne,

³ ye nzɛngyerɛnneɛ ne ye yɔleɛ bɔ ɔyɔle ye wɔ Misraim hene Faro so, ɔne ye aseɛ ne aso amukoraa;

⁴ ɔne bɔ ɔfa yɔle Misraim asraafoɛ, ɔne bɛ mbɔngɔ mɔ ne bɛ teaseɛnam mɔ, kyɛbɔ ɔmane Ɛpo Kɔkorɛ yi fale bɛ, wɔ mmerɛ bɔ né bɛ́po ɛmɔ so ne, ɔne kyɛbɔ AWURADE ahũhũ bɛ maa waadwu ɛnɛ ye;

⁵ ɔne bɔ ɔyɔ mane ɛmɔ wɔ ɛserɛ ne aso kɔpem kyɛ ɛmɔwale wa ɔ;

⁶ ɔne bɔ ɔfa yɔle Ruben bosoniɛ Eliabo ye mma Datan ne Abiram, kyɛbɔ aseɛ bukyele ye noa nu memene bɛ, bɛ ne b’abusuafoɛ, bɛ tena sua mɔ, ɔne bɛ somvoɛ ne nyɛmmoa bɔ beli bɛ si ɔ, bɔ Yisraelfoɛ amukoraa bɛ nye tua ɔ.

⁷ Ofikyɛ ɛmɔ bɔbɔ bɛ nye nwuni nningyein mbiri mbiri bɔ AWURADE yɔle ɔ.

Bɔhyɛ aseɛ ne nwo saleɛ

⁸ “Yiti mmeraa dwirɛ bɔ méhyɛ méma ɛmɔ ɛnɛ ye, ɛ́mɔli ye mukoraati so, amaa ɔnate so ɛmɔanya anwoserɛ baafa aseɛ bɔ ɛmɔkwaapɛ asue Yɔɔdan bɛfa ne,

⁹ amaa amɔanya ngoa tendenn wɔ aseɛ bɔ AWURADE fa hyɛle ɛmɔ nana mɔ bɔ, kyɛ ɔkɔfa kɔma bɛ ne bɛ bosofoɛ ne aso, aseɛ bɔ nyɔfonesue ne woɛ tengyɛ wɔ so ne.

¹⁰ Ofikyɛ aseɛ bɔ ɛkwaafa ne de, ɔtte kyɛ Misraim aseɛ bɔ efili so wale ne, nekaa bɔ eluale nningyein, bɔ ɛyɔle adwuma serɛ fa guaguale so nzue ne, kyɛbɔ sona guagua pɛtra so nzue ne.

¹¹ Nakoso aseɛ bɔ ɛmɔkwaapɛ asue ne bɛkɔɔfa ne de, ɔte mmokaa ne bɔnza aseɛ, bɔ nyameɛso nzue tɔ gua so ɔ.

¹² Ɔte aseɛ bɔ AWURADE wɔ Nyameɛ nea so ɔ, na AWURADE wɔ Nyameɛ nye wɔ so mmerɛ biala, fite afoɛ bohyɛlɛ kodwu ye ayieleɛ.

¹³ “Na sɛ ɛmɔtie me mmeraa dwirɛ bɔ méhyɛ méma ɛmɔ ɛnɛ ye, ná ɛmɔkuro AWURADE ɛmɔ Nyameɛ dwirɛ, ná ɛmɔfa ɛmɔ ahone mukoraati ne ɛmɔ kra mukoraati bɛso ye a,

¹⁴ ye de ɔkɔma esue kɔtɔ kogua ɛmɔ aseɛ so mmerɛ bɔ ɔsɛ ɔ nu, asuso ne bokyisue, na ɔnate so ekonya aburoo ne nzaa ne ngoo.

¹⁵ Ɔkɔma ɛserɛ kofifi w’aseɛ so kɔma wɔ nyɛmmoa, na ekodidi kɔma wɔ ko koyi.

¹⁶ Ɛ́mɔnea yé ná bannakalaka ɛmɔ, ná ɛmɔanni makyebu bangɔanzo nyameɛ foforɛ biemɔ, ná ɛmɔangoto bɛ;

¹⁷ ofikyɛ ɔba ye sɔ a, AWURADE kɔfɛ ɛmɔ so yaa piri paa, ná ɔkɔto nyameɛso nu bɔ esue ngɔtɔ ɔ, na aseɛ ngɔma aleɛ biala ko, na ɛmɔkowuwu ndɛndɛ so bekofi aseɛ paa bɔ AWURADE ɔ́fa ma ɛmɔ ne aso.

¹⁸ “Yiti ɛ́mɔfa me dwirɛ hemɔ besie ɛmɔ ahone ne ɛmɔ ti anu, ná ɛ́mɔkyekye bɛ́bɔ ɛmɔ sa ma ɔyɛ sɛngyerɛnneɛ, ná ɛ́mɔfa bɛ́bɔ ɛmɔ nwoma so ma ɔyɛ ngayeɛ.

¹⁹ Ɛ́mɔfa béhyirehyire ɛmɔ mma mɔ. Na sɛ ɛte w’awuro oo, ɛnate atee so oo, ɛkɔ nnaa nu oo, anaakyɛ edwɔso oo, di ye nwo ngɔmɔ.

²⁰ Kyerɛ gua w’awuro aponnwaa nwo ne wɔ pambim mɔ nwo,

²¹ amaa ɔnate so wɔ ngoa, ɔne wɔ mma mɔ ngoa ayɛ tendenn wɔ aseɛ bɔ AWURADE tale ye nwo ndaen hyirele wɔ nana mɔ kyɛ ɔkɔfa kɔma bɛ ne aso, kyɛbɔ anwuro kata aseɛ ye aso ye de.

²² Ofikyɛ mmeraa dwirɛ amukoraati bɔ méhyɛ méma ɛmɔ ye, sɛ ɛmɔdi so yé, ná ɛmɔkuro AWURADE ɛmɔ Nyameɛ dwirɛ, ná ɛmɔnate ye atee amukoraati so, ná ɛmɔfa bɛ nwo bɛbɔ ye a,

²³ ye de AWURADE kɔfoa maen maen hemɔ amukoraati kofi ɛmɔ nyunu, na ɛmɔkɔɔfa maen maen bɔ bɛ mbiri ne b’anwoserɛ tra ɛmɔ ɔ.

²⁴ Nekaa biala bɔ ɛmɔ gya kotia ne, ɔkɔyɛ ɛmɔ deɛ: ɛmɔ aseɛ kɔtrɛ kofi ɛserɛ so kɔɔhã Lebanon, fite asue Yufreti kɔɔhã eyia atɔleɛ ɛpo ne.

²⁵ Kuro sona biala ngɔhora ngogyina ɛmɔ nyunu. Na kyɛbɔ AWURADE ɛmɔ Nyameɛ ahyɛ ɛmɔ bɔ ne, ɔkɔma ɛmɔ nwo suronyi ne ɛmɔ nwo surolɛ piri kɔtɔ aseɛ mukoraati bɔ ɛmɔ gya kotia so ɔ so.

²⁶ “Ɛ́mɔtie! Ɛnɛ kyẽa ye, mafa saleɛ ne musue masie ɛmɔ nyunu:

²⁷ Sɛ ɛmɔdi AWURADE ɛmɔ Nyameɛ mmeraa dwirɛ bɔ méhyɛ méma ɛmɔ ɛnɛ ye aso a, ye de ɛmɔkonya saleɛ;

²⁸ nakoso sɛ ɛmɔanni AWURADE ɛmɔ Nyameɛ mmeraa dwirɛ so, ná mmom ɛmɔkwati ahyɛdeɛ bɔ méhyɛ méma ɛmɔ ɛnɛ ye bekodi nyameɛ foforɛ biemɔ bɔ ɛmɔnze bɛ si de a, ye de ɔkɔyɛ musue kɔma ɛmɔ.

²⁹ Na sɛ AWURADE wɔ Nyameɛ fa wɔ kodwu aseɛ bɔ ɛkwaafa ne aso a, bɔ saleɛ nwo dawure wɔ Gerisim bokaa ne aso, ná bɔ musue koso nwo dawure wɔ Ebal bokaa ne aso.

³⁰ (Sɔ bokaa nemɔ wɔ asue Yɔɔdan si, wɔ eyia atɔleɛ atee bue nu dɔ, wɔ Kanaanfoɛ bɔ bɛte Araba nen b’aseɛ so, Gilgal ndendeneɛ so, bɔ opingye More eluii bakaa nen).

³¹ Ɛmɔkwaapɛ asue Yɔɔdan bɛkɔfa aseɛ bɔ AWURADE ɛmɔ Nyameɛ ɔ́fa ma ɛmɔ ne. Na sɛ ɛmɔkɔfa bɛtena so a,

³² ɛ́mɔnea kyɛ ahyɛdeɛ ne nhyehyɛleɛ mukoraati bɔ ɛnɛ mafa mato ɛmɔ nyunu ne ɛmɔkoli so ɔ.