Daniel 10 - AHYERƐLƐ KRONGRON

¹ Pɛsia hene Karose ahennie afoɛ bɔ ɔtɔ so nza ne anu, (Nyameɛ) lale dwirɛ ali hyirele Daniel bɔ bɛtole ye dumaa Beltesasa ne. Edwirɛ ne te nahorɛ, na ɔte dwirɛ bɔ ɔyɛ se ɔ. Daniel tele edwirɛ ne abo, na onyane nyekyire ne anu ndeaseɛ.

² Sɔ mmerɛ ne, me Daniel, né medi aworabɔlɛ dapɛn nza.

³ Manni aleɛ fɛɛ biala, naen anaa nzaa biala anga me noa, yeɛ mambopa toonn dapɛn nza mumua.

⁴ Na bosome bɔ oli moa ne, ye eleburanyɔ ɛlɛnna ne aso, né ngyi asue piri Tigrise noa.

⁵ Ndole me nye anwuro nneane, na nwuni biaa bie bɔ ɔhera nwera bɔ wafa Yufase sikaa kɔkorɛ wayɛ abɔsoɛ ɔ.

⁶ Ye sonaluwaa ne, ɔte kyɛ nyɔboɛ bɔ bɛfrɛ ye bɛrile, ye nyunu te kyɛ agralaa, ye nye mmaa te kyɛ see bɔ ogye wuronyiwuronyi ɔ, ye sa ne ye gya nwo te kyɛ ayaa bɔ bahwi ye nwo ɔ, na odwudwo a ye komvi te kyɛ ɛlɔen komvi.

⁷ Me, Daniel, me ngome yeɛ nwuni nyekyire ne ɔ; ofikyɛ mmenia bɔ né bɛboka me so ne, bannwu nyekyire ne bie, nakoso ɛserɛ kandinga hane bɛ, na bɛnwatili bɛɛfeale.

⁸ Yiti ɔhale me ngome twe wɔ berɛ bɔ né menea nyekyire ne ɔ. Me nwo ngaka tu minini, mmɔle fuin bɔkɔɔ, na me nwo yɛle me hodwoo.

⁹ Afei ndele ye komvi, na ndele ye komvi nen, nde ndɔle berɛ nnafele hatee bɔ né me nyunu butu berɛ ɔ.

¹⁰ Na yieee, asaa bie sɔle me nu, na ɛhe maa ngongone me sa ne me nangoroma so.

¹¹ Na osele me kyɛ, “O Daniel, bɔ Nyameɛ kuro wɔ dwirɛ paa ɔ, tie edwirɛ bɔ mekã mekyire wɔ ye, ná dwɔso gyina berɛ, ofikyɛ basoma me wɔ berɛ.” Na ye noa wɔ so bɔ ɔkã sɔ dwirɛ ne kyire me nen, ndwɔso ngyinane berɛ bɔ né me nwo wosowoso me ɔ.

¹² Yeɛ osele me kyɛ, “Daniel, nnɛsuro, ofikyɛ ofi kyẽa bɔ ɛyɛle w’adwene kyɛ ɛkɔte ye bo, ná ɛbrɛle wɔ nwo ase wɔ wɔ Nyameɛ nyunu nen, wate wɔ sufrɛ ne, na wɔ sufrɛ ne ati yeɛ mawa ɔ.

¹³ Nakoso Pɛsia ahennie nu katakyie ne, osili me ate eleburanyɔ ɛlɛho; yeɛ Mikayɛl bɔ ɔte abɔfo titire nemɔ anu ko ne, ɔɔbokale me, na nyakyili ye wɔ Pɛsia ahennie nu katakyie ne nwo berɛ.

¹⁴ Na bɔ ɔkɔto wɔ maen ne wɔ mmerɛ bɔ oli nziɛ ne anu ne, mawa kyɛ mebaamaa ɛte ye bo. Ofikyɛ sɔ nyekyire he, ɔfa mmerɛ bie bɔ ɔbaawa ɔ nwo.”

¹⁵ Na ɔhane sɔ dwirɛ ne hyirele me nen, mvale me nyunu mutuli berɛ, na ndɔle mumu.

¹⁶ Na yieee, ebie bɔ ɔte kyɛ mmenia mmaa sɛso ɔ ɔfale ye sa hane me noa, na mmukyele me noa ndwudwole. Na nzele bɔ ogyi me nyunu berɛ ne kyɛ, “O me mene, nyekyire ne ama me nwo ngaka atu amini, na mabɔ fuin.

¹⁷ Me mene, wɔ somvoɛ, ɔkɔyɛ sɛɛ né me ne me mene yahora yadwudwo? Ofikyɛ afei de, me nwo ngaka atu amini, na me nwomeɛ ayie.”

¹⁸ Na ebie bɔ ye sɛso te kyɛ kuro sona ɔ ɔfale ye sa hane me, na ɔmane me nwo yɛle me se.

¹⁹ Na osele me kyɛ, “O, wɔ bɔ Nyameɛ kuro wɔ dwirɛ paa ɔ, nnɛsuro, asomdwee hã wɔ, gyina pindinn, ná ma w’ahone yɛ se.” Na odwudwo hyirele me nen, me nwo yɛle me se, na ngane kyɛ, “Me mene, dwudwo, ofikyɛ ama me nwo ayɛ me se.”

²⁰ Yeɛ obisale kyɛ, “Aso ɛse nikyee bɔ yiti yeɛ mawa wɔ berɛ ye? Afei de, ngosa ngɔhɔ me ne Pɛsia katakyie ne yɛkɔɔho, na sɛ mesi nu mekɔ a, tie, Hela katakyie ne kɔwa.

²¹ Nakoso ngɔla bɔ bahyerɛ ye wɔ nahorɛ nwomaa ne anu ali ngohyire wɔ: ebiala ngo bie mmoka me so ndia ɛhemɔ, sana Mikayɛl, ɛmɔ katakyie ne ngome.