Asomafoɛ 16 - AHYERƐLƐ KRONGRON

Timoteo boka Pɔɔlo ne Silase so

¹ Pɔɔlo hɔle oodwuli Dɛɛbi ne Lisetra. Né gyidiniɛ bie bɔ bɛfrɛ ye Timoteo wɔ berɛ. Ye maame te Yudaniɛ gyidiniɛ, yeɛ ye baba koso te Helaniɛ.

² Né agyidifoɛ amukoraa bɔ bɛwɔ Lisetra ne Yikoniom ɔ bedi Timoteo nwo adanzeɛ.

³ Né Pɔɔlo kuro kyɛ ɔfa Timoteo boka ye nwo so ɔne ye bɛkɔ, yiti ɔpɛle ye bienzua, ɔnate kyɛ né Yudafoɛ bɔ bɛwɔ porɛ ne anu berɛ mukoraa se kyɛ ye baba te Helaniɛ.

⁴ B’aporɔ bɔ bɛbɔle wɔ nguro nemɔ so ne, bɛfale asomafoɛ nemɔ ne Yerusalem mbanyi nemɔ nhyehyɛleɛ bɔ bɛnwa agyidifoɛ ne li so ne bɛtole bɛ nyunu.

⁵ Ɛhe mane asɔre nemɔ nyane anwoserɛ wɔ gyidie nu, na mmeni pee bokale bɛ so daa biala.

Pɔɔlo nya nyekyire wɔ Troase

⁶ Bɛpɛle nu Frigyea ne Galatia aseɛ so, ofikyɛ Sunzum Krongron ne amma bɛ ate ma banga nzɛmba ne wɔ Asia mbɔtam.

⁷ Na bedwuli Misia manzini ndendeneɛ so ne, bɛyɛle kyɛ bɛkɔ Bitinia, nakoso Yesu Sunzum ne amma bɛ ate.

⁸ Yiti besane Misia nwo bɛwale Troase.

⁹ Sɔ kyẽa ne kɔngɔen, Pɔɔlo nyane nyekyire, na onwuni biaa bie bɔ ofi Makedonia kyɛ ogyi berɛ ná ɔpa ye kyerɛ kyɛ, “Bra Makedonia baaboka yɛ!”

¹⁰ Mmerɛ bɔ Pɔɔlo nyane nyekyire ne pɛ, yɛboaboale yɛ nwo kyɛ yɛkɔ Makedonia, ofikyɛ yɛnyane adwene kyɛ amba Nyameɛ afrɛ yɛ kyɛ yɛɛbɔ nzɛmba ne dawure yɛhyire bɛ.

Lidia yɛle gyidiniɛ wɔ Filipi

¹¹ Yɛfale ɛlɛen yɛfili Troase na yɛhɔle yɛ nyunu ndendeneɛ so yɛɛdwuli supɔ Samotrake so. Na aleɛ hyene ne, yɛhɔle Neapoli.

¹² Na yɛfili berɛ yɛhɔle Roman manzini Makedonia kuro piri Filipi so. Na yɛlili ngyẽa kãa wɔ sɔ kuro ne aso.

¹³ Afofikyẽa dwuli ne, yɛfili kuro berɛ yɛhɔle asue bie noa nekaa bie bɔ yɛsusuli kyɛ ɔyɛ a beyia bɛbɔ mbaeɛ ɔ. Yɛtenane ase, na yɛdwudwo yɛhyirele mmrasua bɔ beeyiale berɛ ne.

¹⁴ Né mmrasua ne ko li Lidia; ofi Tiatira. Né ɔtɔne ago. Ɔte Nyamesomniɛ, na Awurade bukyele ye adwene nu maa ɔyɛle asoɛ mane Pɔɔlo.

¹⁵ Na ɔmaa bɛbɔle ye ne ye awuroama mukoraa asu beyiele nen, osele yɛ kyɛ, “Sɛ ɛmɔabu me kyɛ mede Awurade medi nahorɛ nu a, nzaade ɛmɔbra bɛɛtena m’awuro.” Na ɔhɔle so hane kyɛ yɛma yɛhɔ.

Bɛto Pɔɔlo ne Silase kuku nu wɔ Filipi

¹⁶ Né yɛkɔ nekaa bie bɔ mmenia bɛtaa beyia bɛbɔ mbaeɛ ɔ, na abaayaa bie bɔ ɔte afaneɛ bɔ odi ahɔen ɔ wale ooyiale yɛ. Ye ngɔmhyɛlɛ ne, né wama ye mene mɔ banya bɛ nwo tam.

¹⁷ Olili Pɔɔlo ne yɛ si teateane nu kyɛ, “Sɔ mmenia hemɔ bɛte Anwuro Anwuro Nyameɛ ne ngoaa bɔ bekyire ɛmɔ ngoalelɛ atee ne ɔ.”

¹⁸ Afaneɛ ne yɔle sɔ alaa ngyẽa pee maa oodwuli kyɛ ɔyɛle Pɔɔlo ahomete, yiti ɔkakyili ye nwo sele sunzummɔne ne kyɛ, “Mehyɛ wɔ wɔ Yesu Kristo dumaa nu kyɛ fi ye nu fite!” Na berɛ ne ala sunzummɔne ne fili ye nu.

¹⁹ Na mmerɛ bɔ ye mene mɔ nwuni kyɛ b’atee bɔ bɛfa so benya sikaa abɔ bɛ nen, bɛhyele Pɔɔlo ne Silase, na bɛhwene bɛ bɛhɔle mbanyi nyunu wɔ badwa nu.

²⁰ Bɛfale bɛ bɛwale Roman ndɛenbualɛfoɛ nyunu na bɛhane kyɛ, “Mmenia hemɔ bɛte Yudafoɛ, na bɛ́ma basabasa ba yɛ kuro ye anu.

²¹ Bekyire amanneɛ bɔ otia yɛ Romanfoɛ mmeraa, bɔ ɔyɛ se kyɛ yɛkole yɛkɔto nu, anaakyɛ yɛkoli so ɔ.”

²² Na ɛlɔen ne koso bedwɔso bɛhɔle bɛ so. Na ndɛenbualɛfoɛ nemɔ puropurole Pɔɔlo ne Silase ndaadeɛ, na bɛhyɛle kyɛ befi bɛ mbire.

²³ Bɛbole bɛ botorɔ beyiele ne, bɛfale bɛ beguale kuku nu; na bɛfale ahyɛdeɛ bɛmane kukunu so neafoɛ ne kyɛ ɔ́fa bɛ sie paa.

²⁴ Na ye koso onyane sɔ ahyɛdeɛ nen, ɔfale bɛ hɔle kuku nu sua n’akunu dɔ ɔɔbɔle bɛ panwu.

²⁵ Kɔngɔen ne, kɔyɛ abunnamu, né Pɔɔlo ne Silase bɛbɔ mbaeɛ ná bɛto Nyameɛ ayɛyelɛ dwein, na kukunufoɛ ngaa ne tiele bɛ.

²⁶ Mvum nu, aseɛ wosole serɛserɛ mane kuku nu sua ne nyinasoɛ ne wosole. Berɛ ne ala, anoa ne amukoraa bukyebukyele, na ebiala ngɔnzɔngɔnzɔ bɔ ɔsosɔ ye ne puropuro guale.

²⁷ Bɔ ɔnea kukunufoɛ so ne fili nnaa nu dwɔsole, na mmerɛ bɔ onwuni kyɛ kuku nu anoa nemɔ abukyebukye nen, ɔdwenene kyɛ kukunufoɛ ne anwati; yiti ɔhwene ye ngrandɛ kyɛ oku ye nwo.

²⁸ Na Pɔɔlo teane nu serɛserɛ sele kyɛ, “Nnɛdi wɔ nwo awue, na yɛ mukoraa yɛwɔ wa!”

²⁹ Biaa ne maa bɛfale kanea bɛbrɛle ye, otuli amirika wale sua ne anu dɔ, na ɔfale anwopopolɛ tole ye nwo yele Pɔɔlo ne Silase gya bo.

³⁰ Afei ɔyele bɛ fitele, na obisale bɛ kyɛ, “Me mene mɔ, nzu yeɛ nyɔ na manya daa ngoa ɔ?”

³¹ Bebuale ye kyɛ, “Dé Awurade Yesu di na ɛne w’awuro ama konya daa ngoa.”

³² Afei bɛhane Awurade nwo dwirɛ ne behyirele ye ne ye awuro ama mukoraa.

³³ Sɔ dɔnhwere ne anu ala kɔngɔen ne, ɔfale Pɔɔlo ne Silase hɔle oomiane bɛ nwo apirakuro ne; na ɔmaa bɛbɔle ye ne ye awuro ama mukoraa asu berɛ ne ala.

³⁴ Afei ɔfale bɛ wale ye awuro ɔɔmane bɛ nikyee maa belili, na ɔne ye awuro ama mukoraa benyane anigye kyɛ banya gyidie wɔ Nyameɛ nu ɔ.

Bɛyakyi Pɔɔlo ne Silase

³⁵ Na aleɛ hyene nen, ndɛenbualɛfoɛ nemɔ somane polisifoɛ mɔ, na bɛfale edwirɛ he betuale bɛ noa: “Yakyi mmenia nemɔ ma bɛhɔ!”

³⁶ Yiti biaa ne sele Pɔɔlo kyɛ, “Ndɛenbualɛfoɛ nemɔ asoma maa baase me kyɛ nyakyi ɛmɔ ma ɛmɔhɔ. Yiti ɛmɔfite bɛhɔ asomdwee nu.”

³⁷ Nakoso Pɔɔlo sele bɛ kyɛ, “Bammua yɛ ndɛen wɔ bɔne biala nwo, yeɛ bafi yɛ mbire wɔ mmenia nu wɔ aberɛ bɔ yɛte Romanfoɛ ɔ, na bɛfale yɛ beguale kuku nu. Afei de, bɛ́fea bɛ nwo bɛye yɛ maa yɛkɔ anaa. Daabi, yɛngɔhɔ! Ma bɛ bɔbɔ bɛbra bɛɛye yɛ.”

³⁸ Na polisifoɛ nemɔ hɔle bɛɛbɔle ndɛenbualɛfoɛ nemɔ amaneɛ, na bɛtele kyɛ Pɔɔlo ne Silase bɛte Romanfoɛ nen, besurole.

³⁹ Yiti bɛɛyɛle bɛ dibem; bɛyele bɛ befili kuku nu, na bɛsrɛle bɛ kyɛ befi kuro berɛ bɛhɔ.

⁴⁰ Yiti befili kuku nu berɛ bɛhɔle Lidia awuro. Benwuni agyidifoɛ nemɔ berɛ; bɛhyɛle bɛ nguraen, na befili berɛ bɛhɔle.