Asomafoɛ 4 - AHYERƐLƐ KRONGRON

Petro ne Yohane gyi badwa nyunu

¹ Na mmerɛ bɔ begu so bedwudwo bekyire mmenia nemɔ nen, asɔfo nemɔ ne asɔneyɛɛ sua ne aso safohene ne Sadusiifoɛ nemɔ bɛwale bɛ so.

² Bɛfɛle ɛyaa paa, ofikyɛ né asomafoɛ nyɔ ne yɛ ngyerɛkyerɛ bekyire mmenia nemɔ kyɛ Yesu awu atingye, bɔ odi adanzeɛ koso kyɛ awufoɛ kotingye ɔ.

³ Ɛhe ati bɛhyele bɛ beeguale kuku nu kyɛ aleɛ kye a yeɛ bɛ ne bɛ koli ɔ, ɔnate kyɛ né aleɛ adwo.

⁴ Nakoso bɛ bɔ bɛtele edwirɛ ne, bɛ nu pee bele belili, na mmenia ne somaa ɔɔyɛle kɔyɛ apee nnu.

⁵ Aleɛ hyene ne, Yuda atitirefoɛ ne maen mbanyi ne ahyerɛlɛfoɛ bɛwale beeyiale wɔ Yerusalem.

⁶ Bɛ ne ɔsɔfo panyi paa Anase, yeɛ Kaifa ne Yohane ne Aleksandro ne bɛ bɔ befi ɔsɔfo panyi paa n’abusua nu amu yeɛ beyiale ɔ.

⁷ Bɛfale bɛ beegyinane bɛ nyunu berɛ, na bebisale bɛ kyɛ, “Tumi beni yeɛ ɛmɔgyi so, anaa dumaa beni yeɛ ɛmɔfale so bɛyɔle sɔ nikyee ne ɔ?”

⁸ Na Petro bɔ Sunzum Krongron ayi ye tɛkyɛ ne, obuale bɛ kyɛ, “Maen atitirefoɛ ne mbanyi mɔ,

⁹ sɛ ɛnɛ ɛmɔbisa yɛ dwirɛ bɛfa bubuaniɛ he anwonyerɛsalɛ nwo, kyɛ atee bɔ ɔfale so tele apɔ nwo a,

¹⁰ ye de ɛmɔ amukoraa ne Yisrael maen amukoraa, ɔsɛ kyɛ Nasarɛteniɛ Yesu Kristo bɔ ɛmɔbɔle ye mmeamudua nu, ná Nyameɛ tingyele ye fili awufoɛ nu ne, ye dumaa nu yeɛ wama biaa he bɔ ogyi ɛmɔ nyunu wa ye ye nwo asa ɔ.

¹¹ Na ɛhe ole ‘Nyɔboɛ bɔ ɛmɔ suasilɛfoɛ apo ye, nakoso waayɛ ndweasoɛ nyɔboɛ titire ɔ.’

¹² Na ngoalelɛ nne ebiala nu; ofikyɛ dumaa biala nne nyameɛso bo bɔ bafa bama wɔ adasa mmaa nu bɔ ɔsɛ kyɛ bede yɛ ngoa wɔ nu ɔ.”

¹³ Na benwuni kyɛ Petro ne Yohane b’ahone yɛ se, ná besa benwuni kyɛ bɛte kwahweabaa mɔ bɔ bɛnze nwomaa nen, ɔyɛle bɛ nwanwa; na afei benwuni kyɛ bɛne Yesu yeɛ bɛnatele ɔ.

¹⁴ Na benwuni biaa bɔ wate apɔ bɔ ogyi bɛ nwo berɛ nen, bannya edwirɛ biala banga bandia bɛ.

¹⁵ Yiti bɛmaa bɛhwene bɛ nwo befili badwa nu berɛ bɛhɔle ahameɛ, na bɛhɔle agyina

¹⁶ bebisale bɛ nwo kyɛ, “Mmenia hemɔ koraa, nzikyɛ yeɛ yɛ́fa yɛ́yɛ bɛ ɔ? Ofikyɛ wala ali wɔ ebiala bɔ ɔwɔ Yerusalem ɔ nyunu kyɛ ɔnate bɛ so yeɛ sɛngyerɛnneɛ sonongo he wasi ɔ, na yɛngɔhora yɛngɔkata so.

¹⁷ Na kyɛ ɔkɔyɛ ná edwirɛ ne ngotene maen ne anu ne, ɛ́mɔma yɛbɔ bɛ kɔkɔ kyɛ nnɛmaa bɛbɔ Yesu dumaa bɛka edwirɛ bekyire ebiala ko.”

¹⁸ Yiti bɛfrɛle bɛ maa besa bɛwale dwaa ne anu, na bɛberale bɛ kitii kyɛ atee biala nne berɛ kyɛ bekodwudwo anaakyɛ bɛkɔyɛ ngyerɛkyerɛ wɔ Yesu dumaa nu ɔ.

¹⁹ Na Petro ne Yohane buale bɛ kyɛ, “Sɛ ɔte paa wɔ Nyameɛ nyunu kyɛ yɛtie ɛmɔ yɛtra Nyameɛ a, nzaade ɛmɔ bɔbɔ ɛ́mbua;

²⁰ ɔnate kyɛ, bɔ yɛ yanwu ye ná yate ne de, yɛngɔhora yɛngɔyakyi ye hanɛ.”

²¹ Yiti badwafoɛ ne nwunanwunane bɛ bieku, na bɛyakyili bɛ kyɛ bɛhɔ. Benwuni kyɛ bɛngɔhora ngogyina edwirɛ biala so ngɔhwe bɛ so, ofikyɛ né bɔ wasi ne ati ebiala ye Nyameɛ ayɛ.

²² Biaa bɔ ɔnate anwanwadeɛ he aso nyane ayaresa nen, né ɔbo afoɛ aburanna.

Agyidifoɛ bɔ mbaeɛ srɛ anwoserɛ

²³ Bɛyakyili Petro ne Yohane nene, besa bɛwale bɛ mmango nemɔ berɛ, na bɛhane bɔ asɔfo mbanyi ne maen mbanyi nemɔ bɛhane ne amukoraati behyirele bɛ.

²⁴ Na bɛtele sɔ dwirɛ nen, bɛyɛle ko bɛmane bɛ komvi so bɛbɔle mbaeɛ behyirele Nyameɛ kyɛ, “Awurade Nyameɛ bɔ ɛbɔle anwuro ne aseɛ ne ɛpo ne bɔ ɔwɔ bɛ nu amukoraa ɔ,

²⁵ wɔ bɔ ɛnate Sunzum Krongron so edwudwo fale yɛ nana Dawide bɔ ɔte wɔ somvoɛ ne so kyɛ, ‘Nzu ati yeɛ Amaenmaensofoɛ bɛfɛ yaa hahii, ná maen maen mɔ bɛyɛ nzusuleɛ mbaen ɔ?

²⁶ Aseɛ so ahemvo mɔ besiesie bɛ nwo bɛma koɛ, na atitirefoɛ beyia neka horɛ bedwɔso betia Awurade ne ye Kristo ne.’

²⁷ Ɔte nahorɛ, Herode ne Pontio Pilato ne Amaenmaensofoɛ ne Yisrael maen beyiale sɔ kuro he anu bɛbɔle wɔ Ɛwa Krongron Yesu bɔ apopa ye ngoo ne ti so porɛ.

²⁸ Beyiale nu bɛfale adwene bɛyɔle nikyee biala kyɛbɔ wɔ tumi ne wɔ nhyehyɛleɛ aha ato berɛ kyɛ okosi ne.

²⁹ Awurade, kekesaala ye de, nea b’anwunanwuna ye ná ma wɔ ngoaa ahoneserɛ bɔ yɛkɔfa yɛkɔhã wɔ dwirɛ ne ɔ.

³⁰ Kyire wɔ tumi wɔ anwonyerɛsalɛ nu na boka maa yɛgyina wɔ Somvoɛ Krongron Yesu dumaa nu yɛyɔ anwanwadeɛ ne nzɛngyerɛnneɛ.”

³¹ Beyiele mbaeɛ ne bɔ nen, nekaa bɔ beyiale ne wosole. Sunzum Krongron yili bɛ tɛkyɛ, na bɛfale ahoneserɛ bɛbɔle Nyameɛ dwirɛ ne dawure.

Agyidifoɛ kyɛ bɛ nningyein ma bɛ nwo

³² Agyidifoɛ fekue ne mane b’adwene yɛle ko. Ebiala le tole nu kyɛ ye nikyee biala bɔ ole ye ne ɔtte ye ngome ye deɛ, na mmom ɔte ebiala bɔ ɔwɔ fekue ne anu deɛ.

³³ Asomafoɛ ne fale tumi so lili Awurade Yesu wutingyelɛ ne nwo adanzeɛ, na Nyameɛ hwiele adom pee guale bɛ mukoraa so.

³⁴ Bɛ nu biala nne berɛ bɔ nikyee hiane ye ɔ, ofikyɛ bɛ bɔ bele aseɛ mɔ ne sua mɔ ne, bɛtɔnetɔnene bɛ, na bɛfale sikaa bɔ benya befili nu ne

³⁵ bɛbrɛle asomafoɛ ne; na bɛ koso bɛhyɛ bɛmane ebiala nyane bie, kyɛbɔ ohia ɔ.

³⁶ Sɔ ala koso yeɛ Yosef bɔ bɛwole ye Kipro na ofi Lewi abusua nu yɔle ɔ. Asomafoɛ ne tole ye dumaa Banaba (bɔ ye bo kyire “sona bɔ ɔhyɛ nguraen.”)

³⁷ Ɔtɔnene ye aseɛ, na ɔfale sikaa ne brɛle asomafoɛ nemɔ.