Asomafoɛ 20 - AHYERƐLƐ KRONGRON

Pɔɔlo kɔ Makedonia ne Hela bieku

¹ Nziɛ ye bɔ basabasa ne noa dwole ase ne, Pɔɔlo frɛle agyidifoɛ nemɔ maa beyiale; otuli bɛ foɛ na ɔne bɛ lili ngraa, na afei ɔhɔle Makedonia.

² Ɔfale manzini nemɔ nu hyɛle agyidifoɛ nemɔ nguraen pee yiele ne, afei ɔwale Hela aseɛ so.

³ Olili berɛ bosome nza. Na mmerɛ bɔ ɔboaboa ye nwo kɔfa ɛlɛen kɔ Siria nen, ɔtele kyɛ Yudafoɛ ne abɔ ye ti so porɛ bɛtɛ ye; yiti ɔyɛle kyɛ osa ye si fa ase kɔfa Makedonia kɔ.

⁴ Ɔne ɛhemɔ yeɛ bɛhɔle ɔ: Piro awa Sopata bɔ ofi Bɛrea; Aristako ne Sekunduse bɔ befi Tɛsalonika; Gayɔso bɔ ofi Dɛɛbi, Timoteo yeɛ Asiafoɛ Tihiko ne Trofimo.

⁵ Bɛ de belili moa bɛɛnwondɛle yɛ wɔ Troase,

⁶ na yɛ koso de, Paanoo kabrɛdi aluolue ne pɛle nu ne, yɛfale ɛlɛen yɛfili Filipi, na ye elennu ne aso yɛɛtole bɛ wɔ Troase, na yɛlili berɛ ɛlɛsoo.

Pɔɔlo kɔ Troase

⁷ Kyẽa bɔ oli moa wɔ dapɛn ne anu ne, mmerɛ bɔ yɛyiale nu kyɛ yɛdidi ne, Pɔɔlo yɛle ngyerɛkyerɛ hyirele bɛ, na ɔtoale so alaa maa oodwuli abunnamu; ofikyɛ né aleɛ kye a, ɔkɔ.

⁸ Né nganea pee wɔ aborɔsaen ne aso nekaa bɔ yɛyiale ne.

⁹ Né aberandeɛ bie bɔ bɛfrɛ ye Yutiko te mboma noa, na ɔnate kyɛ Pɔɔlo dwudwo hyɛle ne ati, Yutiko tɔle ngosie, na nziɛ ye ɔlafele hatee; na ofili aborɔsaen bɔ ɔtɔ so nza ne aso te tɔle ase, na bɛɛpagyale ye nen, né wawu.

¹⁰ Na Pɔɔlo dwuli ase oobutuli ye so; ɔto brale ye, na ɔhane kyɛ, “Nnɛma ɛmɔ kunu tete ɛmɔ, na owwuli.”

¹¹ Afei Pɔɔlo sa hɔle aborɔsaen ne aso, ɔfale nikyee kãa hane ye noa; na ɔtoale so dwudwole tonn ma aleɛ hyene, na ofili berɛ hɔle.

¹² Afei bɛ ne aberandeɛ ne hɔle awuro bɔ né ye nwo asande ye ɔ, na benyane aworakyekyerɛ somaa.

Pɔɔlo fi Troase kɔ Mileto

¹³ Yɛfale ɛlɛen yɛlili moa yɛhɔle Asɔso kyɛ yɛkwaafa Pɔɔlo wɔ berɛ, ofikyɛ né ɔne yɛ ahyehyɛ kyɛ ɔfa ase odi moa kɔ dɔ.

¹⁴ Oyiale yɛ wɔ Asɔso nen, ɔfole ɛlɛen ne anu, na yɛtoale so yɛhɔle Mitilene.

¹⁵ Yɛfili berɛ, na aleɛ hyene ne, yɛdwuli Kiose ndendeneɛ so. Aleɛ sa hyene ne, yɛdwuli Samo na ye alehyeleɛ nu bieku ne, yɛdwuli Mileto.

¹⁶ Né Pɔɔlo ayɛ ye adwene kyɛ ongogyina Ɛfeso amaa wanzɛkye mmerɛ wɔ Asia mbɔtam, ofikyɛ né ɔpe ndɛen kyɛ sɛ ɔkɔyɛ yee a, okodwu Yerusalem wɔ Pɛntekɔso kyẽa ne.

Pɔɔlo ne Ɛfeso asɔre mbanyi di ngraa

¹⁷ Pɔɔlo tole Ɛfeso asɔre mbanyi ne ngraa fili Mileto kyɛ bɛbra bɛbra.

¹⁸ Bɛwale ne, osele bɛ kyɛ, “Ɛmɔ bɔbɔ ɛmɔse kyɛbɔ ofi kyẽa bɔ mmale Asia me ne ɛmɔ yɛɛtenane ye, nzi mmɔle me bra mmerɛ biala ɔ.

¹⁹ Na mmrɛle me nwo ase mvale me nye moen nyɔle m’adwuma wɔ amaneɛ bɔ Yudafoɛ biemɔ bɔle me ti so porɛ maa nwuni ye ne anu.

²⁰ Yeɛ dwaaso ne ɛmɔ awuro nu nzɛmbahanɛ ne ngyerɛkyerɛ bɔ nyɔle ne, mangata nikyee biala bɔ ɔkɔboka ɛmɔ ɔ so;

²¹ na nnili adanzeɛ ngyirele Yudafoɛ ne Amaenmaensofoɛ kyɛ benya Nyameɛ nyunu adwenesakyera ne y’Awurade Yesu Kristo nu gyidie.

²² Na kekesaala ye, ɔnate kyɛ mayɛ asoɛmmerɛlɛ mama Sunzum Krongron ne ati, mekɔ Yerusalem, na menze nikyee bɔ ɔkɔto me dɔ ɔ;

²³ sana bɔ Sunzum Krongron ne ahã ahyire me wɔ kuro biala so kyɛ mmenia kɔto me kuku nu na bamaa manwu amaneɛ ɔ.

²⁴ Nakoso me de, memva he menyɛ hwee, yeɛ me ngoa koso memva menyɛ hwee; amaa ɔnate so mahora mafa anigye mayie me natelɛ ne Awurade Yesu asɛmbatrɛ adwuma bɔ ɔfa mane me kyɛ nni Nyameɛ adom nzɛmba ne nwo adanzeɛ ne.

²⁵ “Na afei, ɛ́mɔtie. Mahyini ɛmɔ amukoraa so mahã Nyameɛ ahennie ne nwo dwirɛ, na kekesaala ye de, mese kyɛ ɛmɔ nu biala ngonwu me ko.

²⁶ Ɛhe ati ɛnɛ kyẽa ye mekã mekyire ɛmɔ kyɛ, menni ɛmɔ nu biala mogya nwo fɔ;

²⁷ ɔnate kyɛ mamva nikyee biala bɔ ɔfa Nyameɛ nhyehyɛleɛ ne nwo mamvea ɛmɔ.

²⁸ Yiti ɛ́mɔnea ɛmɔ nwo ne mmoaen amukoraa bɔ Sunzum Krongron afa bɛ awura ɛmɔ sa ne aso yé. Ɛ́mɔyɛ Nyameɛ asɔre ne bɔ ɔnate ye bɔbɔ Ɔwa ne mogya so nyane ye ne neafoɛ.

²⁹ Na mese kyɛ mefi wa mekɔ a, mbataku awerɔm koowura ɛmɔ nu, na bɛngɔyakyi mmoaen ne koraa.

³⁰ Asa koso, ɛmɔ bɔbɔ bɛ nu mmenia ne bie kodwɔso ná baha ngondombo dwirɛ bafa bahwe agyidifoɛ ne bie bali bɛ si.

³¹ Yiti ɛmɔla ɛmɔ nwo so, na ɛ́mɔkaye kyɛ mvale me nye moen eyia ne kɔngɔen nduli ɛmɔ nu biala foɛ sɔ alaa afoɛ nza.

³² “Afei, mefa ɛmɔ mewura Nyameɛ sa, ɔne ye adom dwirɛ ne anu; na adom dwirɛ ne yeɛ ɔkɔhora kɔma ɛmɔkonyi ná wama ɛmɔ agyapadeɛ bɔ wahyehyɛ wato berɛ wama anwoteefoɛ mukoraa ne ɔ.

³³ Me nye ammoro ebiala dwetɛ anaa sikaa kɔkorɛ anaa ataadeɛ.

³⁴ Ɛmɔ bɔbɔ ɛmɔse kyɛ me sa noa adwuma yeɛ mva neane me nwo ne bɛ bɔ bɛboka me so ne ɔ.

³⁵ Mahyire ɛmɔ wɔ nikyee biala nu kyɛ ɔsɛ kyɛ ɛmɔyɔ adwuma sɔa bɛfa bɛboka ehiafoɛ, ná ɛmɔma yɛkaye Awurade Yesu dwirɛ bɔ ɔhane ne. Ɔnwa: ‘Ɔte saleɛ pee kyɛ ɛkɔma tra kyɛ ekole ɔ.’ ”

³⁶ Na ye noa pene ne, obuli ndwerɛ ɔne bɛ mukoraa bɛbɔle mbaeɛ.

³⁷ Na bɛ mukoraa bɛfale esuɛ bɛtotɔle ye nu bɛ ne ye lili ngraa;

³⁸ na bɔ ɔmane bɛ wora bɔle koraa ole ye dwirɛ bɔ ɔhane kyɛ bengonwu ye ko ne. Na afei beesomane ye ate bedwuli ɛlɛen ne anwo.