Daniel 9 - AHYERƐLƐ KRONGRON

Daniel bɔ mbaeɛ ma ye maen

¹ Ahasuro awa Dario bɔ ye si fi Medese, bɔ olili Kaldeafoɛ maen ne aso hene ne, ye ahennie afoɛ bɔ oli moa ne,

² ye ahennie afoɛ bɔ oli moa ne anu, me, Daniel, mbɛnzɛmbɛnzɛle ngrataa nemɔ anu nwuni afoɛ aburasoo bɔ odi kyɛ ɔpɛ nu koraka né Yerusalem abɔ, bɔ ɔte AWURADE dwirɛ bɔ ɔlale ye ali hyirele ngɔmhyɛlɛniɛ Yeremia ne.

³ Yeɛ mva nziele me nye so ndwe mbingyele AWURADE Nyameɛ, kyɛ ngoli mmuadaa, ngɔhera ɛsɛen tena, ngotu nzoen ngogua me nwo ngɔfa me mbaeɛ ne sufrɛ ngɔto ye nyunu.

⁴ Mmɔle mbaeɛ ngyirele AWURADE me Nyameɛ, na nne ndole nu ngane ye pefee kyɛ, “O AWURADE, Nyameɛ piri bɔ ye nwo yɛ suro, bɔ odi apam ne ɔdɔ bɔ onni ngasi ɔ so ma bɛ bɔ bekuro ye dwirɛ ɔne bɛ bɔ bedi ye mmeraa dwirɛ so ɔ;

⁵ yayɔ bɔne, yayɔ amumuyɛɛ, yayɔ bɔ bɛnyɔ ɔ, yayɛ lɔen, kyɛ yali wɔ mmeraa dwirɛ ne wɔ nhyehyɛleɛ ne anwo makyebu ɔ.

⁶ Wɔ somvoɛ ngɔmhyɛlɛfoɛ bɔ begyinane wɔ dumaa nu bedwudwo behyirele yɛ ahemvo mɔ, yɛ atitirefoɛ, yɛ nana mɔ ne aseɛ ne aso mmenia amukoraa ne, yandie bɛ.

⁷ O AWURADE, wɔ yeɛ tenenee te wɔ deɛ; nakoso yɛ de, animguaseɛ yeɛ ɔte yɛ deɛ maa waadwu ɛnɛ ɔ: Yudafoɛ, Yerusalemfoɛ ne Yisraelfoɛ amukoraa bɔ bepingye wa ne bɛ bɔ bɛwɔ nziɛ nziɛ, wɔ aseɛ amukoraa bɔ atu bɛ aagua so ɔ, ɔnate nahorɛ bɔ banni bamma wɔ ne ati ɔ.

⁸ O AWURADE, yɛ ne yɛ hene mɔ, yɛ mbanyi mɔ ne yɛ nana mɔ, animguaseɛ te yɛ deɛ, ofikyɛ yayɔ bɔne yatia wɔ.

⁹ O AWURADE yɛ Nyameɛ, yayɛ wɔ nwo lɔen, nakoso wɔ yeɛ ɛse anwumvoin ná ɛfa bɔne kyɛ ɔ.

¹⁰ Yandie AWURADE yɛ Nyameɛ dwirɛ, ofikyɛ ye mmeraa bɔ ɔnate ye somvoɛ ngɔmhyɛlɛfoɛ mɔ so hyehyɛ mane yɛ ne, yanni so.

¹¹ Amba, Yisrael amukoraa abu wɔ mmeraa ne aso, bali makyebu bɔ bendie wɔ dwirɛ ɔ. Na ɛnomalɛ ne ndaen bɔ bahyerɛ ye wɔ Nyameɛ somvoɛ Mose mmeraa ne anu ne, wawa yɛ so, ofikyɛ yayɔ bɔne yatia ye.

¹² Na ye dwirɛ bɔ ɔhane kyɛ ɔkɔmaa ɔkɔwa yɛ ne yɛ maenbulɛfoɛ bɔ bɛlale yɛ noa ne aso, kyɛ ɔkɔprapra amaneɛ kandinga kogua yɛ so ne, wamaa wawa nu; ofikyɛ bɔ wamaa wato Yerusalem ne, ebie ɔwwale wɔ ewiase nekaa biala le.

¹³ Kyɛbɔ bahyerɛ ye wɔ Mose mmeraa ne anu ne, musue he amukoraa atoto yɛ, nakoso yanzrɛ AWURADE yɛ Nyameɛ kyɛ onwu yɛ anwumvoin. Yɛhhwene yɛ nwo yɛffili yɛ amumuyɛɛ nwo, yeɛ yɛyyɛle yɛ adwene kyɛ yɛkotie wɔ nahorɛ ne ɔ.

¹⁴ Ye sɔ ne ati, AWURADE asiesie amaneɛ, na wamaa wato yɛ; ofikyɛ AWURADE yɛ Nyameɛ ne, ɔtengyɛ wɔ bɔ ɔyɔ ɔ amukoraa nu; nakoso yɛ de, yandie ye dwirɛ.

¹⁵ Na afei, AWURADE yɛ Nyameɛ bɔ ɛnate wɔ tumi piri so ɛyele wɔ maen fili Misraim aseɛ so wale, bɔ ale dumaa maa waadwu ɛnɛ ɔ, yayɔ bɔne, yayɔ bɔ bɛnyɔ ɔ.

¹⁶ O AWURADE, w’adaworoma, kyɛbɔ wɔ tenenee amukoraa te ne, gyina so ná yakyi ɛyaafɛlɛ ne w’ahone bɔ wahu wɔ wɔ kuro Yerusalem so, wɔ wɔ bokaa krongron ne aso ne. Na ɔnate yɛ bɔne ne yɛ nana mɔ b’amumuyɛɛ ti, Yerusalem ne wɔ maen bakakyi ngorohoɛ dwirɛ bama bɛ bɔ bapɛ yɛ nwo bayia ne amukoraa.

¹⁷ Yiti yɛ Nyameɛ, w’adaworoma, tie wɔ somvoɛ mbaeɛ ne ye sufrɛ; na ɔnate wɔ, AWURADE wɔ ti, ma wɔ ɛlolɛ ne ɔbra nekaa krongron bɔ wakakyi dandue ne aso.

¹⁸ O me Nyameɛ, yɛ asoɛ tie, bukye wɔ nye ná nea amaneɛ bɔ wato yɛ ne kuro bɔ wɔ dumaa la so ne; ofikyɛ nna yɛ tenenee so yeɛ yɛgyi bɔ yɛfa yɛ sufrɛ yɛto wɔ nyunu ɔ, na mmom w’anwumvoinnwunɛ piri ne ati ɔ.

¹⁹ O AWURADE, tie; O AWURADE, fa yɛ bɔne kyɛ yɛ; O AWURADE, tie yɛ ná boka yɛ; nnɛkyɛ, o me Nyameɛ, ɔnate wɔ bɔbɔ wɔ ti, ofikyɛ wɔ dumaa yeɛ ɔla wɔ kuro ne ne wɔ maen ne aso ɔ.”

Gabriel kyirekyire nu kyire Daniel

²⁰ Na me noa wɔ so bɔ medwudwo, bɔ mebɔ mbaeɛ, bɔ mekã me bɔne ne me maen Yisrael bɔne, bɔ mefa me sufrɛ meto AWURADE me Nyameɛ nyunu mema me Nyameɛ bokaa krongron ne nen,

²¹ bɔ né ngu so mebɔ mbaeɛ nen, biaa Gabriel bɔ nnili moa nwuni ye wɔ nyekyire nu ne, otuli ndɛndɛ wale me nwo berɛ ɔɔfale ye sa hane me, wɔ nɔsoa afɔleɛbɔlɛ mmerɛ ne anu.

²² Na ohyirehyirele me sele me kyɛ, “O Daniel, mawa kyɛ mebaafa ndeaseɛ ne nimdeɛ mema wɔ.

²³ Ɛhyɛle wɔ sufrɛ ne abo nen, mmuayɛɛ bie fili nu wale, na mawa kyɛ mebaahã mekyire wɔ, ofikyɛ Nyameɛ kuro wɔ dwirɛ paa; yiti te edwirɛ ne abo, ná dwene nyekyire ne anwo.

²⁴ “Bahyɛ afoɛ aburasoo sɔ alaa nzoo bafa wɔ maen ne wɔ kuro krongron ne anwo, kyɛ bɛ́ma mmeraatolɛ ne ɔbra ayieleɛ, ná bétu bɔne bo, kyɛ bɛ́yɛ amumuyɛɛ nwo mbata, ná bɛ́ma tenenee afebɔɔ ɔbra ɔ, ná bɛ́ma nyekyire ne ne ngɔmhyɛlɛ ne ɔbra nu, ná bɛ́popa nekaa krongron paa ne ngoo.

²⁵ Yiti hyɛ ye nzorɛ ná te ye bo kyɛ, ofi mmerɛ bɔ ahyɛdeɛ ne wale kyɛ bekosa bɛkɔkyekye Yerusalem bɔ ɔkwaadwu mmerɛ bɔ Titireniɛ bɔ bapopa ye ngoo ne kɔwa ne, ɔte afoɛ nzoo. Bɛkɔfa afoɛ nzoo sɔ alaa aburasia ne nyɔ yeɛ bekosa bɛkɔkyekye ye mmorɔnoɛ ne ye fasue ne ɔ, nakoso ɔkɔyɛ amaneɛ mmerɛ.

²⁶ Na afoɛ nzoo sɔ alaa aburasia ne nyɔ ne asi ne, bekohã bɔ bapopa ye ngoo ne, bɔ ebiala ngɔpepɛ ngole ye ɔ. Na afei katakyie bie bɔ ɔbaawa ne, ye lɔen ne kɔsɛkye kuro ne ne nekaa krongron ne. Ye ayieleɛ kɔwa ye so ndɛndɛ so, koɛ kɔhɔ so koodwu sɔ mmerɛ n’ayieleɛ, mmerɛ bɔ bahyehyɛ amaneɛ wɔ nu ne.

²⁷ Ɔne mmeni pee bɛkɔyɛ apam kitii afoɛ nzoo. Na afoɛ nzoo ne, ye bue ko, ɔkɔbera ngaka afɔleɛbɔlɛ ne aleɛ afɔleɛbɔlɛ. Busueniɛ ne, ɔkɔfa akyiwadeɛ amoen ne kosie asɔneyɛɛ sua ne anu, kɔpem kyɛ ɛsɛkyelɛ mmerɛ bɔ Nyameɛ ahyehyɛ ato berɛ ama busueniɛ ne ɔkɔto ye ɔ.