Daniel 5 - AHYERƐLƐ KRONGRON

Bɛlsasa to poen

¹ Nana Bɛlsasa tole poen kandinga bie mane ye mbanyi apee ko, na ɔnone nzaa wɔ mmenia apee ne anyunu.

² Na mmerɛ bɔ nzaa ne fale Bɛlsasa nye so ne, ɔhyɛle kyɛ bɛɛfa sikaa kɔkorɛ ne ɛdwetɛ kulie mɔ bɔ ye baba Nebukadenesa ɔɔsesa fili Yerusalem asɔneyɛɛ sua nu wale ne bɛbra, ma ye ɛhene, ɔne ye mbanyi mɔ, ɔye mɔ ne ye sómaa mɔ bɛno nu.

³ Yeɛ sikaa kɔkorɛ ne ɛdwetɛ kulie mɔ bɔ bɛɛsesa befili asɔneyɛɛ sua nu, bɔ ɔte Nyameɛ awuro bɔ ɔwɔ Yerusalem ne, bɛɛfa bɛwale; na ɛhene ne ne ye mbanyi mɔ, ɔye mɔ ne ye sómaa mɔ bɛnone nu.

⁴ Bɛnone nzaa, na bɛyele sikaa kɔkorɛ, ɛdwetɛ, kɔɔbere, buralɛ, bakaa ne nyɔboɛ nyameɛ mɔ ayɛ.

⁵ Mvum nu, sona sa mmɛseka fitele berɛ, na ɔhyerɛle ɛhene n’ahemvie berɛ terɛ bɔ bama ye nwo ne anwo, wɔ kanea bakaa ne nyunu berɛ, na ɛhene ne nwuni asaa bɔ né ɔkyerɛ ne.

⁶ Yeɛ ɛhene ne nyunu tole, ye nwo dwirili ye, ye nwo yɛle ye hodwoo, na ye nangoroma kekã bɔle nu biribiribiri.

⁷ Na ɛhene ne teane nu sele kyɛ bɛɛfa bɛ bɔ bɛnea nzramaa nu bɛkã nu dwirɛ, Kaldeafoɛ ne benewaafoɛ bɛbra. Yeɛ ɛhene ne sele Babilɔn nworɛfoɛ nemɔ kyɛ, “Ebiala bɔ ɔkɔkenga sɔ ahyerɛlɛ he, ná okohyire me ye bo nen, ngɔfa kende ngɔhera ye, yeɛ ngɔfa sikaa kɔkorɛ atweaban ngɔto ye kɔme anu, na ɔkɔyɛ ɛhene bɔ ye tumi tɔ so nza ɔ wɔ ahennie ye anu ɔ.”

⁸ Yeɛ Nana ye nworɛfoɛ ne amukoraa bɛwale berɛ, nakoso bangora ahyerɛlɛ ne kenga, yeɛ bangora bangyire ye bo bangyire Nana.

⁹ Yeɛ Bɛlsasa nwo dwirili ye paa, na ye nyunu yɛle bosaa, na ye mbanyi nemɔ yɛle basaa.

¹⁰ Na mmerɛ bɔ ɛhemmaa ne tele edwirɛ bɔ ɛhene ne ne ye mbanyi mɔ begu so bɛkekã nen, ɔwale ɛpoentolɛ sua ne anu, na osele kyɛ, “Nana, wɔ ngoa so oo! Nnɛma edwirɛ ne ha wɔ, yeɛ nnɛma wɔ nyunu yɛ bosaa.

¹¹ Biaa bie wɔ w’ahennie ye anu bɔ nyameɛ krongron mɔ bɛ sunzum wɔ ye nu ɔ. Wɔ baba aberɛ so, benwuni kanea ne nimdeɛ ne nworɛ bɔ ɔte kyɛ nyameɛ nemɔ bɛ nworɛ deɛ ne bie ɔ wɔ ye nu, na wɔ baba Nana Nebukadenesa bɔle ye panyi wɔ ngonyaayelɛfoɛ, bɛ bɔ bɛnea nzramaa nu bɛkã nu dwirɛ, Kaldeafoɛ ne benewaafoɛ nemɔ bɛ so,

¹² ofikyɛ benwuni kyɛ sɔ Daniel ne, bɔ Nana Nebukadenesa tole ye dumaa Beltesasa ne, ole sunzum sonongo, nimdeɛ ne ndeaseɛ bɔ bɛfa bekyire laleɛ bo ɔ, ɔne bɔ bɛfa bekyirekyire edwirɛ bɔ nu ɔlla berɛ ɔ nu, ɔne edwirɛ bɔ ɔkye adwene ɔ nu. Yiti maa bɛɛfrɛ Daniel bɛbra ma ohyire ye bo.”

¹³ Yeɛ bɛɛfale Daniel bɛwale ɛhene ne nyunu, na obisale Daniel kyɛ, “Wɔ ole Daniel, mmenia bɔ bɛhyele bɛ nnure befili Yuda nemɔ anu ko, bɔ Nana, me baba fale bɛ fili Yuda wale ne anaa?

¹⁴ Mate wɔ nga kyɛ nyameɛ nemɔ bɛ sunzum wɔ wɔ nu, na banwu kyɛ kanea ne nimdeɛ ne nworɛ paa te wɔ nu.

¹⁵ Bɛɛfale nworɛfoɛ ne bɛ bɔ bɛnea nzramaa nu bɛkã nu dwirɛ ɔ bɛwale me nyunu, kyɛ bɛɛkenga sɔ ahyerɛlɛ he, ná behyire me ye bo, nakoso bangora bangyire edwirɛ ne abo.

¹⁶ Nakoso mate kyɛ wɔ de, ɛkora kyire edwirɛ bo, yeɛ ekyirekyire edwirɛ bɔ ɔkye adwene ɔ koso nu. Sɛ ɛkora kenga ahyerɛlɛ ne, ná ekyire me ye bo a, ngɔfa kende ngɔhera wɔ, yeɛ ngɔfa sikaa kɔkorɛ atweaban ngɔto wɔ kɔme anu, na ɛkɔyɛ ɛhene bɔ ye tumi tɔ so nza ɔ wɔ ahennie ye anu.”

¹⁷ Yeɛ Daniel buale ɛhene ne kyɛ, “Nana, w’akyɛdeɛ ne, maa ɔwɔ berɛ, ná fa w’akatuaa ne ma sona foforɛ. Nakoso ngɔkenga ahyerɛlɛ ne ngohyire wɔ, yeɛ ngohyire ye bo koso ngohyire wɔ.

¹⁸ Nana, Anwuro Anwuro Nyameɛ ne, ɔfale ahennie mane wɔ baba Nebukadenesa, ɔmaa ɔyɛle titire, na ɔmaa onyane anidie ne animnyam;

¹⁹ na ɔnate sona titire bɔ ɔmaa ɔyɛle ne ati, maen maen mukoraa, mmenia mukoraa ne edwudwolɛ amukoraa besurole ye, na bɛ nwo wosowosole bɛ wɔ ye nyunu. Sona biala bɔ né okuro kyɛ oku ye ne, ohuni ye; yeɛ bɔ okuro kyɛ onya ngoa ne, ɔmaa onyane ngoa; sona bɔ okuro ne, ɔbɔle ye aba so, na sona bɔ okuro ne, ɔbrɛle ye ase.

²⁰ Nakoso mmerɛ bɔ ahandaen wurale ye nu, ná anwomasoɛ maa ɔyɛle dwɛɛ nen, betuli ye befili ye bia so, na belele ye animnyam ne befili ye sa nu.

²¹ Bɛfoane ye befili kuro mmenia nu, bɛmane ye adwene yɛle kyɛ kaka adwene, ɔne eburo afunum mɔ bɛɛtenane, bɛmaa olili ndire kyɛ nandwie, na nyameɛso bosue loaloale ye nwonaen, kɔpem kyɛ onwuni kyɛ Anwuro Anwuro Nyameɛ ne yeɛ ole adasa ahennie so tumi ɔ, na sona bɔ okuro biala yeɛ ɔfa ye sie so ɔ.

²² Na wɔ, Bɛlsasa, bɔ ɛte ɔwa ɔ, ɛse ɛhe amukoraa, nakoso angua wɔ nwo ase,

²³ na mmom adwɔso nyameɛso Mene ne so konguronn, baasesa ye awuro kulie nemɔ babrɛ wɔ, na wɔ, ɛne wɔ mbanyi mɔ, ɛye mɔ ne wɔ sómaa mɔ bano nu nzaa, na aye ɛdwetɛ, sikaa kɔkorɛ, kɔɔbere, buralɛ, bakaa ne nyɔboɛ nyameɛ mɔ bɔ bennwu nikye, bɛnde dwirɛ, anaa bɛnze huu ɔ ayɛ. Nakoso Nyameɛ bɔ otira wɔ ngoa nyamaa nu, bɔ w’atee amukoraa wɔ ye sa nu ne de, amva anidie amma ye.

²⁴ “Na ye sɔ ati yeɛ ɔsomane asaa ne maa ɔɔhyerɛle ahyerɛlɛ he ɔ.

²⁵ Ahyerɛlɛ bɔ wahyerɛ ne ɛhe: MENE, MENE, TEKEL, PARSIN.

²⁶ Na edwirɛ ne bo hyirelɛ ɛhe: MENE, Nyameɛ aha w’ahennie ngyẽa ne, na wafa wawa ayieleɛ;

²⁷ TEKEL, wahari wɔ wɔ tonyi so, na wanwu kyɛ ɛndwe;

²⁸ PERES, wahyɛ w’ahennie ne anu wafa wama Medesefoɛ ne Pɛsiafoɛ.”

²⁹ Yeɛ Bɛlsasa hyɛle maa bɛfale kende bɛherale Daniel, bɛfale sikaa kɔkorɛ atweaban bɛtole ye kɔme anu, na bɛbɔle ye nwo dawure kyɛ, ye yeɛ ɔte ɛhene bɔ ye tumi tɔ so nza wɔ ahennie ne anu ɔ.

³⁰ Na sɔ kɔngɔen ne ala, behuni Kaldeafoɛ hene Bɛlsasa.

³¹ Na Medeseniɛ Dario fale ahennie ne. Né wali afoɛ kɔyɛ aburasia ne nyɔ.