Daniel 8 - AHYERƐLƐ KRONGRON

Boaen nyii ne abɔngye nwo nyekyire

¹ Nana Bɛlsasa ahennie afoɛ bɔ ɔtɔ so nza ne anu, me Daniel, nyane nyekyire bie, na ɛhe sili wɔ nyekyire bɔ nnili moa nyane ye ne asi.

² Na nyekyire ne anu, nwuni kyɛ né nwɔ Susa ahemvie bɔ ɔwɔ Elam mbɔtam. Na nwuni ye wɔ nyekyire ne anu kyɛ nwɔ asue Yulae noa.

³ Mmane me ti so, na yieee, nwuni boaen nyii bie kyɛ ogyi asue ne noa ɔ. Né ole mmɛen nyɔ, na mmɛen nyɔ ne, né bɛwoware, nakoso ko te tendenn tra ko, na bɔ ɔte tendenn ne yeɛ olili nziɛ wɔ bɛ fifilɛ ne anu ɔ.

⁴ Nwuni boaen nyii ne kyɛ osisi ɔkɔ eyia atɔleɛ ne sorɔ ne ngwaen. Kaka biala angora ye nyunu gyina, yeɛ ebiala nne berɛ bɔ ɔhora pepɛ lele ebie fili ye sa nu ɔ. Ɔyɔle bɔ okuro ɔ, na ɔmomane ye nwo so.

⁵ Na ngu so bɔ menea ne, yieee, abɔngye nyii bie fili eyia atɔleɛ fale aseɛ so amukoraa wale bɔ né ye gya nga ase ɔ; na né abɔngye ne ole mmɛen pirikua bie bɔ otua ye nye nemɔ b’afia ɔ.

⁶ Opingyele boaen nyii bɔ ole mmɛen nyɔ, bɔ nwuni ye kyɛ ogyi asue ne noa ne anwo berɛ, na ole ɛyaa tuli amirika anwoserɛ so hɔle ye so.

⁷ Nwuni kyɛ waadwu boaen nyii ne anwo berɛ, ɔfɛle ye so yaa piri, na osili boaen nyii ne bubuli ye mmɛen nyɔ ne anu. Boaen nyii ne annya anwoserɛ wangyina ye nyunu, na abɔngye ne pemone ye tole berɛ tiatiale ye so, na ebiala angora wanne boaen nyii ne wamvi ye sa nu.

⁸ Yiti abɔngye nyii ne momane ye nwo so paa, nakoso mmerɛ bɔ ye anwoserɛ ne yɛle piri paa nen, mmɛen piri ne buli, na mmɛen mbiri mbiri nna fifili ye boso bɔ bɛ nye kyire nyameɛso mvrama nna ne ɔ.

⁹ Mmɛen nemɔ anu, mmɛen kaaba bie fifili fili ko anu, onyini yɛle piri paa mane ye nye hyirele ngwaen, eyia afiteleɛ ne aseɛ nyemenenyemene ne.

¹⁰ Onyini tendenn alaa oodwuli nyameɛso lɔen ne anwo, na otutuli ɛlɔen ne bie ne nzramaa ne bie guale ase, na otiatiale bɛ so.

¹¹ Ɔmomane ye nwo so dwɔso tiale safohene bɔ ɔla ɛlɔen ne noa ne; ɔberale ye daa biala naen yeralɛ afɔleɛ bɔ bɛbɔ bɛma ye ne, na ofindini ye nekaa krongron ne guale ase.

¹² Ɔnate mmeraatolɛ so mane ɛlɔen ne, yeɛ daa biala naen yeralɛ afɔleɛ ne oolili ye sa; ofindini nahorɛ tole ase, na bɔ ɔyɔle ne, onyane ngɔsoɛ.

¹³ Yeɛ ndele kyɛ krongronniɛ bie odwudwo, na krongronniɛ ko koso bisale bɔ odwudwole ne kyɛ, “Daa biala naen yeralɛ afɔleɛ ne, musuebɔlɛ mmeraatolɛ ne, nekaa krongron berɛ bɔ waali ye sa ne, yeɛ ɛlɔen ne bɔ otiatiale bɛ so ne nwo nyekyire ne, mmerɛ beni yeɛ ɔkɔhɔ so koodwu ɔ?”

¹⁴ Na obuale me kyɛ, “Sana waadwu nɔsoa ne ngyerɛmɔ sɔ alaa apee nyɔ ɛyaa nza koraka né nekaa krongron berɛ wasa wasi ye daa nu.”

¹⁵ Na me, Daniel, nyane nyekyire ne, ná nyɛle m’adwene kyɛ ngɔte ye bo nen, mvum nu, nwuni ebie bɔ ye sue te kyɛ sona ɔ kyɛ ogyi me nyunu berɛ ɔ.

¹⁶ Na ndele sona komvi wɔ asue Yulae noa, kyɛ ɔtea nu kyɛ, “Gabriel, kyire biaa ne nyekyire ne abo.”

¹⁷ Yiti ɔwale nekaa bɔ né ngyi ne. Ɔwale ne, ɛserɛ hane me, na mvale me nyunu mmutuli berɛ. Na osele me kyɛ, “O Sona awa, te ye bo, kyɛ nyekyire ne gyi berɛ ma ayieleɛ mmerɛ ne.”

¹⁸ Na ogu so bɔ odwudwo kyire me nen, nnale hatee, bɔ né me nyunu butu berɛ ɔ; na ɔsɔle me nu fale me gyinane berɛ.

¹⁹ Na osele kyɛ, “Tie, ahonehulɛ ne ba ayieleɛ a, bɔ okosi ne, mebaala ye ali mekyire wɔ, ofikyɛ ɔfa ayieleɛ mmerɛ bɔ bahyehyɛ bato berɛ ne anwo.

²⁰ Boaen nyii bɔ enwuni ye kyɛ ole mmɛen nyɔ ne, begyi berɛ bɛma Media ne Pɛsia ahemvo.

²¹ Na abɔngye nyii awerɔm ne, ogyi berɛ ma Hela hene; yeɛ mmɛen pirikua bie bɔ otua ye nye nemɔ b’afia ne, ogyi berɛ ma ɛhene bɔ oli moa ne.

²² Na mmɛen bɔ so buli bɔ mmɛen nna befifili ye gya nu ne, okyire kyɛ ahennie nna kodwɔso maen ne anu, nakoso b’anwoserɛ ngodwu ye deɛ ne.

²³ Na sɛ b’ahennie ne ɔbaawa ayieleɛ a, mmerɛ bɔ mmeraatolɛfoɛ nemɔ bɛ bɔne yɔleɛ ahɔ so paa ne, ɛhene atianuserɛniɛ bie, bɔ otira kanda nworɛ ɔ kodwɔso.

²⁴ Ye tumi kɔyɛ piri, nakoso nna ye bɔbɔ ye tumi ɔ, ɔkɔsɛkye nningyein maa ɔkɔyɛ anwodwiri, okonya ngɔsoɛ wɔ bɔ ɔkɔyɔ ɔ nu, okohũhũ anwoserɛfoɛ, na ɔkɔbɔ krongronfoɛ maen ne.

²⁵ Na ye kanda ne ati, ɔkɔma nnakannaka kotira ndii wɔ ye aberɛ so, ye ti anu kɔyɛ ye fɛ maa ɔkɔhoahoa ye nwo, okohũhũ mmeni pee bɔ ɔngɔbɔ bɛ kɔkɔ ɔ, okodwɔso kotia ahemvo mɔ nu Hene ne, nakoso bekobu ye nu gyein wɔ aberɛ bɔ nna sona yeɛ wafa ye sa wahã ye ɔ.

²⁶ Nɔsoa ne ngyerɛmɔ nyekyire bɔ mala ye ali ne, ɔte nahorɛ; nakoso nnɛbɔ nyekyire ne aso, ofikyɛ kyẽa bie dee yeɛ okosi ɔ.”

²⁷ Afei me, Daniel, me nwo yɛle me bɛtɛɛ, na me nwo yɛle me yea ngyẽa dɔnn. Afei ndwɔsole, na ndoale ɛhene n’adwuma ne aso; nakoso nyekyire ne mane me nwo dwirili me, ofikyɛ ebiala ande ye bo.