Asomafoɛ 19 - AHYERƐLƐ KRONGRON

Pɔɔlo ka nzɛmba wɔ Ɛfeso

¹ Mmerɛ bɔ né Apolo wɔ Korinto nen, Pɔɔlo hyinini manzini ne anu tonn oofitele Ɛfeso. Onwuni agyidifoɛ biemɔ wɔ berɛ,

² na obisale bɛ kyɛ, “Ɛmɔyɛle agyidifoɛ nen, aso ɛmɔnyane Sunzum Krongron ne?” Na bebuale kyɛ, “Daabi, yɛ de yɛttele ye le po kyɛ Sunzum Krongron bie wɔ berɛ ɔ.”

³ Na Pɔɔlo bisale bɛ kyɛ, “Nzaade né nzikyɛ asubɔlɛ yeɛ bɛfa bɛbɔle ɛmɔ ɔ?” Na bebuale kyɛ, “Yohane asubɔlɛ ne.”

⁴ Na Pɔɔlo sele kyɛ, “Nahorɛ nu, Yohane bɔle adwenesakyeralɛ asu, na ɔhã hyirele maen ne kyɛ béle bɔ oli ye si ɔ́ba, bɔ ye ole Yesu ne béli.”

⁵ Na bɛtele sɔ dwirɛ nen, bɛmaa bɛbɔle bɛ asu wɔ Awurade Yesu dumaa nu.

⁶ Na Pɔɔlo fale ye sa guale bɛ so ne, Sunzum Krongron wale bɛ so; bɛhane edwudwolɛ ahoroɔ, na bɛhyɛle ngɔm.

⁷ Né bɛ mukoraa bɛkɔyɛ mmenia buru ne nyɔ.

⁸ Pɔɔlo hɔle nyianu sua nu tonn bosome nza. Osili ye ahone ɔne mmenia ne dwudwole, na ɔne bɛ yɛle ngyerɛkyerɛ fale Nyameɛ ahennie ne nwo.

⁹ Nakoso ebiemɔ yɛle asoserɛ, banne dwirɛ ne banni, na bɛhane musue dwirɛ betiale Atee ne wɔ mmenia wora ne nyunu. Yiti ɔyakyili bɛ berɛ, ɔfale agyidifoɛ ne bokale ye nwo so; na daa biala ɔyɛle ngyerɛkyerɛ wɔ ebie bɔ bɛfrɛ ye Tirano sukuu sua nu.

¹⁰ Ɛhe hɔle so sɔ alaa afoɛ nyɔ, na ɔmane bɛ bɔ bɛwɔ Asia mbɔtam berɛ amukoraa, Yudafoɛ ne Helafoɛ, bɛtele Awurade nwo dwirɛ ne.

Sekewa mma mmienzua nzoo nemɔ

¹¹ Nyameɛ fale Pɔɔlo so yɔle nzɛngyerɛnneɛ sonongo,

¹² na bɛfale ye nwo duku anaa ye ataadeɛ ngatanyunu po beguale ayarefoɛ so maa bɛtele apɔ, na sunzummɔne tutu fili bɛ nu.

¹³ Yiti Yudafoɛ ngonyaayelɛfoɛ biemɔ bɔ bekyini betutu sunzummɔne yɛle kyɛ bɛ koso bɛkɔfa Awurade Yesu dumaa bɛkɔyɔ bie, na besele sunzummɔne nemɔ kyɛ, “Yɛhyɛ wɔ wɔ Yesu bɔ Pɔɔlo di ye nwo adanzeɛ ne dumaa nu kyɛ, fi ye nu fite!”

¹⁴ Né Yuda sɔfo panyi paa Sekewa mma mmienzua nzoo yeɛ bɛyɔ sɔ nikyee ne ɔ.

¹⁵ Nakoso sunzummɔne ne buale bɛ kyɛ, “Mese Yesu, yeɛ mese Pɔɔlo; na ɛmɔ koso, nwa ole ɛmɔ?”

¹⁶ Na biaa bɔ ole sunzummɔne ne te tɔle bɛ so bobɔle bɛ mukoraa pasaa maa bepurapurale, na bɛfale bɛ nwo bɛtole so bɛnwati befili sɔ awuro berɛ bɛhɔle.

¹⁷ Yudafoɛ amukoraa ne Helafoɛ amukoraa bɔ bɛwɔ Ɛfeso bɛtele sɔ dwirɛ nen, bɛ mukoraa besurole, na bɛyele Awurade Yesu dumaa ayɛ piri paa.

¹⁸ Na bɛ bɔ bele belili ne, bɛ nu pee bɛwale bɛɛtole bɛ noa nu tui bɛhane bɛ bɔne ne bɛ mvealeɛ nu dwirɛ mukoraa.

¹⁹ Ngonyaayelɛfoɛ nemɔ anu pee fale b’adwuma mmukuu bɛwale bɛɛyerale bɛ bɔ ebiala nye tua ɔ, na bɛsesene bɛ nyɔboɛ benwuni kyɛ ɔte ɛdwetɛ apee aburannu.

²⁰ Yiti Awurade dwirɛ ne hɔle so trɛle na onyini ngonim nu.

Ɛfesofoɛ yɔle basabasa

²¹ Ɛhemɔ asi ne, Pɔɔlo nate Sunzum Krongron so yɛle ye adwene kyɛ ɔkwaapɛ nu Makedonia ne Akaia kɔ Yerusalem, na ɔhane kyɛ, “Sɛ medwu berɛ a, ɔsɛ kyɛ mekɔ Rome koso.”

²² Yiti ɔsomane ye bokafoɛ nyɔ, Timoteo ne Eraseto maa bɛhɔle Makedonia, na ye de, ɔtenane Asia mbɔtam hyɛle kãa.

²³ Sɔ mmerɛ ne anu, Atee ne ati basabasayɔlɛ wale Ɛfeso.

²⁴ Ɔwale kyɛ, ɛdwetɛ dwumvoɛ bie bɔ bɛfrɛ ye Demetrio fale ɛdwetɛ yɔle bosoen brasua Ateme asɔneyɛɛ sua sɛso pee, na sɔ dwumadie ne mane adwumvoɛ nemɔ benyane mvasoɛ paa.

²⁵ Yiti Demetrio mane ye adwumayɔlɛfoɛ ne bɛ bɔ betira sɔ nzanodwuma ne amu beyiale, na ɔfa tole bɛ nyunu kyɛ, “Biamɔ, ɛmɔse kyɛ sɔ adwiililɛ he anu yeɛ yɛnya yɛ sikaa ɔ.

²⁶ Na ɛmɔnwu ye, yeɛ ɛmɔte kyɛ sɔ Pɔɔlo ne nwa, nyameɛ mɔ bɔ kuro sona afa ye sa wayɔ ne de bɛtte nyameɛ mɔ koraa; na watu mmeni pee foɛ wasesã b’adwene: nna Ɛfeso wa angome ɔ, na mmom Asia mbɔtam amukoraa.

²⁷ Na bɔ mesuro ole kyɛ, nna y’adwuma he angome yeɛ ɔbaasɛkye ɔ, na mmom bosoen kokuroko Ateme asɔneyɛɛ sua ne yeɛ mmenia mmamva nyɛ hwee ko ɔ. Afei koso bosoen n’animnyam bɔ Asia amukoraa ɔne ewiase amukoraa fa sɔne ye ne baabɔ ye.”

²⁸ Mmerɛ bɔ bɛtele sɔ dwirɛ nen, b’ahone huli, na bɛteateane nu kyɛ, “Ɛfesofoɛ Ateme te kokuroko!”

²⁹ Yiti kuro ne anu amu yɛle basabasa. Na ɛlɔen ne tuli bi bɛɛhyele Makedoniafoɛ nyɔ nemɔ: Gayɔso ne Aristako, na bɛhwene bɛ bɛhɔle badwa nyunu. Né bɛ munyɔ bɛboka Pɔɔlo so wɔ ye ateetulɛ ne anu.

³⁰ Ahaa Pɔɔlo pena kyɛ ɔkɔ ɛlɔen ne anu berɛ bie, nakoso agyidifoɛ nemɔ amma ye ate.

³¹ Na berɛ mbanyi nemɔ bie bɔ bɛte Pɔɔlo damvo mɔ ne, bɛtole ye ngraa kyɛ bɛsrɛ ye ala, nnɛmaa otu ye gya baa tia badwa ne anu.

³² Na nyianu ne bo yɛle basabasa: mmenia ne bie teatea nu kã edwirɛ he, né ebiemɔ koso bɛteatea nu bɛkã edwirɛ foforɛ; ɔnate kyɛ né bɛ nu pee ngora nwu nikye horɛ bɔ yiti yeɛ bayia nu berɛ ne.

³³ Na mmenia ne bie susuli kyɛ Aleksandro se edwirɛ ne nwo bie, ɔnate kyɛ né Yudafoɛ ne ahwe ye aagyina anyunu kyɛ ɔye dwirɛ ne noa. Aleksandro mane ye sa so hyirele mmenia ne kyɛ bɛyɛ dinn, na ɔyɛle kyɛ ɔye dwirɛ ne noa.

³⁴ Nakoso ɛlɔen ne nwuni kyɛ ɔte Yudaniɛ nen, bɛ mukoraa bɛbɔle nu bɛteateane nu alaa kɔyɛ dɔnhwere nyɔ bɛhane kyɛ “Ɛfesofoɛ Ateme te kokuroko!”

³⁵ Afei kuro berɛ krakye panyi ne neane maa ɛlɔen ne yɛle dinn ne, osele bɛ kyɛ, “Ɛfesofoɛ, ɛmɔ nu nwa yeɛ ɔnze kyɛ Ɛfeso kuro ye yeɛ ɔbɔ Ateme kokuroko asɔneyɛɛ sua ɔne nyɔboɛ bɔ ofi anwuro wale ne nwo waen ɔ?

³⁶ Ɔnate kyɛ biala ngɔhora ngosu ɛhe nwo aporowaa ne ati, ɛmɔma b’ahone ɔ́tɔ nzue nu, na nnɛma ɛmɔyɔ basabasa biala.

³⁷ Sɔ mmenia hemɔ bewwuale asɔneyɛɛ sua nemɔ nu nikye fee, yeɛ bɛhhane musue dwirɛ biala bettiale ɛmɔ bosoen brasua ne, nakoso ɛmɔafa bɛ bawa wa.

³⁸ Na Demetrio ne adwiililɛfoɛ bɔ bɛboka ye so ne, sɛ bele kwaadu bie bɛbɔ bɛ nu biala a, kɔɔto ne amrado nemɔ wɔ berɛ; yiti bɛhɔ dɔ bɛɛbɔ nguro.

³⁹ Na sɛ ɛmɔnea na edwirɛ bieku wɔ berɛ de a, ye de yɛkoli ye badwa nu kyɛbɔ mmeraa kyire ɔ.

⁴⁰ Na annea a, mbanyi mɔ kɔbɔ yɛ kwaadu wɔ ɛnɛ basabasayɔlɛ ye nwo. Yeɛ yɛngonya nyeanoɛ anaa edwirɛ paa biala ngɔhã wɔ sɔ basabasayɔlɛ he nwo.”

⁴¹ Na ɔhane sɔ yiele nen, ɔmaa betuli apo.