Daniel 2 - AHYERƐLƐ KRONGRON

Nebukadenesa kye laleɛ

¹ Nebukadenesa ahennie afoɛ bɔ ɔtɔ so nyɔ ne anu ne, ɔhyehyene laleɛ mɔ, na ɔhale ye sunzum, na nnafelɛ fili ye nye so.

² Na Nana Nebukadenesa hyɛle kyɛ bɛɛfa ngonyaayelɛfoɛ, bɛ bɔ bɛnea nzramaa nu bɛkã nu dwirɛ, musueyelɛfoɛ ne Kaldeafoɛ ma bɛbra beehyire ye laleɛ nemɔ abo. Yiti bɛwale beegyinane Nana nyunu.

³ Yeɛ Nana sele bɛ kyɛ, “Mahye laleɛ bie; ɔha me sunzum, bɔ mepena kyɛ mekaye laleɛ ne ná mete ye bo ɔ.”

⁴ Yeɛ Kaldeafoɛ nemɔ buale Nana wɔ Aramaeke dwudwolɛ nu kyɛ, “Nana, wɔ ngoa so oo! Wɔ somvoɛ mɔ, kã laleɛ ne yɛ, na yɛkohyire ye bo.”

⁵ Yeɛ Nana buale Kaldeafoɛ nemɔ kyɛ, “Me de, edwirɛ bɔ mahã ne ala yeɛ mahã ɔ: Sɛ ɛmɔanga laleɛ ne bangyire me, ná ɛmɔangyire me ye bo a, ngɔmaa bɛkɔtete ɛmɔ nu pasapasa, yeɛ bɛkɔkakyi ɛmɔ awuro mɔ fofoɛ so.

⁶ Nakoso sɛ ɛmɔkã laleɛ ne bekyire me, ná ɛmɔkyire me ye bo a, ye de ɛmɔkonya me berɛ akyɛdeɛ, akatuaa ne anidie kandinga. Yiti laleɛ ne, ɛmɔhã behyire me, ná ɛmɔhyire me ye bo.”

⁷ Yeɛ bebuale bieku kyɛ, “Nana, wɔ somvoɛ mɔ, kã laleɛ ne kyire yɛ, na yɛkohyire ye bo.”

⁸ Na Nana buale kyɛ, “Manwu ye pefee kyɛ me mmerɛ yeɛ ɛmɔpena kyɛ ɛmɔsɛkye ye ɔ, ofikyɛ ɛmɔse kyɛ edwirɛ bɔ mahã ne ala yeɛ mahã ɔ.

⁹ Sɛ ɛmɔanga laleɛ ne bangyire me a, edwirɛ bɔ mahã ne ala yeɛ ɔkɔto ɛmɔ ɔ. Ofikyɛ nnakannaka ne ngondombo yeɛ ɛmɔayɛ ɛmɔ adwene kyɛ ɛmɔkɔhã ye wɔ me nyunu, kɔpem mmerɛ bɔ ngɔsesã m’adwene ɔ. Yiti ɛmɔ de, ɛmɔhã laleɛ ne behyire me, na sɔ kɔmaa ngonwu ye kyɛ ɛmɔkɔhora bekohyire me ye bo.”

¹⁰ Yeɛ Kaldeafoɛ nemɔ buale Nana kyɛ, “Ebiala nne aseɛ ye aso bɔ ɔkɔhora konya Nana dwirɛ ne anwo adwene ɔ; ofikyɛ edwirɛ sɔaa de, ɛhene, anaa meneɛ, anaa maenbulɛniɛ biala nne berɛ bɔ wafa wato ngonyaayelɛniɛ, anaa sona bɔ ɔnea nzramaa nu ɔkã nu dwirɛ, anaa Kaldeaniɛ biala nyunu le kyɛ ohyire ye bo ɔ.

¹¹ Edwirɛ bɔ Nana abisa ye de, ɔbo adwene so, na ebiala ngɔhora ngohyire nu ngohyire Nana, sana nyameɛ nemɔ bɔ bɛ de, nna bɛ ne kuro sona yeɛ bɛte ɔ ne yeɛ bɛkɔhora ɔ.”

¹² Na ɔnate sɔ ati, Nana fɛle yaa, na ye nye borole, na ɔhyɛle kyɛ behũhũ Babilɔn nworɛfoɛ amukoraa.

¹³ Yiti ɔhyɛle mmeraa kyɛ behũhũ nworɛfoɛ nemɔ, na mmenia hɔle kyɛ bɛkwaapena Daniel ne ye mmango nemɔ abo so beku bɛ.

¹⁴ Yeɛ Nana awɛmvoɛ nemɔ so safohene Arioke bɔ né wafite kyɛ ɔkwaahuhu Babilɔn nworɛfoɛ nemɔ nen, Daniel le nworɛ ne anidie ɔne ye bedwudwole.

¹⁵ Obisale Nana safohene Arioke kyɛ, “Nzu ati yeɛ Nana ahyɛ mmeraa suronyisuronyi sɔaa ɔ?” Yeɛ Arioke hane edwirɛ ne hyirele Daniel.

¹⁶ Yeɛ Daniel hɔle Nana berɛ ɔɔsrɛle ye kyɛ ɔma ye mmerɛ, amaa ɔnate so wahyire Nana laleɛ ne abo wahyire ye.

¹⁷ Afei Daniel hɔle ye awuro, ɔɔbɔle ye mmango Hanania, Misael ne Asaria amaneɛ,

¹⁸ na osele bɛ kyɛ bɛsrɛ nyameɛso Nyameɛ ne ma onwu bɛ anwumvoin wɔ sɔ mvealeɛ nu dwirɛ he anwo, amaa ɔnate so bamva ye Daniel ne ye mmango nemɔ bamvra Babilɔn nworɛfoɛ nemɔ aso banguku bɛ.

¹⁹ Yeɛ Nyameɛ lale mvealeɛ nu dwirɛ ne ali hyirele Daniel wɔ kɔngɔen nyekyire nu. Na Daniel hyɛle nyameɛso Nyameɛ ne animnyam.

²⁰ Na Daniel sele kyɛ, “Animnyam hã Nyameɛ dumaa afebɔɔ, ofikyɛ ye yeɛ nworɛ ne tumi te ye deɛ ɔ.

²¹ Ye yeɛ ɔsakyera mmerɛ ne ngyẽa nu ɔ, otu ahemvo mɔ bia so, yeɛ ɔfa ahemvo mɔ sie bia so; ɔma nworɛfoɛ benwu nworɛ, na ɔma bɛ bɔ b’adwene nu pi ɔ benya nimdeɛ;

²² ɔda edwirɛ bɔ nu pi ɔ, ɔne mvealeɛ nu dwirɛ ali, ɔse bɔ ɔwɔ awosii nu ɔ, na kanea ne ye yeɛ bɛte ɔ.

²³ O, me nana mɔ Nyameɛ, meyɛ wɔ mmo meye wɔ ayɛ, kyɛ ama me nworɛ ne tumi, ná afei ala bɔ yasrɛ wɔ ne ali ahyire me ɔ, ofikyɛ ala Nana laleɛ ne ali ahyire yɛ.”

Daniel kyire laleɛ ne abo

²⁴ Afei Daniel hɔle Arioke bɔ Nana afa awura ye sa kyɛ ohũhũ Babilɔn nworɛfoɛ nemɔ ne berɛ, na oosele ye kyɛ, “Nnɛkũkũ Babilɔn nworɛfoɛ nemɔ! Fa me kɔ Nana nyunu, na ngohyire Nana laleɛ ne abo ngohyire ye.”

²⁵ Yeɛ Arioke yɛle ndɛndɛ fale Daniel hɔle Nana nyunu, na osele ye kyɛ, “Nana, mmenia bɔ bɛhyele bɛ nnure befili Yuda bɛwale ne, manya bɛ nu bienzua ko bɔ okohyire wɔ laleɛ ne abo ɔ.”

²⁶ Yeɛ Nana bisale Daniel bɔ osa li Beltesasa ne kyɛ, “Ɛkɔhora kɔhã laleɛ horɛ bɔ ngyene ne, ná ekosa kohyire ye bo kohyire me?”

²⁷ Yeɛ Daniel buale wɔ Nana nyunu berɛ kyɛ, “Nana, mvealeɛ nu dwirɛ bɔ abisa ye, nworɛfoɛ, bɛ bɔ bɛnea nzramaa nu bɛkã nu dwirɛ, ngonyaayelɛfoɛ anaa benewaafoɛ biala ngɔhora ngohyire wɔ ye bo;

²⁸ na mmom Nyameɛ bie wɔ nyameɛso bɔ ɔda mvealeɛ nu dwirɛ ali ɔ, na ye yeɛ waye bɔ kyẽa bie okosi ɔ wahyire Nana Nebukadenesa ɔ. Ɛla wɔ bɛen so ne, wɔ laleɛ ne nyekyire bɔ enwuni ne, ye ɛhe:

²⁹ Nana, mmerɛ bɔ né ɛla wɔ bɛen so ne, bɔ kyẽa bie okosi ɔ nwo adwene wale wɔ ti anu, na bɔ ɔda mvealeɛ nu dwirɛ ali ne yeɛ waye bɔ ɔbaasi ɔ wahyire wɔ ɔ.

³⁰ Na me de, nna kyɛ nworɛ yeɛ mese metra ateasefoɛ amukoraa ti ɔ, yeɛ ɔmaa ɔnate so waye sɔ mvealeɛ nu dwirɛ he wahyire me ɔ. Na mmom, Nana, kyɛbɔ ɔkɔyɛ bɔ bekohyire ye bo bekohyire wɔ, ná afei ate edwirɛ bɔ ɔwale wɔ ti anu ne abo ti ɔ.

³¹ “Nana, yieee, enwuni sonaluwaa kandinga bie. Sɔ sonaluwaa kandinga bɔ né wata hyireinn ne, né ogyi wɔ nyunu berɛ, na né ɔyɛ suro.

³² Sonaluwaa ne, ye ti ne te sikaa kɔkorɛ paa, ye hue ne ye sa te dwetɛ, ye ko ne ye sɔ te kɔɔbere,

³³ ye gya te buralɛ, na ye gya tasaa ne, ye bue te buralɛ, yeɛ ye bue koso te ɛfaa.

³⁴ Na egu so bɔ ɛnea ne, nyɔboɛ bie bɔ nna sona sa yeɛ ofindini ye ɔ, ɔte ɔɔbɔle sonaluwaa ne gya tasaa bɔ ɔte buralɛ ne ɛfaa ne, na obubuli ye nyokonyoko.

³⁵ Afei buralɛ ne, ɛfaa ne, kɔɔbere ne, ɛdwetɛ ne ne sikaa kɔkorɛ ne, bɛ nu bubuli nyokonyoko komapɛ, na bɛyɛle kyɛ ahuhuro mmerɛ nu afafu bɔ ɔwɔ nekaa bɔ bɛboro aburoo ɔ; na mvrama bɔle bɛ hɔle bɔ bɛ boso minini ɔ. Nakoso nyɔboɛ bɔ ɔɔbɔle sonaluwaa ne de, ɔyɛle bokaa kandinga, na oyili aseɛ so tɛkyɛ.

³⁶ “Laleɛ ne ɛne; na afei Nana, yɛbaahyire ye bo yɛkyire wɔ.

³⁷ Wɔ, Nana, ɛte ahemvo mɔ bɛ nu hene bɔ nyameɛso Nyameɛ ne wafa ahennie, tumi, anwoserɛ ne animnyam wama wɔ ɔ.

³⁸ Nekaa biala bɔ kuro mmenia, eburo ngaka ne ewienu nnomaa bɛte ne, wafa bɛ wawura wɔ sa, na wamaa ali bɛ mukoraa bɛ so tumi. Wɔ ole sikaa kɔkorɛ tire ne.

³⁹ Efi berɛ a, ahennie bieku bɔ ye tumi ndwu wɔ deɛ ne ɔ kodwɔso; yeɛ afei ahennie bieku bɔ ɔtɔ so nza ɔ kɔwa bɔ ye ole kɔɔbere ne, na okoli hene wɔ aseɛ so amukoraa.

⁴⁰ Afei ahennie bɔ ɔtɔ so nna ne, ye nwo kɔyɛ se kyɛ buralɛ. Na kyɛbɔ buralɛ bubu nningyein, ná ɔnyoko bɛ mukoraa ne, sɔ ala yeɛ ahennie bɔ ɔtɔ so nna ne okobubu bɛ mukoraa kɔnyoko bɛ ɔ.

⁴¹ Na ye gya tasaa ne ye gya mmɛseka bɔ enwuni kyɛ ye bue te ngukuenwonɛniɛ ɛfaa, ná ye bue koso te buralɛ ne, sɔ ala yeɛ ahennie ne anu kɔhyehyɛ ɔ; nakoso buralɛ n’anwoserɛ ne bie kɔha nu, kyɛbɔ enwuni kyɛ buralɛ ne ɛfaa bali afra ne ala.

⁴² Na kyɛbɔ ye gya mmɛseka bue te buralɛ, ná ye bue koso te ɛfaa ne, sɔ ala yeɛ ahennie ne bue bie nwo kɔyɛ se, ná ye bue bie koso kɔyɛ mmerɛ ɔ.

⁴³ Na kyɛbɔ enwuni kyɛ buralɛ ne ɛfaa bali afra ne, sɔ ala yeɛ bɛ ne mmenia bekoli afra ɔ, nakoso bɛngɔmatamata so, kyɛbɔ buralɛ ne ɛfaa benni afra ne.

⁴⁴ Na sɔ ahemvo nemɔ aberɛ so, nyameɛso Nyameɛ kɔma ahennie bɔ ɔngɔsɛkye le ɔ kɔye ye ti, na sɔ ahennie ne, bɛngɔkakyi bengowura maen foforɛ sa. Sɔ ahennie ne kɔsɛkye ahennie nemɔ amukoraa kɔmaa bɛkɔbɔ bɔkɔɔ, nakoso ye de, okogyina afebɔɔ.

⁴⁵ Na kyɛbɔ enwuni kyɛ nyɔboɛ bie, bɔ nna sona sa yeɛ ofindini ye ɔ, ɔte ofili bokaa so wale, bɔ obubuli buralɛ ne, kɔɔbere ne, ɛfaa ne, ɛdwetɛ ne ne sikaa kɔkorɛ ne nyokonyoko nen, Nana, sɔ ala yeɛ Nyameɛ piri ne waye bɔ kyẽa bie ɔbaasi ɔ wahyire wɔ ɔ. Laleɛ ne te nahorɛ, na ye bo hyirelɛ ne koso te turoloo.”

⁴⁶ Yeɛ Nana Nebukadenesa fale ye nyunu butuli berɛ, ɔfale anidie mane Daniel, na ɔhyɛle kyɛ bɛbɔ aleɛ afɔleɛ ne ɛyɛɛ afɔleɛ bɛma Daniel.

⁴⁷ Afei ɛhene ne sele Daniel kyɛ, “Nahorɛ nu, ɛmɔ Nyameɛ ne, ɔte nyameɛ mɔ nu Nyameɛ ne ahemvo mɔ nu Meneɛ, ɔne Nyameɛ bɔ ɔda mvealeɛ nu dwirɛ ali ɔ, ofikyɛ ahora ala sɔ mvealeɛ nu dwirɛ he ali.”

⁴⁸ Yeɛ ɛhene ne bɔle Daniel aba so piri paa, na ɔmane ye akyɛdeɛ bɔ bedi mu ɔ pee, na ɔmaa ɔlale Babilɔn maen ne amukoraa noa, na ɔbɔle ye Babilɔn nworɛfoɛ amukoraa bɛ so panyi paa.

⁴⁹ Afei Daniel srɛle ɛhene ne maa ɔfale Sadrake, Mesake ne Abedinego yɛle Babilɔn maen ne anu amukoraa so neafoɛ; na Daniel de, ɔtenane Nana ahemvie berɛ.