Daniel 4 - AHYERƐLƐ KRONGRON

Nebukadenesa laleɛ bɔ ɔtɔ so nyɔ

¹ Nana Nebukadenesa noa dwirɛ bɔ ɔfa kɔma maen maen amukoraa, mmenia mukoraa ne edwudwolɛ amukoraa bɔ bɛwɔ aseɛ so ne, ye ɛhe: Ngɔsoɛ pee ɔbra ɛmɔ asetena oo!

² Nzɛngyerɛnneɛ ne anwanwadeɛ bɔ Anwuro Anwuro Nyameɛ ne wayɔ wama me ne, ɔyɛ me fɛ kyɛ ngɔfa ngɔto dwaa ɔ.

³ Kyɛbɔ ye nzɛngyerɛnneɛ osi te mbiri mbiri ɔ! Kyɛbɔ anwoserɛ osi wɔ ye anwanwadeɛ nu ɔ! Ye ahennie te ahennie afebɔɔ, na ye tumi wɔ berɛ wɔ aworɛ ndoatoasoɛ amukoraa nu.

⁴ “Me, Nebukadenesa, né nde m’awuro asomdwee nu, bɔ né nningyein ɔkɔ so yé ma me wɔ m’ahemvie ɔ.

⁵ Ngyene laleɛ bie bɔ ɔmaa nzurole. Laleɛ bɔ ogyinagyinane me nye so wɔ mba ne aso, ɔne bɔ nwuni ye wɔ nu nen, ɔhale me.

⁶ Yiti nhyɛle mmeraa kyɛ bɛfa Babilɔn nworɛfoɛ amukoraa bɛbra me nyunu, maa beehyire me laleɛ ne abo.

⁷ Yeɛ ngonyaayelɛfoɛ, bɛ bɔ bɛnea nzramaa nu bɛkã nu dwirɛ, Kaldeafoɛ ne ahɔmeɛ bɛwale. Ngane laleɛ ne ngyirele bɛ, nakoso bangora bangyire me ye bo.

⁸ Ye si ye, Daniel bɔ me nyameɛ Beltesasa dumaa yeɛ bɛfa bɛfrɛ ye, bɔ nyameɛ krongron mɔ bɛ sunzum wɔ ye nu ne, ɔwale me nyunu, na ngane laleɛ ne ngyirele ye kyɛ,

⁹ “O Beltesasa, ngonyaayelɛfoɛ panyi, mese kyɛ nyameɛ krongron mɔ bɛ sunzum wɔ wɔ nu, yeɛ mvealeɛ nu dwirɛ biala mmo w’adwene so, yiti kã me laleɛ bɔ ngyene ne kyire me, ná kyire me ye bo.

¹⁰ Bɔ nwuni ye wɔ me laleɛ ne anu, mmerɛ bɔ né nna mba so ne, ye ɛhe: Nwuni bakaa bie kyɛ ogyi aseɛ afia, na né ɔwale paa.

¹¹ Bakaa ne nyini yɛle piri, na ɔyɛle se, na ye ti ne oodwuli nyameɛso, na benwuni ye wɔ aseɛ so nekaa biala.

¹² Ye nyaa yɛle nyemene, so mmaa yɛle pee, na ɔyɛle aleɛ mane ebiala. Eburo ngaka bɛɛlelale ye bo fɔnwoo ne anu, ewienu nnomaa bɛɛtenatenane ye mmaen nemɔ aso, na abɔdeɛ amukoraa benyane so aleɛ belili.

¹³ “Bɔ nwuni ye wɔ me laleɛ nu wɔ me mba so ne, mvum nu, wɛmvoɛ krongronniɛ bie fili nyameɛso dwu wale.

¹⁴ Na ɔteane nu serɛserɛ sele kyɛ, ‘Ɛ́mɔbu bakaa ne bɛ́to ase, ná ɛ́mɔpepɛ ye mmaen ne, ɛ́mɔporo ye nyaa ne, ná ɛ́mɔto ye mma ne bɛ́pete; ɛ́mɔma ngaka nemɔ béfi ye bo bɛ́nwati, ná ɛ́mɔma nnomaa nemɔ bétu béfi ye mmaen nemɔ aso.

¹⁵ Nakoso ye dosii ndii ne de, ɛ́mɔyakyi ye wɔ aseɛ ne anu, ɛ́mɔfa buralɛ nyamaa ne kɔɔbere nyamaa bɛ́kyekye ye wɔ ndire frɔmfrɔm nu. Ɛ́mɔma nyameɛso bosue ɔloa ye, ná ɛ́mɔma ɔne ngaka beli aseɛ so ndire.

¹⁶ Kuro sona adwene bɔ ole ye ne, okotu komini, na bɛkɔma ye kaka adwene toonn kɔma afoɛ nzoo kɔwa kɔɔto ye.

¹⁷ Sɔ ahyɛdeɛ ne, awɛmvoɛ nemɔ bɛ noa dwirɛ ɛne, krongronfoɛ nemɔ b’agyina bɔ batu hɔ ɛne, amaa ɔnate so ateasefoɛ banwu kyɛ Anwuro Awuroniɛ ne yeɛ ole adasa ahennie so tumi ɔ, ɔfa ma sona biala bɔ okuro ɔ, na adasa nu anwobrɛaseɛfoɛ yeɛ ɔfa bɛ sie so ɔ.’

¹⁸ Laleɛ bɔ me, Nana Nebukadenesa, ngyene ne, ye ɛne. Yiti wɔ, Beltesasa, kyire ye bo, ofikyɛ m’ahennie nu nworɛfoɛ amukoraa bɛngɔhora ngohyire me ye bo. Nakoso wɔ de, ɛkɔhora, ofikyɛ nyameɛ krongron mɔ bɛ sunzum wɔ wɔ nu.”

Daniel kyire laleɛ ne bo

¹⁹ Na Daniel bɔ osa li Beltesasa ne, ye nwo dwirili ye hyɛle kãa, na edwirɛ ne hale ye. Yeɛ ɛhene ne sele kyɛ, “Beltesasa, nnɛma laleɛ ne anaa ye bo hyirelɛ ne ɔha wɔ.” Na Beltesasa buale kyɛ, “Me mene, me ngome a, ahaa laleɛ ne ɔkakyi hɔ bɛ bɔ bekyi wɔ ɔ bɛ so, ná ye bo hyirelɛ ne koso ɔhɔ wɔ pɔfoɛ mɔ so!

²⁰ Bakaa ne bɔ enwuni ye, bɔ onyini yɛle piri, ná ɔyɛle se, bɔ ye ti ne oodwuli nyameɛso, bɔ benwuni ye wɔ aseɛ so nekaa biala,

²¹ bɔ ye nyaa yɛle nyemene, bɔ so mmaa yɛle pee, bɔ ɔyɛle aleɛ mane ebiala, bɔ eburo ngaka bɛɛlelale ye bo fɔnwoo nu, bɔ ewienu nnomaa bɛɛtenatenane ye mmaen nemɔ aso ne,

²² Nana, wɔ ɛne. Wɔ yeɛ anyi ná anya anwoserɛ ne. W’anwoserɛ ne anyi, na watrɛ waadwu nyameɛso, na wɔ tumi ne waadwu aseɛ so nekaa biala.

²³ Nana, enwuni wɛmvoɛ krongronniɛ bie bɔ ofili nyameɛso dwu wale oosele kyɛ, ‘Ɛ́mɔbu bakaa ne bɛ́to ase bɛ́sɛkye ye, nakoso ye dosii ndii ne de, ɛ́mɔyakyi ye wɔ aseɛ ne anu, ɛ́mɔfa buralɛ nyamaa ne kɔɔbere nyamaa bɛ́kyekye ye wɔ ndire frɔmfrɔm nu; ná ɛ́mɔma nyameɛso bosue ɔloa ye, ná ɛ́mɔma ɔne eburo ngaka beli aseɛ so ndire ma afoɛ nzoo hɔ bra ɔɔto ye.’

²⁴ “Nana, me mene, laleɛ ne, ye bo hyirelɛ ɛhe. Nana, nikyee bɔ Anwuro Anwuroniɛ ne ɔbaafa yɔ wɔ ne yeɛ waye wahyire wɔ ne:

²⁵ Bɛkɔfoa wɔ bekofi mmenia nu, na ɛne eburo ngaka yeɛ bɛkɔɔtena ɔ. Bɛkɔmaa ekoli ndire kyɛ nandwie, na nyameɛso bosue kɔloa wɔ. Ɛhe kɔto wɔ afoɛ nzoo, kɔpem kyɛ ekonwu ye kyɛ Anwuro Anwuroniɛ ne yeɛ ole adasa ahennie so tumi ɔ, na ebiala bɔ okuro ne yeɛ ɔfa ma ye ɔ.

²⁶ Na kyɛbɔ ɔhyɛle kyɛ bɛyakyi bakaa dosii ndii ne nen, sɔ ala yeɛ mmerɛ bɔ ekole kɔto nu kyɛ tumi mukoraa wura Nyameɛso bo ne, w’ahennie kosa kodwɔso bieku kɔma wɔ ɔ.

²⁷ Yiti Nana, me foɛ bɔ mebaatu wɔ ye, de to nu: Bɔ bra bɔ ɔtengyɛ ɔ ná yakyi bɔne yɔlɛ; nwu bɛ bɔ bɛyɛ anwumvo ɔ anwumvoin, ná yakyi amumuyɛɛ yɔlɛ, amaa ɔnate so ebiaa né wɔ so anu atɔ wɔ ahyɛ.”

Laleɛ ne wale nu”

²⁸ Sɔ dwirɛ ne amukoraa wale Nana Nebukadenesa so.

²⁹ Bosome buru ne nyɔ sone ne, ɛlɛho bie, né ɔnatenate Babilɔn ahemvie berɛ anwuro nekaa bie,

³⁰ na osele kyɛ, “Babilɔn yeɛ wayɛ piri sɔa e! Aso nna me tumi piri yeɛ mafa makyekye kuro ye maa wayɛ m’ahenguro, bɔ mefa meye m’ahennie animnyam ali ɔ?”

³¹ Na Nana Nebukadenesa noa ambe, yeɛ edwudwolɛ bie fili nyameɛso sele kyɛ, “Wɔ, ɛhene Nebukadenesa, wɔ yeɛ bɛ́kã edwirɛ he bekyire wɔ ɔ, kyɛ: Ahennie ne, wafi wɔ sa!

³² Bɛkɔfoa wɔ bekofi mmenia nu, na ɛne eburo ngaka yeɛ bɛkɔɔtena ɔ. Bɛkɔmaa ekoli ndire kyɛ nandwie. Ɛhe kɔto wɔ afoɛ nzoo, kɔpem kyɛ ekonwu ye kyɛ Anwuro Anwuroniɛ ne yeɛ ole adasa ahennie so tumi ɔ, na ebiala bɔ okuro ne yeɛ ɔfa ma ye ɔ.”

³³ Na berɛ ne ala, edwirɛ bɔ bahã bafa Nebukadenesa nwo ne wale nu. Bɛfoane ye befili mmenia nu, olili ndire kyɛ nandwie, na nyameɛso bosue loale ye nwonaen kɔpem kyɛ ye nwiaa fuli ndendenn kyɛ kɔleɛ ndɛkra ɔ, na ye gya ne ye sa boen fuli kyɛ anomaa deɛ.

Nebukadenesa ye Nyameɛ ayɛ

³⁴ “Na mmerɛ ne sone ne, me Nebukadenesa, ndole me ti anwuro nneane nyameɛso, m’adwene sa yɛle paa, na ngamvole Anwuro Anwuroniɛ ne, na nyele ye bɔ ɔte ase afebɔɔ ne ayɛ mvale anidie mane ye, ofikyɛ ye tumi ne te afebɔɔ tumi, na ye ahennie wɔ berɛ ma aworɛ ndoatoasoɛ amukoraa;

³⁵ na aseɛ sofoɛ amukoraa bɛtte huu wɔ ye nye so, bɔ okuro biala yeɛ ɔyɔ ye wɔ nyameɛso lɔen mɔ nu, ɔne aseɛ sofoɛ mɔ nu ɔ, na ebiala nne berɛ bɔ ɔkɔhora kogyina ye tumi noa, anaa okobisa ye kyɛ, ‘Nzikyɛ yeɛ ɛyɔ e?’

³⁶ Na sɔ mmerɛ ne ala, m’adwene sa yɛle paa, na kyɛbɔ ɔkɔyɛ bɔ m’ahennie ne konya animnyam ne ati, m’animnyam ne m’anwonyemene sa yɛle me deɛ. Me foɛtulɛfoɛ ne me mbanyi mɔ bɛɛpenane me boso, besa bɛfale me besiele m’ahennie bia so, na bɛfale tumi bɔ ɔtra daa deɛ ne ɔ bewurale me sa.

³⁷ Na afei de, me Nebukadenesa, mefa ayɛyelɛ, ɛkamvolɛ ne anidie mema nyameɛso Hene ne, ofikyɛ bɔ ɔyɔ amukoraa te turoloo, na ye atee tengyɛ, na bɛ bɔ bɛbɔ anwomasoɛ bra ne, ɔkora brɛ bɛ ase.