Asomafoɛ 22 - AHYERƐLƐ KRONGRON

¹ “Aliɛmaa mɔ ne ngya mɔ, ɛ́mɔtie edwirɛ bɔ mekã mefa mesa me nwo mekyire ɛmɔ ye.”

² Mmerɛ bɔ bɛtele kyɛ ɔkã Hebri dwudwolɛ kyire bɛ ne, bɛyɛle konn paa, na osele bɛ kyɛ,

³ “Nde Yudaniɛ, bɛwole me Taaso bɔ ɔwɔ Kilikia manzini nu. Bɛtetele me wɔ kuro ye anu, na Gamaliɛl yeɛ ohyirele me nikye ɔ. Ɔfale yɛ nana mɔ mmeraa ne hyirele me nikyee pɛpɛɛpɛ, na nduli me nwo nziele berɛ mane Nyameɛ kyɛbɔ ɛnɛ ye ɛmɔ amukoraa bɛyɔ ne.

⁴ Ndanene bɛ bɔ beli Atee he si nye maa behuni bɛ. Ngyekyele mmienzua ne mmrasua maa bɛfale bɛ beguale kuku nu,

⁵ na ɔsɔfo panyi paa ɔne badwafoɛ ne amu di me adanzeɛ. Nyane tumi ngrataa mvili bɛ berɛ kyɛ mekwaafa mema me mmango Yudafoɛ bɔ bɛwɔ Damasko. Yiti nzili nu kyɛ mekwaahye berɛ agyidifoɛ na mefa bɛ meba Yerusalem maa bɛtwe bɛ so.

Pɔɔlo ka kyɛbɔ osi yɛle gyidiniɛ ɔ

⁶ “Na mbene atee so bɔ mekɔ na mbingyele Damasko nen, kɔyɛ eyiagyina mmerɛ ne, mvum nu, kanea totohyia bie fili nyameɛso ɔɔtale me nwo bra yiale.

⁷ Mbɛ mvini, na ndele kyɛ ebie dwudwo kyire me kyɛ, ‘Sɔɔlo, Sɔɔlo, nzu ati yeɛ ɛtane me nye ye?’

⁸ Na mmisale kyɛ, ‘Wɔ nwa ɛne, Awurade?’ Na osele me kyɛ, ‘Me ole Yesu bɔ ofi Nasarɛte bɔ ɛtane ye nye ne.’

⁹ Mmenia bɔ né bɛboka me so ne nwuni kanea ne, (ɛserɛ hane bɛ), nakoso bande bɔ né ɔne me dwudwo ne komvi.

¹⁰ Na mmisale kyɛ, ‘Awurade, nzikyɛ yeɛ nyɔ ɔ?’ Na Awurade sele me kyɛ, ‘Dwɔso na kɔ Damasko, na berɛ yeɛ bɛkɔhã nikyee biala bɔ Nyameɛ ahyehyɛ kyɛ ɛyɔ bekohyire wɔ ɔ.’

¹¹ Kyɛbɔ kanea ne si tale ne mane me nye sini, yiti bɛ bɔ né bɛboka me so ne sosɔle me sa fale me hɔle Damasko.

¹² “Né biaa bie bɔ bɛfrɛ ye Anania, bɔ ɔte nyamesuroniɛ paa kyɛbɔ yɛ mmeraa si te ɔ wɔ kuro berɛ. Yudafoɛ mukoraa bɔ ye dumaa paa.

¹³ Oogyinane me nwo berɛ sele me kyɛ, ‘Aliɛmaa Sɔɔlo, sa nwu nikye!’ Berɛ ne ala, nza nwuni nikye, na nwuni ye.

¹⁴ Na ɔhane kyɛ, ‘Yɛ nana mɔ Nyameɛ ne, waneanea nu waye wɔ kyɛ enwu ye apɛdeɛ, ná enwu ye Teneneeniɛ ne, na ɛte ye bɔbɔ ye noa nu dwirɛ,

¹⁵ ɔnate kyɛ ɛkɔyɛ ye danzeniɛ nã ahã bɔ anwu ye ne bɔ ate ne ahyire mmenia mukoraa.

¹⁶ Na afei, nzu ati yeɛ ɛyɛ ngyɛkyerɛ ɔ? Dwɔso nya Awurade nu gyidie, na ma bɛbɔ wɔ asu benwunzi wɔ bɔne begua.’

Pɔɔlo ka nzɛmba kyire Amaenmaensofoɛ

¹⁷ “Na ɔwale kyɛ nza male Yerusalem ná mebɔ mbaeɛ wɔ asɔneyɛɛ sua nu ne, ngɔle nyekyire tebea nu.

¹⁸ Nwuni Awurade, na osele me kyɛ, ‘Ma wɔ nwo yɛ nyera ná fi Yerusalem, ofikyɛ bengole w’adanzeɛ bɔ ekoli kɔfa me nwo ne ngɔto nu.’

¹⁹ Na me koso mmuale kyɛ, ‘Awurade, bɛse ye pefee kyɛ ngɔngyekyele bɛ bɔ bede wɔ bedi ne nguale kuku nu, na mmole bɛ wɔ nyianu sua biala nu.

²⁰ Na mmerɛ bɔ behwie w’adanzeniɛ Setefano mogya begua ne, né me koso nwɔ berɛ bie, mbenene ye hunɛ ne aso, na nneane bɛ bɔ behuni ye ne ndaadeɛ so mane bɛ.’

²¹ Na Awurade sele me kyɛ, ‘Kɔ, na ngɔsoma wɔ dedeede maa ɛkɔhɔ Amaenmaensofoɛ berɛ.’ ”

Pɔɔlo ne Rome safohene ne

²² Ɛlɔen ne tiele Pɔɔlo tonn maa oodwuli edwirɛ he aso, na afei bɛteateane nu kyɛ, “Behu sɔ akoaa he befi aseɛ ye aso! Ɔnate kyɛ ɔmvata kyɛ ɔtena ase ɔ.”

²³ Na bɛteatea nu benwunya bɛ ndaadeɛ, ná bɛto mvuture bɛkɔ anwuro ne,

²⁴ Roman safohene ne mane ye asraafoɛ nemɔ bɛfale Pɔɔlo bɛhɔle b’adwuma nu dɔ, na ɔhyɛle kyɛ befi ye mbire ma ɔha nikye horɛ bɔ yiti yeɛ batu bɛ noa bagua ye so sɔ ne.

²⁵ Na mmerɛ bɔ bɛ́fa nyamaa bɛ́kyekye Pɔɔlo ne, obisale asraafoɛ ɛyaa so panyi bɔ ogyi ye nwo berɛ ne kyɛ, “Aso mmeraa ma ate kyɛ ɛmɔkofi ebie bɔ ɔte Romanniɛ mbire wɔ aberɛ bɔ bellili ye dwirɛ bebbuale ye foɛ ɔ?”

²⁶ Na asraafoɛ ɛyaa so panyi ne tele sɔ dwirɛ nen, ɔhɔle safohene ne berɛ oobisale ye kyɛ, “Nzikyɛ nikye yeɛ ɛbaayɔ e? Sɔ biaa he te Romanniɛ!”

²⁷ Yiti safohene ne wale Pɔɔlo nwo berɛ oobisale ye kyɛ, “Ɛte Romanniɛ anaa? Ka kyire me!” Na obuale kyɛ, “Yoo.”

²⁸ Yeɛ safohene ne hane kyɛ, “Nduale sikaa piri paa koraa yeɛ mebaayɛ Romanniɛ ɔ.” Na Pɔɔlo koso buale kyɛ, “Me de, bɛfa bɛwole me.”

²⁹ Na berɛ ne ala, bɛ bɔ ahaa bɛbaatie ye noa dwirɛ ne, bɛhwene bɛ nwo befili ye nwo berɛ; na safohene ne koso nwuni kyɛ Pɔɔlo te Romanniɛ ná koso wakyekye ye nen, osurole.

Pɔɔlo gyi Yuda badwa nyunu

³⁰ Né safohene ne pena kyɛ onwu nikye horɛ bɔ Yudafoɛ nwa Pɔɔlo ayɔ ɔ. Yiti aleɛ hyene ne, ɔmaa bɛsangyele ngɔnzɔngɔnzɔ bɔ bafa bagua ye ne, na ɔhyɛle asɔfo mbanyi ne bɛ badwafoɛ ne amu maa beyiale, na ɔfale Pɔɔlo oogyinane bɛ nyunu berɛ.