Asomafoɛ 23 - AHYERƐLƐ KRONGRON

¹ Pɔɔlo tole ye nye neane badwafoɛ ne haa na osele kyɛ, “Aliɛmaa mɔ, me tiboa mmua me foɛ wɔ me bra bɔ mabɔ wɔ Nyameɛ nyunu tonn maa waadwu ɛnɛ ye nwo.”

² Na ɔsɔfo panyi paa Anania hyɛle bɛ bɔ begyigyi Pɔɔlo nwo berɛ ne kyɛ befi ye noa so.

³ Yeɛ Pɔɔlo koso sele ye kyɛ, “Wɔ yeɛ Nyameɛ kɔbɔ wɔ ɔ. Wɔ, fasue bɔ bahã ye nwo fufue ɔ! Wɔ yeɛ ɛte berɛ egyina mmeraa ne aso ebua me ndɛen ɔ, nakoso wɔ wora ebu mmeraa ne aso ɛhyɛ kyɛ bɛbɔ me!”

⁴ Na bɛ bɔ begyigyi berɛ ne sele ye kyɛ, “Yiti Nyameɛ sɔfo panyi paa yeɛ ɛwɔ ye safure ye?”

⁵ Na Pɔɔlo buale kyɛ, “Aliɛmaa mɔ Yisraelfoɛ, né menze kyɛ ɔte ɔsɔfo panyi paa ɔ; ofikyɛ bahyerɛ kyɛ, ‘Ɔnzɛ kyɛ ɛkã wɔ maen panyi nwo dwirɛ tɛɛ ɔ.’ ”

⁶ Na mmerɛ bɔ Pɔɔlo nwuni kyɛ mmenia ne bue bɛte Sadusiifoɛ, ná bɛ bue koso bɛte Farasiifoɛ nen, ɔteane nu wɔ badwa ne anu kyɛ, “Aliɛmaa mɔ, nde Farasiiniɛ, Farasiifoɛ awa; na ɔnate awufoɛ etingyelɛ ne ye nwo anyelasoɛ ti yeɛ bébua me ndɛen ye”

⁷ Na ɔhane sɔ dwirɛ ne pɛ, edwudwolɛ wale Farasiifoɛ ne Sadusiifoɛ nemɔ b’afia, na mmenia ne anu hyɛle nyɔ.

⁸ Ɔnate kyɛ Sadusiifoɛ ne nwa awufoɛ dwɔsolɛ anaa abɔfo anaa sunzum biala nne berɛ; nakoso Farasiifoɛ ne de, bede ye mukoraa bedi.

⁹ Bɛteateane nu serɛserɛ, na ahyerɛlɛfoɛ biemɔ bɔ bɛwɔ Farasiifoɛ fekue ne anu bedwɔso bedwudwole anyeborolɛ so kyɛ, “Yɛnnwu bɔne biala wɔ sɔ biaa he nwo. Ebie po a, né sunzum anaa abɔfo bie yeɛ odwudwo hyirele ye ɔ. Nnɛmɔma yɛko yɛtia Nyameɛ!”

¹⁰ Afei ɛtealɛ ne hɔle so serɛserɛ maa safohene ne surole kyɛ bɛkɔtete Pɔɔlo nu pasapasa koraa. Yiti ɔhyɛle ye asraafoɛ nemɔ kyɛ bedwu bɛhɔ mmenia ne anu dɔ beefoti ye befi bɛ sa nu, ná bɛfa ye bɛhɔ b’adwuma nu dɔ.

¹¹ Sɔ kɔngɔen ne, Awurade wale oogyinane Pɔɔlo nwo berɛ sele ye kyɛ, “Nnɛsuro! Na kyɛbɔ ali me nwo adanzeɛ wɔ Yerusalem nen, sɔ ala koso yeɛ odi kyɛ edi me nwo adanzeɛ wɔ Rome ɔ.”

Yudafoɛ biemɔ bɔ Pɔɔlo ti so porɛ

¹² Aleɛ hyene nen, Yudafoɛ biemɔ yɛle ko bɛfale adwene; na bɛtale ndaen kyɛ bengodidi anaa bɛngɔno hwee, sana banya Pɔɔlo bahu ye koraa.

¹³ Mmenia bɔ bɛbɔle sɔ porɛ ne bɛbo aburanna.

¹⁴ Na bɛhɔle asɔfo mbanyi ne maen mbanyi nemɔ berɛ beesele bɛ kyɛ, “Yata ndaen kyɛ ɛhwee ngɔhã yɛ noa, sana yahu Pɔɔlo koraa.

¹⁵ Yiti ɛmɔ ne badwafoɛ ne bɛbɔ nu bɛsoma ma beese Roman safohene ne kyɛ ɔma bɛfa Pɔɔlo bɛbrɛ ɛmɔ; kyɛ ɛmɔpena kyɛ ɛmɔneanea ye dwirɛ ne anu yé. Na yɛ de, kyɛ ɔyɛ na oodwu wa ne, né yahu ye dadaada.”

¹⁶ Nakoso Pɔɔlo awosea bienzua tele kyɛ bɛkwaatɛ ye atunu; yiti ɔhɔle asraafoɛ nemɔ b’adwuma nu berɛ ɔɔbɔle Pɔɔlo amaneɛ.

¹⁷ Na Pɔɔlo frɛle asraafoɛ mbanyi ne ko sele ye kyɛ, “Fa sɔ aberandeɛ ye kɔ safohene ne berɛ, na ole dwirɛ kã kyire ye.”

¹⁸ Yiti ɔfale aberandeɛ ne hɔle safohene ne berɛ, na ɔhane kyɛ, “Kukununiɛ Pɔɔlo frɛle me srɛle me kyɛ mva sɔ aberandeɛ ye mmra wɔ berɛ, na ole dwirɛ kã kyire wɔ.”

¹⁹ Na safohene ne sɔle aberandeɛ ne sa fale ye hɔle ahameɛ, na obisale ye kyɛ, “Nzikyɛ dwirɛ yeɛ ele ye kã kyire me ɔ?”

²⁰ Na obuale kyɛ, “Yudafoɛ abɔ porɛ kyɛ bɛkɔɔsrɛ wɔ maa ɛhema ɛkɔfa Pɔɔlo kɔbrɛ badwafoɛ ne, kyɛ bɛkwaaneanea ye dwirɛ ne anu yé.

²¹ Nakoso nnɛtɛ bɛ so, ɔnate kyɛ bɛ nu biemɔ kɔbo aburanna kɔtɛ ye atunu; na bata ndaen kyɛ bengodidi anaa bɛngɔno hwee, sana banya ye bahu ye koraa. Yiti kekesaala ye, baboaboa bɛ nwo, na bɛnwondɛ kyɛ ɛkɔpene so ɔ.”

²² Na safohene ne hyɛle aberandeɛ ne kyɛ, “Nnɛbɔ so kyire ebiala kyɛ aha sɔ dwirɛ ne ahyire me!” Na afei ɔmaa ɔhɔle.

Bɛfale Pɔɔlo bɛɛmane amrado Felise

²³ Safohene ne frɛle asraafoɛ mbanyi nyɔ sele bɛ kyɛ, “Ɛmɔboaboa asraafoɛ ɛyaa nyɔ, pɔngɔhanɛfoɛ aburasoo, yeɛ bɛ bɔ bɛto pealɛɛ wora ɛyaa nyɔ noa ma bɛhɔ Kaesarea. Ɛ́mɔma betu bɛ bo kɔngɔen nnɔngono.

²⁴ Ɛ́mɔsiesie mbɔngɔ bɛ́ma Pɔɔlo, ná ɛ́mɔbɔ ye nwo waen bɛɛfa ye bɛma amrado Felise.”

²⁵ Na safohene ne hyerɛle sɔ krataa he maa bɛhɔle:

²⁶ “Me, Klɔdio Lisia yeɛ mekyerɛ krataa he mebrɛ Daasebrɛ amrado Felise ɔ; mebisa wɔ.

²⁷ Yudafoɛ hyele sɔ biaa he, na ɔhale kãa bie maa behuni ye. Ndele kyɛ ɔte Romanniɛ, yiti me ne asraafoɛ nemɔ yɛhɔle berɛ yɛɛpepɛ yɛlele ye.

²⁸ Né mepena kyɛ menwu nikye horɛ bɔ bɛnwa wayɔ ɔ, yiti mvale ye ngɔle bɛ badwafoɛ nemɔ nyunu.

²⁹ Nakoso nwuni kyɛ ɔyyɔle nikyee biala bɔ ɔfata ehunɛ anaakyɛ kuku nu tolɛ ɔ; na mmom bɛ bɔbɔ bɛ mmeraa nwo yeɛ babɔ ye kwaadu ɔ.

³⁰ Afei ndele ye nwo bie kyɛ babɔ ye ti so porɛ bɔ bɛpena ye beku ye ɔ. Ɛhe ati nyɛle m’adwene berɛ ne ala kyɛ bɛfa ye bɛbrɛ wɔ; na mahã mahyire ye kwaadubɔlɛfoɛ nemɔ kyɛ bɛbra wɔ nyunu bɛɛbɔ ye kwaadu.”

³¹ Na kyɛbɔ safohene ne hyɛle asraafoɛ nen, bɛfale Pɔɔlo kɔngɔen ne bɛ ne ye hɔle tonn beedwuli Antipatri.

³² Aleɛ hyene ne, asraafoɛ bɔ bɛnate ase ne sa wale b’adwuma nu; na bɛyakyili pɔngɔhanɛfoɛ nemɔ maa bɛ ne Pɔɔlo toale so bɛhɔle.

³³ Bɛ ne ye hɔle beedwuli Kaesarea, bɛyele krataa ne bɛmane amrado ne, na bɛfale Pɔɔlo koso bewurale ye sa.

³⁴ Amrado ne kengale krataa ne, na obisale Pɔɔlo manzini horɛ bɔ ofi nu ɔ. Na ɔtele kyɛ ofi Kilikia nen,

³⁵ ɔhane kyɛ, “Sɛ wɔ kwaadubɔlɛfoɛ nemɔ bɛba a, yeɛ ngotie wɔ noa dwirɛ ɔ.” Na ɔhyɛle kyɛ bɛfa Pɔɔlo besie Herode ahemvie ne anu.