Awuye 4 - AHYERƐLƐ KRONGRON

Yerusalem animnyam abɔ ye

¹ Nea, kyɛbɔ esikaa kɔkorɛ wasi wapini ɔ! Kyɛbɔ esikaa kɔkorɛ paa wasi wakakyi ɔ! Bato nekaa krongron berɛ nyɔboɛ nemɔ bapanzam wɔ borɔnoɛ biala ngwandaa.

² Sion mma mmienzua titire, bɔ bɛfa bɛ bɛtoto esikaa kɔkorɛ paa nwo ɔ, ɔwale ye sɛ bɔ bebu bɛ kyɛ ngukue bɔ bafa nnɛterɛ banwo ɔ, bɔ ɔte ngukuenwonɛniɛ ye sa noa adwuma ɔ!

³ Ɛserɛ so ngyea mɔ po, bɛyeye bɛ nyɔfone bɛma bɛ mma mɔ bɛno; nakoso me maen awa brasua akakyi atianuserɛniɛ kyɛ ɛserɛ so soholi mɔ.

⁴ Nzuhɔen ti, adɔma temverema mata ye nnaalɔ. Ngwadaa mɔ bɛsrɛsrɛ aleɛ, nakoso ebiala mma bɛ bie.

⁵ Bɛ bɔ bedi aleɛ fɛɛ ne, ɛhɔen apepɛ bɛ agua dwaaso; bɛ bɔ bɛtetele bɛ wɔ anwonya nu ne, fofoɛ so yeɛ bɛpena bɛ noa aleɛ ɔ.

⁶ Ofikyɛ me maen awa brasua, ye amumuyɛɛ nwo asohwenɛ ne, ɔte piri tra Sodom ye bɔne nwo asohwenɛ deɛ; Sodom bɔ bɛsɛkyele ye mvum nu, bɔ ebiala wandwe ye sa wɔ ye so ɔ.

⁷ Né ye mbanyi mɔ bɛ nwo te tra asukɔtwea, né bɛ fufue tra nyɔfonesue, bɛ nwonaen ne, né ɔboro tra mbaen, ná ne bɛ nwonaen atɔ so te kyɛ kokwaboba.

⁸ Nakoso kekesaala ye de, bɛ nyunu te bire tra ebunaen, na mmenia nwu bɛ wɔ dwaaso a, bennwu mmeni horɛ. Bɛ nwonaen amata bɛ mmowue, bafɔ bayɛ kangenaen.

⁹ Bɛ bɔ bafa ngrandɛ bahũhũ bɛ ne, bɛte paa bɛtra bɛ bɔ ɛhɔen amaa bawuwu ɔ, bɔ bafɔ bayɛ kangenaen, ɔnate fieso aleɛ bɔ wabɔ bɛ ne ati.

¹⁰ Mmrasua bɔ bɛ kunu tete bɛ ɔ, bafa bɛ sa batõ bɛ bɔbɔ bɛ kunu mmaa bafa bakakyi bɛ noa aleɛ, wɔ me maen awa brasua ye amaneɛnwunɛ mmerɛ ne anu.

¹¹ AWURADE ala ye ɛyaafɛlɛ ali wayie, wama ye ahone ahu kandinga paa. Yeɛ wasɔ see wɔ Sion, maa wayera ye fapem nemɔ.

¹² Ahaa aseɛ so ahemvo, yeɛ wiase ama amukoraa bengole bengoli, kyɛ ateeteefoɛ ne pɔfoɛ nemɔ bekoowura Yerusalem pambim nemɔ anu ɔ.

¹³ Ofikyɛ ye ngɔmhyɛlɛfoɛ nemɔ bɛ bɔne, ɔne ye asɔfo nemɔ b’amumuyɛɛ ti yeɛ ɔwale ye sɔ ɔ. Bahã teneneefoɛ mogya bagua wɔ ye nu.

¹⁴ Banate fofalifofali kyɛ anyesiniwaafoɛ wɔ dwaa nemɔ aso. Bafa mogya bagua bɛ nwo fiɛ maa ɔnate so mmenia ngora nzɔ bɛ ndaadeɛ nu.

¹⁵ Mmenia teateane nu sisele bɛ mmango kyɛ, “Ɛ́mɔfi wa bɛhɔ, na ye nwo nde, Ɛ́mɔfi wa bɛhɔ, ɛ́mɔfi wa bɛhɔ, nnɛmɔma ɛmɔ nwo kã bɛ!” Yiti bɛnwatili bɛbɔ bɛsandene, na mmenia kekane ye wɔ Amaenmaensofoɛ nemɔ anu kyɛ, “Yɛ ne bɛ ngɔtena wa ko.”

¹⁶ AWURADE ɛyaafɛlɛ ne abɔ bɛ asande; ɔngɔhɔ so ngɔnea bɛ so ko. Bammu asɔfo nemɔ bɛ dibea, na bamva anidie bamma mbanyi nemɔ.

¹⁷ Mmokalɛ bɔ yɛnnya ye ne, yɛ nye anea ye ate wafɛ. Yawɛne, yawɛne, kyɛ yɛnea maen bɔ ɔngɔhora ngɔpepɛ ngole yɛ ne ate.

¹⁸ Bɛtetɛ yɛ, yiti yɛngora yɛngɔ yɛ dwaa mɔ so: Y’ayieleɛ apingye, yɛ ngyẽa ayie, ofikyɛ y’ayieleɛ adwu.

¹⁹ Yɛ ndaneanyeɛfoɛ mɔ, bɛ nwo yɛ nyera tra ewienu kɔleɛ mɔ. Bɛfoane yɛ wɔ mmokaa nemɔ aso, bɛtetɛle yɛ wɔ ɛserɛ so.

²⁰ Yɛ ngoa nwomeɛ, bɔ yeɛ ole bɔ AWURADE apopa ye ngoo ne, bɛhyele ye wɔ bɛ kumaa nemɔ anu. Ye yeɛ yɛhã yɛfale ye nwo kyɛ, “Ye fɔnwoo ne abo, yeɛ yɛkɔtena wɔ Amaenmaensofoɛ nemɔ anu ɔ.”

²¹ Ao Edom awa brasua, wɔ bɔ ɛte Yuse aseɛ so ɔ, di ahurusi, ná ma wɔ nye gye. Nakoso, wɔ koso, kulie ne kɔpɛ nu kɔwa wɔ so, ɛkɔbo, na ɛkɔye wɔ nwo kɔto so.

²² Ao Sion awa brasua, w’amumuyɛɛ ne nwo akatuaa wawa ayieleɛ, na ɔngɔfa wɔ ngɔhɔ nnurehyelɛ nu ko. Nakoso wɔ, Edom awa brasua de, okootua w’amumuyɛɛ so kerɛ, na ɔkɔma wɔ bɔne kɔla ali.