Daniel 3 - AHYERƐLƐ KRONGRON

Sikaa kɔkorɛ amoen ne

¹ Nebukadenesa yɔle sikaa kɔkorɛ amoen bɔ ye tendenn te agyirɛ aburasia, bɔ ye tɛtrɛtɛɛ nu te agyirɛ nzia ɔ. Ogyinane ye wɔ Dura aseɛ pralaa ne aso wɔ Babilɔn aseɛ so.

² Yeɛ Nana Nebukadenesa somane maa bɛɛfale mbɔtam mbanyi, mbanyi mɔ, amrado mɔ, foɛtulɛfoɛ, fotoɛsoneafoɛ, badwafoɛ, ndɛenbualɛfoɛ ne mbɔtam nemɔ aso mbanyi amukoraa, kyɛ amoen bɔ Nana Nebukadenesa wagyina bɔ ɔbaala ye ali ne, bɛbra berɛ bie.

³ Yeɛ mbɔtam mbanyi, mbanyi mɔ, amrado mɔ, foɛtulɛfoɛ, fotoɛsoneafoɛ, badwafoɛ, ndɛenbualɛfoɛ ne aseɛ nemɔ aso mbanyi amukoraa beeyiale nu, ɔnate amoen bɔ Nana Nebukadenesa wagyina bɔ ɔbaala ye ali ne ati, na begyinagyinane amoen bɔ Nebukadenesa wagyina ne anyunu berɛ.

⁴ Yeɛ dawurebɔlɛniɛ ne teane nu serɛserɛ kyɛ, “Maen maen mɔ ee, mmenia ne edwudwolɛ mɔ ee, ahyɛdeɛ ne ole kyɛ,

⁵ Sɛ ɛmɔte awɛen, dodobɛen, sangoo, bɛnda, atɛndɛbɛn, kyenneɛ ne sangoo ahoroɔ nga a, odi kyɛ ɛmɔbutu berɛ bɛsɔne amoen bɔ Nana Nebukadenesa wagyina ne.

⁶ Na ebiala bɔ wammutu berɛ wanzɔne ye ne, sɔ mmerɛ ne ala odi kyɛ befindi ye bɛto see bɔ ogye wuronyiwuronyi wɔ foonoo nu ne anu.”

⁷ Yiti mmerɛ bɔ mmenia ne amukoraa bɛtele awɛen, dodobɛen, sangoo, bɛnda, atɛndɛbɛn, kyenneɛ ne sangoo ahoroɔ nga nen, maen ne amukoraa, maen maen amukoraa ne edwudwolɛ ahoroɔ amukoraa bebutubutuli berɛ bɛsɔnene sikaa kɔkorɛ amoen bɔ Nana Nebukadenesa wagyina ne.

Bɛfa Yudafoɛ nza begua see foonoo nu

⁸ Na sɔ mmerɛ ne, Kaldeafoɛ biemɔ bɛɛbɔle Yudafoɛ mɔ kwaadu yeayea.

⁹ Besele Nana Nebukadenesa kyɛ, “Nana, wɔ ngoa so oo!

¹⁰ Nana, ahyɛ mmeraa kyɛ, sona biala bɔ ɔkɔte awɛen, dodobɛen, sangoo, bɛnda, atɛndɛbɛn, kyenneɛ ne sangoo ahoroɔ nga nen, odi kyɛ obutu berɛ sɔne sikaa kɔkorɛ amoen ne;

¹¹ na ebiala bɔ wammutu berɛ wanzɔne ye ne, odi kyɛ befindi ye bɛto see bɔ ogye wuronyiwuronyi wɔ foonoo nu ne anu.

¹² Nana, Yudafoɛ biemɔ wɔ berɛ bɔ atu bɛ asie berɛ kyɛ bɛnea Babilɔn maen ne aso ɔ, bɔ bɛ ole Sadrake, Mesake ne Abedinego ɔ. Nana, sɔ mmenia nemɔ bɛmva wɔ dwirɛ bɛnyɛ huu oo; bɛnzɔne wɔ nyameɛ nemɔ, yeɛ bɛnzɔne sikaa kɔkorɛ amoen bɔ agyina ne.”

¹³ Yeɛ Nebukadenesa fɛle yaa hahii hyɛle kyɛ bɛɛfa Sadrake, Mesake ne Abedinego bɛbra. Na bɛɛfale sɔ mmenia ne bɛwale Nana nyunu.

¹⁴ Yeɛ Nebukadenesa bisale bɛ kyɛ, “Ɛmɔ, Sadrake, Mesake ne Abedinego, aso ɔte nahorɛ kyɛ ɛmɔnzɔne me nyameɛ nemɔ, yeɛ ɛmɔnzɔne sikaa kɔkorɛ amoen bɔ magyina ne koso?

¹⁵ Afei de, sɛ ɛmɔaboaboa ɛmɔ nwo kyɛ sɛ ɛmɔte awɛen, dodobɛen, sangoo, bɛnda, atɛndɛbɛn, kyenneɛ ne sangoo ahoroɔ nga a, ɛmɔkobutu berɛ bɛkɔsɔne amoen bɔ magyina ne a, ye de ɛmɔ nwo sonn. Nakoso sɛ ɛmɔanzɔne ye de a, ye de bekofindi ɛmɔ bekogua see bɔ ogye wuronyiwuronyi wɔ foonoo nu ne anu; na nyameɛ beni yeɛ ɔkɔhora kɔpepɛ kole ɛmɔ kofi me sa nu ɔ?”

¹⁶ Yeɛ Sadrake, Mesake ne Abedinego buale Nana kyɛ, “Nana Nebukadenesa, Onhia kyɛ yɛma wɔ mmuayɛɛ wɔ sɔ dwirɛ he anwo ɔ.

¹⁷ Na sɛ ɔte sɔ de a, ye de yɛ Nyameɛ bɔ yɛso ye ne, ɔkɔhora kɔpepɛ kole yɛ kofi see bɔ ogye wuronyiwuronyi wɔ foonoo nu ne anu; na Nana, ɔkɔpepɛ kole yɛ kofi wɔ sa nu.

¹⁸ Nakoso Nana, sɛ wanne yɛ po a, yɛ́maa enwu ye kyɛ yɛngɔso wɔ nyameɛ nemɔ, yeɛ yɛngɔsɔne sikaa kɔkorɛ amoen bɔ agyina ne.”

¹⁹ Yeɛ Nebukadenesa fɛle yaa hahii, na omunane Sadrake, Mesake ne Abedinego so paa. Na ɔhyɛle kyɛ behua foonoo see ne anu paa ma nu ɔyɛ hye pɛen nzoo ɔtra kyɛbɔ ɔyɛ a ye hyerɛ te ne.

²⁰ Afei ɔhyɛle ye asraafoɛ mmienzua anwoserɛfoɛ nemɔ bie, kyɛ bɛkyekye Sadrake, Mesake ne Abedinego bɛfa bɛ beegua see bɔ ogye wuronyiwuronyi wɔ foonoo nu ne anu.

²¹ Yeɛ bɛkyekyele sɔ mmienzua nemɔ bɔ né bɛ ndaadeɛ, bɛ pieto, bɛ kyerɛ ne b’aguasoɛ wurawura bɛ ɔ, na befindini bɛ beguale see bɔ ogye wuronyiwuronyi wɔ foonoo nu ne anu.

²² Na ɔnate bɔ ɛhene ne hyɛle bɛ kitii kyɛ bɛyɔ ne, ɔne foonoo ne bɔ wayɛ hye watra so ne ati, see wuronyiwuronyi ne huni mmenia bɔ bɛfale Sadrake, Mesake ne Abedinego bɛhɔle nemɔ.

²³ Na sɔ mmienzua nza ne, bɔ bɛ ole Sadrake, Mesake ne Abedinego bɔ né bakyekye bɛ ne, bɛte beguale see bɔ ogye wuronyiwuronyi wɔ foonoo nu ne anu.

²⁴ Yeɛ ɔyɛle Nana Nebukadenesa nwanwa, na odwɔsole ndɛndɛ so, na obisale ye foɛtulɛfoɛ nemɔ kyɛ, “Aso nna mmienzua nza yeɛ yɛkyekyele bɛ yɛgyili bɛ yɛguale see ne anu ɔ?” Yeɛ bebuale Nana kyɛ, “Nana, ɔte nahorɛ.”

²⁵ Yeɛ osele kyɛ, “Nakoso menwu mmenia nna bɔ basangye bɛ ɔ bɔ bɛnatenate see ne anu ɔ. Nikye fee ɔyyɔle bɛ, na ko bɔ ɔtɔ so nna ne de, ye sue te kyɛ nyameɛ mɔ bɛ wa bie.”

²⁶ Yeɛ Nebukadenesa pingyele see bɔ ogye wuronyiwuronyi wɔ foonoo ne anu ne, na osele kyɛ, “Sadrake, Mesake ne Abedinego, Anwuro Anwuro Nyameɛ ye somvoɛ mɔ, ɛ́mɔfi nu béfite bɛbra!” Yeɛ Sadrake, Mesake ne Abedinego befili see ne anu befitele.

²⁷ Yeɛ mbɔtam mbanyi, mbanyi, amrado mɔ ne Nana foɛtulɛfoɛ mɔ bɛbɔle nu bɛɛneane, na benwuni kyɛ see ne wannya sɔ mmenia nemɔ nwonaen so tumi, bɛ ti nwiaa anyera, b’ataadeɛ ne anyɛ hoyaa, yeɛ nwosina po mmo bɛ nwo.

²⁸ Yeɛ Nebukadenesa sele kyɛ, “Sadrake, Mesake ne Abedinego Nyameɛ bɔ wasoma ye abɔfo maa waapepɛ wale ye somvoɛ mɔ bɔ bɛfale bɛ wora bewurale ye nu ne, animnyam hã ye. Bɛ yeɛ behwi bɛfale me, Nana, me mmeraa so ɔ, na bɛfale bɛ ngoa bɛtole serewa, bɔ banzo anaa banzɔne nyameɛ biala ɔ, sana bɛ bɔbɔ bɛ Nyameɛ.

²⁹ Yiti, méhyɛ mmeraa kyɛ, maen, mmenia anaa edwudwolɛ biala bɔ ɔkɔhã dwirɛ kotia Sadrake, Mesake ne Abedinego Nyameɛ ne nen, ngɔmaa bɛkɔtete ye nu pasapasa, na bɛkɔfa ye awuro bɛkɔkakyi fofoɛ; ofikyɛ nyameɛ biala nne berɛ bɔ ɔkora pepɛ de sona sɔaa ɔ.”

³⁰ Afei ɛhene ne mane Sadrake, Mesake ne Abedinego dibea piri paa wɔ Babilɔn aseɛ so.