Awuye 2 - AHYERƐLƐ KRONGRON

AWURADE kɔhwe Yerusalem so

¹ Nea kyɛbɔ AWURADE ole yaa, wafa munungum wamundu Sion awa brasua ne aso ɔ! ná wagyi Yisrael anwonyemene wafi nyameɛso waato ase, bɔ wangaye ye gya bo ndiasoɛ, wɔ ye ɛyaafɛlɛ kyẽa ne anu ɔ.

² AWURADE asɛkye Yakob atenaleɛ amukoraa, na wannwu bɛ anwumvoin. Ye yaafɛlɛ nu, wadwiri Yuda awa brasua n’anwoserɛ afealeɛ mɔ wagua ase. Wahã bɛ wagua ase, wagua ahennie ne, ɔne nu mbanyi mɔ nwo fiɛ.

³ Wapepɛ Yisrael mmɛen amukoraa wɔ ye yaafɛlɛ piri ne anu. Ye tumi asaa ne, wahwe wasa wɔ mmerɛ bɔ pɔfoɛ ne ɔ́ba bɛ so ɔ. Na ogyele kyɛ see bɔ ɔyera bra yia ɔ yerale Yakob.

⁴ Wakondo ye agyaen nu kyɛ pɔfoɛ, wagyina watengyɛ ye sa famaa kyɛ ebie bɔ okyi bɛ ɔ. Ohuhuni bɔ ɔyɛ yɛ nye so nyemene amukoraa, wɔ Sion awa brasua ɛtena sua ne anu. Ohwiele ye yaa bɔ wafɛ ye hahii ne kyɛ see.

⁵ AWURADE akakyi kyɛ pɔfoɛ, wasɛkye Yisrael. Wasɛkye ye ahemvie mɔ amukoraa, wasɛkye ye anwoserɛ afealeɛ mɔ, na wamaa esuɛ ne awuyebɔlɛ basone wɔ Yuda awa brasua ne anu.

⁶ Ole anyeborolɛ ɔsɛkyele ye ɛtena sua kyɛ ɔsɛkye eboo ɔ. Wasɛkye ye nekaa mɔ bɔ beyia nu ne; AWURADE ama bɛ wora afi, aluolue ne afofingyẽa nemɔ wɔ Sion, na ye ahone bɔ wahu ne, wabu ɛhene ne ɔsɔfo animtia.

⁷ AWURADE agyi ye afɔleɛ bokyea ne wato, okyi ye nekaa krongron ne. Ye ahemvie nemɔ, wafa bɛ fasue nemɔ wawura pɔfoɛ ne sa. Babɔ ese wɔ AWURADE awuro berɛ, kyɛ kyẽa bɔ bedi aluolue ɔ.

⁸ AWURADE ayɛ ye adwene kyɛ ɔkɔsɛkye Sion awa brasua fasue ne, wasa nyamaa wafa wasusu, na wanyakyi ye sɛkyelɛ bɔ ɔsɛkye ye ne. Yiti ɔmane ɛwaen ne fasue belili aworabɔlɛ, bɛbɔle nu belili yealɛ.

⁹ Ye pambim nemɔ bamimi bahɔ ase, wasɛkye mmuralɛ bɔ ɔbrambram ye si nemɔ, na wabubu nu; ye hene ne ye mbanyi mɔ baali maen maensofoɛ mɔ nu. Mmeraa ne, ɔnne berɛ ko. Ye ngɔmhyɛlɛfoɛ koso, bennya nyekyire bemvi AWURADE berɛ.

¹⁰ Sion awa brasua ye mbanyi mɔ bɛtete ase, na bayɛ konn. Bafa mvuture bagua bɛ ti so, na baherahera ɛsɛen tena. Yerusalem ababunu nemɔ, basisi bɛ ti ase.

¹¹ Ɛmoen ama me nye ayie bɔ, me kunu tete me. ‘Aworabɔlɛ atira me ɔnate me maen awa brasua bɔ basɛkye ye ne ati, ofikyɛ ngwadaa ne nnɔma mɔ bɛ nye so aburu bɛ wɔ kuro berɛ dwaa nemɔ aso.

¹² Bebisa bɛ maame mɔ kyɛ, “Nisua yeɛ aleɛ ne nzaa wɔ ɔ?” Mmerɛ bɔ bɛ nye so buruli bɛ kyɛ mmenia bɔ bapura wɔ kuro berɛ dwaa nemɔ aso; mmerɛ bɔ bɛka nu wɔ bɛ ni mɔ sa so ne.

¹³ Ao Yerusalem awa brasua, nzikyɛ yeɛ nga mva nni wɔ nwo adanzeɛ ɔ? Nzikyɛ yeɛ mva ndoto wɔ nwo ɔ? Ao Sion awa brasua ababunu, nzikyɛ yeɛ mma ɛne ye bɛsɛ ɔ, amaa ɔnate so makyekye wɔ wora ɔ? Ofikyɛ w’asefinɛ ne te piri kyɛ ɛpo, na nwa yeɛ ɔkɔhora kɔsa wɔ anwonyerɛ ɔ?

¹⁴ Nningyein mbaen mbaen ne nnakannaka yeɛ wɔ ngɔmhyɛlɛfoɛ banwu bama wɔ ɔ; na banna w’amumuyɛɛ ali bɔ ɔnate so kɔmaa bɛkɔye wɔ bekofi nnurehyelɛ nu ɔ. Na mmom ngondombo ne nnakannaka nyekyire yeɛ banwu ye bama wɔ ɔ.

¹⁵ Bɛ bɔ bɛpɛ nu amukoraa bɛbɔ bɛ sa nu bɛgoro wɔ nwo. Besobi bɛ noa bɛwoso bɛ ti begua Yerusalem awa brasua ne aso kyɛ, “Kuro bɔ bɛfrɛ ye: Kuro bɔ ye anwonyemene di mu, aseɛ amukoraa anika ne, aso ye ɛhe?”

¹⁶ Wɔ pɔfoɛ mɔ amukoraa, batu bɛ noa bagua wɔ so. Besobi bɛ noa bɛnwose bɛ gye. Na bɛnwa, “Yasɛkye ye bɔkɔɔ. Amba, kyẽa bɔ yɛnea ye ate ne, ye ɛne; yɛ sa ahã ye, na yanwu ye!”

¹⁷ Bɔ AWURADE yɛle ye adwene kyɛ ɔkɔyɔ ne, wayɔ, wama ye dwirɛ ne awa nu, Ahyɛdeɛ bɔ ɔhyɛ tole berɛ tete mmerɛ nu ne, ye ɛne: wadwiri wagua, na wannwu anwumvoin. Na wama wɔ pɔfoɛ ali wɔ nwo ahurusi, wama bɛ bɔ bekyi wɔ ɔ b’anwoserɛ agyina so.

¹⁸ B’ahone sũ frɛle AWURADE. Ao Sion awa brasua fasue, ma wɔ nye moen poro gua kyɛ asue eyia ne kɔngɔen. Nnɛde wɔ nwome, yeɛ nnɛma wɔ nye kyiremvua yakyi suɛ.

¹⁹ Dwɔso, tea nu kɔngɔen: abunnamu ahyɛaseɛ, hwie wɔ sufrɛ ne kyɛ nzue fa to AWURADE nyunu. Ma wɔ sa so kyire ye, ɔnate wɔ mma mmaa mmaa mɔ bɛ ngoa ti; bɛ yeɛ ɛhɔen apɛ bɛ wɔ borɔnoɛ biala ngwandaa ɔ.

²⁰ Ao AWURADE, tie, ná dwene bɔ afa ɛhe ali ye ne anwo. Aso odi kyɛ mmrasua beku bɛ kunu mmaa bɛto bedi anaa, bɛ mma bɔ badodo bɛ ɔ? Aso odi kyɛ beku ɔsɔfo ne ngɔmhyɛlɛniɛ wɔ AWURADE nekaa krongron berɛ anaa?

²¹ Ngwadaa ne mbanyi, bɛlela aseɛnwo wɔ dwaa nemɔ aso. Me ndaluwa mɔ ne me mmerandeɛ mɔ, batotɔ ngrandɛ noa. Ahũhũ bɛ wɔ wɔ yaafɛlɛ kyẽa ne anu; ahũhũ bɛ, na annwu bɛ anwumvoin.

²² Ato wɔ sa afrɛ m’amaneɛnwunɛ afi nekaa biala, kyɛ aluolue kyẽa ne ala, na ye sɔ ti AWURADE yaafɛlɛ kyẽa ne, ebiala wannya ye ti wannidi nu, yeɛ ebiala wanga. Bɛ bɔ magyi bɛ matete bɛ ne, me pɔfoɛ mɔ ahũhũ bɛ.