Asomafoɛ 18 - AHYERƐLƐ KRONGRON

Pɔɔlo ka nzɛmba wɔ Korinto

¹ Ɛhe asi ne, Pɔɔlo fili Atense hɔle Korinto.

² Na onwuni Yudaniɛ bie bɔ oli Akwila bɔ bɛwole ye Ponto ɔ. Né ɔne ɔye Prisila befili Yitalia bɛwale berɛ ɔ ɔhhyɛle biala, ofikyɛ né Klɔdio ahyɛ mmeraa kyɛ Yudafoɛ amukoraa bétu befi Rome bɛhɔ. Pɔɔlo hɔle bɛ berɛ,

³ na kyɛbɔ ɛtena sua nwonɛ te bɛ mukoraa bɛ sa noa adwuma ne ati, ɔne bɛ tenane, na ɔne bɛ yɔle adwuma.

⁴ Né afofikyẽa biala ɔkɔyɛ ngyerɛkyerɛ wɔ nyianu sua nu, na otuli Yudafoɛ ne Helafoɛ foɛ maa bele belili.

⁵ Na mmerɛ bɔ Silase ne Timoteo befili Makedonia bɛwale ne, Pɔɔlo fale ye mmerɛ tole berɛ hane nzɛmba ne, na olili adanzeɛ hyirele Yudafoɛ nemɔ kyɛ Yesu ole Kristo ne.

⁶ Na sɛ né Yudafoɛ nemɔ bedwɔso betia ye, ná bɛkã musue dwirɛ betia ye a, ye koso ɔporoporo ye ataadeɛ nu kã kyire bɛ kyɛ, “Ɛmɔ bɔbɔ ɛmɔ mogya bɔ ɛmɔ ti so, ofikyɛ me de, menni ye nwo fɔ. Na ofi ɛnɛ bɔ ɔkɔ ɔ, ngɔhɔ Amaenmaensofoɛ mɔ dɔ.”

⁷ Yiti ɔyakyili bɛ berɛ ɔɔtenane biaa bie bɔ ye dumaa li Tito Yusto, bɔ ɔso Nyameɛ ɔ ye awuro. Né ye awuro ne pingye nyianu sua ne pɛɛ.

⁸ Na Krispo, bɔ ɔte nyianu sua ne aso panyi ne, ɔne ye awuro ama mukoraa belele Awurade belili; yeɛ afei Korintofoɛ pee bɔ bɛtele Pɔɔlo dwirɛ ne koso, bele belili, na bɛ mukoraa bɛmaa bɛbɔle bɛ asu.

⁹ Na ɛlɛho bie kɔngɔen, Awurade hã hyirele Pɔɔlo wɔ nyekyire kyɛ, “Nnɛsuro, dwudwo, na nnɛmua wɔ noa,

¹⁰ ofikyɛ ngyi wɔ si, na ebiala ngɔwa wɔ so ngɔyɔ wɔ hwee, ɔnate kyɛ nne mmenia pee wɔ kuro ye anu.”

¹¹ Yiti Pɔɔlo lili berɛ afoɛ ko ne bosome nzia hane Nyameɛ dwirɛ ne hyirele berɛ ama.

Yudafoɛ fa Pɔɔlo kɔ Galio nyunu

¹² Mmerɛ bɔ né Galio te amrado wɔ Akaia nen, Yudafoɛ nemɔ yɛle ko, bɛhyele Pɔɔlo, na bɛhwene ye bɛhɔle badwafoɛ nyunu.

¹³ Na besele Galio kyɛ, “Sɔ biaa he afa atee bɔ otia Yudafoɛ mmeraa so ɔma mmenia sɔne Nyameɛ.”

¹⁴ Na Pɔɔlo yɛle kyɛ ɔye ye noa pɛ yeɛ Galio sele Yudafoɛ ne kyɛ, “O Yudafoɛ, sɛ ɔyɛle nzɛmmɔnelilɛ anaakyɛ awuelilɛ dwirɛ bie de a, ahaa ngotie ɛmɔ.

¹⁵ Nakoso kyɛbɔ waayɛ edwirɛ, ɔne dumaa ne ɛmɔ bɔbɔ ɛmɔ mmeraa nwo aporowaasulɛ ye de, ɛmɔ bɔbɔ beesiesie; na edwirɛ sɔaa mɔ de, mengɔyɛ ye nwo ndɛenbualɛniɛ!”

¹⁶ Na ofoane bɛ fili nekaa bɔ bedi dwirɛ ne.

¹⁷ Yiti bɛ mukoraa bɛhyele nyianu sua ne aso panyi Sositene, na bɛbole ye wɔ nekaa bɔ bedi dwirɛ n’anyunu berɛ, nakoso Galio anga ye nwo bie.

Pɔɔlo sa ba Antiokia

¹⁸ Na Pɔɔlo tenane berɛ hyɛle kãa, na nziɛ ye ɔne aliɛmaa nemɔ belili ngraa, na ofili berɛ fale ɛlɛen hɔle Siria. Prisila ne Akwila koso bokale ye so bɛne ye hɔle. Pɔɔlo bɔle tikwa, wɔ Kɛnkrea, ɔnate kyɛ né wabɔ anohoba.

¹⁹ Bedwuli Ɛfeso nen, ɔyakyili bɛ wɔ berɛ; na ye de, ɔhɔle nyianu sua nu ɔne Yudafoɛ bɛɛyɛle ngyerɛkyerɛ.

²⁰ Na bɛsrɛle ye kyɛ ɔne bɛ tena berɛ kãa, nakoso wambene.

²¹ Na mmom ɔhrale bɛ kyɛ, “Sɛ Nyameɛ ma ate a, ngosa ngɔwa ɛmɔ wa.” Na ɔfale ɛlɛen fili Ɛfeso hɔle.

²² Na odwuli Kaesarea nen, ɔbɔle hwii hɔle Yerusalem oobisale asɔremma nemɔ ahye, na afei osili nu hɔle Antiokia.

²³ Ɔhyɛle berɛ kãa, na afei ofili berɛ oohyinini Galatia ne Frigyea mbɔtam hyɛle asuafoɛ nemɔ amukoraa nguraen.

Apolo ka nzɛmba wɔ Ɛfeso ne Korinto

²⁴ Yudaniɛ bie bɔ bɛfrɛ ye Apolo, bɔ bɛwole ye Aleksandria ɔ, ɔwale Ɛfeso. Ɔte sona bɔ ye noa ate ná afei wasa wabe wɔ Ahyerɛlɛ ne anu paa.

²⁵ Bɛfale Awurade Atee so yeɛ behyirele ye nikye ɔ, na ɔnate kyɛ ɔyɛ se wɔ sunzum nu ne ati, odwudwole, na ohyirehyirele Yesu nwo dwirɛ turoloo; ɔwɔ nu kyɛ né Yohane asubɔlɛ ne angome yeɛ ɔse ɔ.

²⁶ Ɔhyɛle ye bo sili ye ahone dwudwole wɔ nyianu sua nu; na mmerɛ bɔ Prisila ne Akwila nwuni ye ne, bɛ ne ye hɔle b’awuro, na behyirehyirele ye Nyameɛ Atee ne anu pɛpɛɛpɛ.

²⁷ Na Apolo yɛle ye adwene kyɛ ɔkɔ Akaia nen, aliɛmaa nemɔ bɛhyɛle ye nguraen, na bɛhyerɛle krataa bɛɛmane asuafoɛ nemɔ kyɛ bele ye bɛto nu nyemene so. Oodwuli ne, ɔbokale bɛ bɔ bɛnate adom so bayɛ agyidifoɛ ne paa.

²⁸ Ofikyɛ ɔnate ye ngyerɛkyerɛ so lili Yudafoɛ so ngonim wɔ badwa nu, na ɔfale Ahyerɛlɛ ne hyirele nu pefee kyɛ Yesu ole Kristo ne.