Asomafoɛ 26 - AHYERƐLƐ KRONGRON

Pɔɔlo sa ye nwo kyire Nana Agripa

¹ Na Agripa sele Pɔɔlo kyɛ, “Atee wɔ berɛ kyɛ ekyire wɔ noa dwirɛ ɔ.” Yeɛ Pɔɔlo tengyɛle ye sa yele ye noa kyɛ,

² “Nana Agripa, ɔyɛ me fɛ paa kyɛ ɛnɛ kyẽa ye ngyi wɔ nyunu mesa me nwo wɔ kwaadu wora bɔ Yudafoɛ babɔ me ne nwo ɔ,

³ ye titire ne, wɔ de ɛse Yudafoɛ amanneɛ mukoraa ne nningyein ahoroɔ bɔ yɛsu bɛ nwo aporowaa ɔ. Yiti mesrɛ wɔ ala, nya aboterɛ na tie me.

⁴ “Yudafoɛ mukoraa se m’abrabɔ nu dwirɛ fite me ngwadaa nu. Bɛse kyɛbɔ masi mabɔ me bra mukoraa wɔ me bɔbɔ me manzini nu ne Yerusalem ɔ.

⁵ Bɛse me dada, na sɛ bekoli adanzeɛ po a, ofi ye ahyɛaseɛ ne amukoraa, nde Farisii fekue bɔ odi yɛ som mmeraa so pɛpɛɛpɛ ne anu niɛ.

⁶ Na ɔnate kyɛ anyelasoɛ wɔ berɛ ma me wɔ bɔhyɛ bɔ Nyameɛ bɔle yɛ nana mɔ ne anu ti, kekesaala ye ngyi wa yeɛ bebua me ndɛen ɔ.

⁷ Na sɔ bɔhyɛ komapɛ ne ala yeɛ yɛ mmusua kure buru ne nyɔ ne bɛ nye la so kyɛ bekonya ɔ, na bɛsɔne Nyameɛ alehyeleɛ ne alesaleɛ biala. Nana Agripa, ɔnate anyelasoɛ he ati yeɛ Yudafoɛ afa edwirɛ ato me so ye.

⁸ Na nzu ati yeɛ ɔyɛ se ma ɛmɔ, Yudafoɛ, kyɛ ɛmɔkole bekoli kyɛ Nyameɛ tingye awufoɛ ɔ?

⁹ “Me bɔbɔ nyɛle kyɛ odi kyɛ meyɔ nningyein pee mefa meko metia Nasarɛteniɛ Yesu ne dumaa.

¹⁰ Na nikyee bɔ nyɔle ye wɔ Yerusalem hɔ ɛne. Nyane tumi mvili asɔfo mbanyi nemɔ berɛ, na ndole agyidifoɛ pee kuku nu. Né beku bɛ po a, me koso mefoa so kyɛ behũ bɛ.

¹¹ Ndaa ndwene bɛ so wɔ nyianu sua biala nu, na mmɔle mmɔden kyɛ ngɔhyɛ bɛ maa bɛkɔpa bɛ gyidie si ɔ. Me nye borole bɛ so paa maa afei de po ndanene bɛ nye alaa ngondwuli amanvrafoɛ nguro so.

Pɔɔlo adwenesakyera nwo dwirɛ

¹² “Ɔnate ɛhe ati asɔfo mbanyi ne mane me ate ɔne tumi krataa kyɛ ngɔ Damasko.

¹³ Atee ne anu, eyiagyina, Nana, yeɛ nwuni kyɛ kanea bie bɔ ɔta tra eyia fi nyameɛso wale ɔɔpɛle me ne me mmango bɔ me ne bɛ nate ne nwo bra yiale ɔ.

¹⁴ Yɛ mukoraa yɛpepɛ yɛfini, na ebie dwudwo hyirele me wɔ Hebri dwudwolɛ nu kyɛ, ‘Sɔɔlo, Sɔɔlo, nzu ati yeɛ ɛtane me nye ye? Ɔyɛ se kyɛ ekotu wɔ gya kɔfa kɔwɔ nandwiehanɛniɛ ye pɔmaa noa buralɛ ɔ.’

¹⁵ Na nzele kyɛ, ‘Wɔ nwa ɛne, Awurade?’ Na Awurade buale me kyɛ, ‘Me ole Yesu bɔ ɛtane ye nye ne.

¹⁶ Nakoso dwɔso gyina wɔ gya so. Na ɛhe ati yeɛ ɔmaa nyele me nwo ali ngyirele wɔ ɔ; maye wɔ kyɛ ɛyɛ me somvoɛ ne danzeniɛ wɔ nningyein bɔ anwu ye ne bɔ mebaaye mekyire wɔ ne nwo.

¹⁷ Ngɔbɔ wɔ nwo waen ngofi Yisraelfoɛ ne Amaenmaensofoɛ bɔ mesoma wɔ maa ɛkɔ bɛ berɛ ne sa nu.

¹⁸ Memaa ekobukye bɛ nye, ná ɛye bɛ fi awosii nu ba kanea nu, na ɛye bɛ fi Abɔnzam tumi bo ɛfa bɛ ba Nyameɛ berɛ; amaa banya bɔnefakyɛ, ne tenaberɛ wɔ bɛ bɔ bafa bɛ gyidie bɔ ɔwɔ me nu bate bɛ nwo nemɔ anu.’

Pɔɔlo ka ye adwumayɔlɛ nwo dwirɛ

¹⁹ “Yiti, Nana Agripa, manyɛ asoserɛ wɔ nyameɛso nyekyire ne nwo.

²⁰ Na nnili moa ngane edwirɛ ne wɔ Damasko, afei Yerusalem, ɔne Yudea maen ne anu mukoraa, ɔne Amaenmaensofoɛ nu; kyɛ bɛsakyera b’adwene bɛbra Nyameɛ berɛ na bɛbɔ bra bɔ okyire kyɛ basakyera b’adwene ɔ.

²¹ Ɔnate ɛhe ati Yudafoɛ hyele me wɔ asɔneyɛɛ sua nu bɔ ahaa bɛpena kyɛ beku me ɔ.

²² Nakoso Nyameɛ abɔ me nwo waen alaa maa waadwu ɛnɛ kyẽa ye; yiti yeɛ ɔmaa ngyi wa medi adanzeɛ mekyire mmenia mukoraa ɔ: atitire ne kwahweabaa mɔ. Na edwirɛ bɔ ngɔmhyɛlɛfoɛ ne Mose hã tole berɛ kyɛ okosi ne ala yeɛ mekã ɔ:

²³ kyɛ Kristo ne konwu amaneɛ okoli moa kodwɔso kofi awufoɛ nu ná wabɔ kanea ne nwo dawure wahyire Yudafoɛ ne Amaenmaensofoɛ.”

²⁴ Na Pɔɔlo wɔ so bɔ ɔye ye noa nen, Festo teane ye kyɛ, “Pɔɔlo, w’adwene nyɛ adwuma! Wɔ nwomaa sualɛ pembe ne abɔ afa wɔ ti anu!”

²⁵ Na Pɔɔlo buale kyɛ, “Daasebrɛ Festo, m’adwene yɛ adwuma! Na mmom nahorɛ turoloo yeɛ mekã ɔ.

²⁶ Ofikyɛ Nana se sɔ dwirɛ hemɔ amu, na masi m’ahone yeɛ mekã mekyire ye ɔ; yeɛ mede medi koso kyɛ ɛhemɔ nu biala nne berɛ bɔ ɔnze ɔ, ɔnate kyɛ banyɔ ɛhemɔ nu biala wɔ mvealeɛ nu.

²⁷ Nana Agripa, aso ede ngɔmhyɛlɛfoɛ nemɔ dwirɛ di? Mese kyɛ ede di.”

²⁸ Na Agripa sele Pɔɔlo kyɛ, “Ɔhale kãa ná ɛmaa nyɛle Kristoniɛ!”

²⁹ Na Pɔɔlo buale kyɛ, “Sɛ ɔhale kãa oo, ɔhhale kãa oo, me de mesrɛ Nyameɛ kyɛ nna wɔ ngome, na mmom bɛ bɔ betie me ɛnɛ ye amukoraa koso kɔyɛ kyɛ me ala; sana ngɔnzɔngɔnzɔ bɔ ogua me ye yeɛ ɔbboka so ɔ!”

³⁰ Afei ɛhene ne, amrado ne, yeɛ Bɛnise ne bɛ bɔ baha ne amu dwɔsole.

³¹ Befili berɛ bɛhɔle ahameɛ kãa, na besisele bɛ nwo kyɛ, “Sɔ biaa he ɔyyɔle nikye fee bɔ ɔfata ewue anaa kuku nu nnaa ɔ.”

³² Na Agripa sele Festo kyɛ, “Sɛ biaa he anga kyɛ okuro kyɛ ye dwirɛ ne dwu Kaesare nyunu de a, ahaa ɔsɛ kyɛ yɛyakyi ye maa ɔkɔ.”