Asomafoɛ 25 - AHYERƐLƐ KRONGRON

Pɔɔlo to ye dwirɛ ne ma Kaesare

¹ Festo wale manzini ne anu ne, ye ɛlɛsa ne aso ofili Kaesarea hɔle Yerusalem.

² Na asɔfo mbanyi ne Yuda mbanyi toatoale Pɔɔlo behyirele ye,

³ na bɛsrɛle ye kyɛ ɔlo bɛ ná ɔsoma ma bɛfa Pɔɔlo bɛbra Yerusalem; ɔnate kyɛ né babɔ porɛ kyɛ bɛkɔtɛ ye atunu bekohu ye.

⁴ Na Festo buale bɛ kyɛ, “Pɔɔlo la kuku nu wɔ Kaesarea, na me bɔbɔ po ɔngɔhyɛ ngosa ngɔhɔ dɔ.

⁵ Yiti ɛ́mɔma ɛmɔ nu mbanyi nemɔ ne me hɔ Kaesarea, na sɛ akoaa ne ayɔ bɔne bie a, babɔ ye kwaadu.”

⁶ Festo lili ɛlɛbɔtwɛ bɔ ɔkɔ eleburu wɔ Yerusalem, na afei osa hɔle Kaesarea. Aleɛ hyene ne, ɔɔtenane ye ndɛenbualɛ bia nu, na ɔmaa bɛɛfale Pɔɔlo bɛwale.

⁷ Na Pɔɔlo wale ne, Yudafoɛ bɔ befili Yerusalem bɛwale ne, bɛpɛle ye nwo kango, na bɛpepɛle edwirɛ mbirikua pee beguale ye so, bɔ bɛ bɔbɔ po bangora bangyire nu ɔ.

⁸ Nakoso Pɔɔlo sale ye nwo kyɛ, “Nnyɔle hwee nndiale Yudafoɛ mmeraa, anaa asɔneyɛɛ sua ne, anaa Roman hene Kaesare.”

⁹ Nakoso né Festo kuro kyɛ ɔyɔ nikyee ma Yudafoɛ nemɔ nye sɔ, yiti obisale Pɔɔlo kyɛ, “Ekuro kyɛ ɛkɔ Yerusalem ɛkɔye kwaadu hemɔ noa wɔ me nyunu wɔ dɔ anaa?”

¹⁰ Na Pɔɔlo buale ye kyɛ, “Ngyi Kaesare bɔbɔ deinn ye kɔɔto, na ɛwa yeɛ ɔsɛ kyɛ bedi me dwirɛ ɔ. Na kyɛbɔ wɔ bɔbɔ ɛse ne, nnyɔle Yudafoɛ bɔne biala.

¹¹ Na sɛ mabu mmeraa ne aso, anaa mayɔ nikyee bɔ ɔfata ewue hɔ a, menzrɛ kyɛ nnɛma beku me. Nakoso sɛ nahorɛ biala nne kwaadu bɔ bafa babɔ me ne anu de a, ye de ebiala ngɔhora ngɔye me ngɔma bɛ. Yiti mefa me dwirɛ meto Kaesare nyunu.”

¹² Festo ne ye badwafoɛ hane bɛ ti purale, na obuale kyɛ, “Sɛ afa wɔ dwirɛ ato Kaesare nyunu de a, nzaade ɛkɔhɔ Kaesare dɔ.”

Festo bɔ Nana Agripa amaneɛ

¹³ Na ngyẽa kãa bie asi ne, Nana Agripa ne Bɛnise bɛwale Kaesarea kyɛ bɛbaasra Festo ná bɛyɛ ye akwaaba.

¹⁴ Belili ngyẽa dɔnn wɔ berɛ ne, Festo fale Pɔɔlo nwo dwirɛ tole ɛhene ne nyunu kyɛ, “Biaa bie wɔ wa bɔ Felise yakyili ye kuku nu ɔ.

¹⁵ Ngɔle Yerusalem nen, Yuda asɔfo mbanyi ne maen mbanyi bɔle ye kwaadu hyirele me, na bɛsrɛle me kyɛ mmua ye foɛ.

¹⁶ Na me koso mmuale bɛ kyɛ, ɔtte yɛ Romanfoɛ mmeraa kyɛ yɛkɔye sona biala bɔ babɔ ye kwaadu kɔmaa bekohu ye ɔ; sana ɔne ye kwaadubɔlɛfoɛ nemɔ beyia bɛbɔ nguro, ná onya atee ye ye noa koraa.

¹⁷ Ɛhe ati bɛwale wa nen, mammobɔ edwirɛ ne mando berɛ. Na aleɛ hyene ne, ndenane ase wɔ kɔɔto berɛ, na nyɛle kyɛ bɛfa biaa ne bɛbra.

¹⁸ Ye kwaadubɔlɛfoɛ nemɔ dwɔsole, na bammɔ ye kwaadu biala wɔ nzɛmmɔne bɔ nzusuli kyɛ wali ne nwo;

¹⁹ na mmom bɛ bɔbɔ bɛ nyamesom nwo aporowaa, ɔne Yesu bie bɔ wawu nakoso Pɔɔlo nwa ɔte ase nwo aporowaa yeɛ bɛ ne ye suli ɔ.

²⁰ Né mengora menwu atee horɛ bɔ mva so nneanea sɔ dwirɛ he anu ɔ. Yiti mmisale Pɔɔlo sɛ ebiaa okuro kyɛ ɔkɔ Yerusalem maa bekodi ye dwirɛ ne wɔ dɔ anaa.

²¹ Nakoso Pɔɔlo srɛle kyɛ bɛ́fa ye bésie, ná bɛ́fa edwirɛ ne bɛhɔ Kaesare nyunu mmom. Yiti mamaa bafa ye basie kodwu kyɛ ngɔmaa bɛ ne ye kɔhɔ Kaesare berɛ ɔ.”

²² Na Nana Agripa sele Festo kyɛ, “Mekuro kyɛ me bɔbɔ deinn metie biaa he noa dwirɛ.” Na obuale kyɛ, “Ɛhema né atie ye noa dwirɛ.”

Pɔɔlo gyi Agripa ne Bɛnise nyunu

²³ Yiti aleɛ hyene ne, Nana Agripa ne Bɛnise hyehyɛle bɛ nwo wale ahomeka nu, na bɛ ne asraafoɛ mbanyi ne kuro ne anu mmenia titire hɔle nekaa bɔ bedi dwirɛ ne; na Festo maa bɛɛfale Pɔɔlo bɛwale.

²⁴ Festo hane kyɛ, “Nana Agripa ne ɛmɔ bɔ bayia wa mukoraa, ɛmɔanwu biaa he? Yudafoɛ amukoraa afa ye nwo dwirɛ ato me nyunu wɔ Yerusalem ne ɛwa, na bɛnwa ɔnzɛ kyɛ ɔtena ngoa nu ko ɔ.

²⁵ Nakoso, menea a, ɔyyɔle nikye fee bɔ ɔfata ewue ɔ. Na kyɛbɔ ye bɔbɔ ɔnwa bɛfa edwirɛ ne bɛhɔ Kaesare gya so ne ati, mayɛ kyɛ memaa bɛfa ye bɛkɔ.

²⁶ Nakoso mennwu edwirɛ pɔtee bɔ ngyina so ngyerɛ mva ye nwo ngɔma me mene Kaesare ɔ. Yiti mafa ye mawa ɛmɔ nyunu wa, ye titire, wɔ Nana Agripa nyunu; amaa sɛ yɛneanea ye dwirɛ ne anu a, manya edwirɛ bie mahyerɛ.

²⁷ Ɔnate kyɛ menea a, nworɛ biala nne nu kyɛ ngɔmaa bɛkɔfa kukununiɛ bɛkɔhɔ ná mangyire kwaadu horɛ bɔ bafa babɔ ye ɔ.”