Asomafoɛ 15 - AHYERƐLƐ KRONGRON

Yerusalem nyianu piri ne

¹ Mmenia biemɔ fili Yudea bɛwale Antiokia bɛɛyɛle ngyerɛkyerɛ behyirele agyidifoɛ ne kyɛ, “Sɛ ɛmɔambɛ ɛmɔ bienzua kyɛbɔ Mose amanneɛ ne te ne a, ɛmɔngɔhora ngonya daa ngoa.”

² Ɛhe mane Pɔɔlo ne Banaba bɛne mmenia nemɔ benyane dwudwolɛ besuli aporowaa serɛserɛ wɔ sɔ dwirɛ he anwo. Yiti betuli mmenia kyɛ bɛboka Pɔɔlo ne Banaba so bɛhɔ Yerusalem beenwu asomafoɛ nemɔ ne mbanyi mɔ wɔ sɔ dwirɛ he anwo.

³ Antiokia asɔremma ne guale bɛ ate; na bɛkɔ nen, bɛfale Fonikia ne Samaria bɛhane kyɛbɔ Amaenmaensofoɛ asi afa bɛ nwo ama Nyameɛ, na edwirɛ he mane agyidifoɛ ne amukoraa bɛ nye gyele paa.

⁴ Na bedwuli Yerusalem nen, asɔre ne ne asomafoɛ nemɔ ne mbanyi nemɔ bɛyɛle bɛ awaawaatuu; na bɛhane bɔ Nyameɛ afa bɛ sɔ wayɔ amukoraa behyirele bɛ.

⁵ Nakoso agyidifoɛ biemɔ bɔ befi Farasiifoɛ fekue ne anu bedwɔso begyinane, na bɛhane kyɛ, “Ɔsɛ kyɛ Amaenmaensofoɛ bɛpɛ bɛ bienzua, ná bɛhyɛ bɛ maa bedi Mose mmeraa ne aso.”

⁶ Na asomafoɛ nemɔ ne mbanyi nemɔ beyiale nu bɛfale edwirɛ he nwo adwene.

⁷ Bɛkekane ye nwo bie dee, na Petro dwɔso sele bɛ kyɛ, “Aliɛmaa mɔ, ɛmɔse kyɛ mmerɛ bie bɔ wapɛ nu wahɔ ɔ, Nyameɛ neaneane nu yele me fili ɛmɔ nu, kyɛ nga nzɛmba ne ngyire Amaenmaensofoɛ maa bɛ koso bɛte dwirɛ ne na bele beli.

⁸ Na Nyameɛ bɔ ɔse angorangora biala ti anu adwene ne lili bɛ adanzeɛ, na ɔmane bɛ Sunzum Krongron ne kyɛbɔ ɔfa mane yɛ ne ala.

⁹ Wangyire kyɛ nzonzoleɛ biala wɔ yɛ ne bɛ nu, na mmom ɔnate (bɛ) gyidie so fale bɛ bɔne hyɛle bɛ.

¹⁰ Na afei, nzu ati yeɛ ɛmɔso Nyameɛ bɛnea na bɛfa nningyein bɔ yɛ ne yɛ nana mɔ yangora ye soa bɛsoa agyidifoɛ ne ɔ?

¹¹ Na kyɛbɔ yɛde yɛdi kyɛ ɔnate Awurade Yesu adom so yɛkonya daa ngoa nen, sɔ ala koso yeɛ bɛ deɛ te ɔ.”

¹² Mmenia ne amukoraa bɛyɛle dinn, na betiele Banaba ne Pɔɔlo wɔ b’amaneɛ bɔ ɔfa nzɛngyerɛnneɛ ne anwanwadeɛ amukoraa bɔ Nyameɛ afa bɛ so wayɔ wɔ Amaenmaensofoɛ nu ne.

¹³ Bɛ noa pene ne, Yakobo buale kyɛ, “Aliɛmaa mɔ, ɛmɔyɛ asoɛ betie me!

¹⁴ Simɔn aha kyɛbɔ osi yɛle bɔ Nyameɛ ɔɔneaneane Amaenmaensofoɛ nu yele mmenia bie fili bɛ nu kyɛ bɛyɛ ye deɛ bɔkɔɔ ɔ.

¹⁵ Na ɛhe ne ngɔmhyɛlɛfoɛ dwirɛ bɔ bɛhane ne te ko, kyɛbɔ bahyerɛ kyɛ,

¹⁶ ‘Ɛhe asi ne, ngosa ngɔwa na mama Dawide ahennie bɔ ɔtɔle ase ne so bieku. Ngosi bɔ wabubu ne bieku ná mama so bieku;

¹⁷ amaa ɔnate so mmenia bɔ baha ne, yeɛ Amaenmaensofoɛ bɔ mafrɛ bɛ kyɛ bɛyɛ me deɛ ne, bapena Awurade si atee.

¹⁸ Awurade bɔ ɔmaa yɛnwuni ɛhe fili tetetete ne, ye noa dwirɛ ɛne.’ ”

¹⁹ Na Yakobo toale so hane kyɛ, “Me de, mesusu kyɛ, ɔnzɛ kyɛ yɛha Amaenmaensofoɛ bɔ bafa bɛ nwo bama Nyameɛ nen.

²⁰ Na mmom odi kyɛ yɛkyerɛ krataa yɛkɔma bɛ, kyɛ, onni kyɛ bedi aleɛ biala bɔ bafa babɔ afɔleɛ bama bosoen, bɛhwe bɛ nwo befi adwamanbɔlɛ nwo; yeɛ afei onni kyɛ bedi kaka biala bɔ wawu ye mogya nu, anaakyɛ mogya.

²¹ Ɔnate kyɛ ofi tete yeɛ mmenia bɔ Mose mmeraa ne dawure wɔ nguro mukoraa so ɔ, na bɛkenga ye afofikyẽa biala wɔ nyianu sua nemɔ nu.”

Bɛfa krataa bɔkɔma Antiokia asɔre ne

²² Afei asomafoɛ ne, mbanyi nemɔ ne asɔremma ne amukoraa bɛyɛle adwene kyɛ bɛkɔye bɛ nu bie na basoma bɛ maa baboka Pɔɔlo ne Banaba so bahɔ Antiokia. Yiti betuli mmenia nyɔ: Yudase bɔ bɛfrɛ ye Basaba, ɔne Silase bɔ bebu bɛ wɔ agyidifoɛ nemɔ anu kyɛ bɛne bɛ hɔ,

²³ na bɛhyerɛle krataa he bɛfa bɛsomane bɛ: “Yɛ asomafoɛ ne asɔre mbanyi mɔ, bɔ yɛte ɛmɔ aliɛma mɔ, yɛbisa y’eliɛma mɔ Amaenmaensofoɛ bɔ bɛwɔ Antiokia, Siria ne Kilikia ahye.

²⁴ Yate kyɛ yɛ nu biemɔ bɔ nna yɛ yeɛ yɛsomane bɛ ɔ bawa ɛmɔ berɛ baahã edwirɛ bafa babiri ɛmɔ nye so bama ɛmɔ adwene ayɛ ɛmɔ naa.

²⁵ Sɔ ne ati, wawa kyɛ yɛ mukoraa yahã yɛ ti yapura, na yatu mmenia kyɛ bɛne yɛ dɔfo Banaba Pɔɔlo,

²⁶ bɔ y’Awurade Yesu Kristo dumaa nu ti bafa bɛ ngoa babɔ afɔleɛ ne, kyɛ bɛbra ɛmɔ berɛ.

²⁷ Yiti yasoma Yudase ne Silase, na bɛ bɔbɔ bɛkɔhã edwirɛ biala bɔ ɔwɔ krataa ne anu bekohyire ɛmɔ.

²⁸ Na Sunzum Krongron ne yɛ yale yato nu kyɛ, ɔnzɛ kyɛ yɛfa adesoa biala ko yɛsoa ɛmɔ; sana sɔ nningyein hemɔ bɔ bɛ nwo hia ye:

²⁹ Nnɛma ɛmɔdi aleɛ biala bɔ bafa babɔ afɔleɛ bama bosoen; nnɛma ɛmɔdi mogya; nnɛma ɛmɔdi kaka biala bɔ wawu ye mogya nu; yeɛ afei ɛmɔhwe bɛ nwo befi adwamanbɔlɛ nwo. Na sɛ ɛmɔtwe bɛ nwo befi ɛhemɔ nwo a, ɔte paa. Yɛbisa bɛ.”

³⁰ Bɛyakyili ɛbɔfoɛ nemɔ ate, na bedwuli Antiokia nen, bɛmane asɔremma ne amukoraa beyiale, na bɛfale krataa ne bɛmane bɛ.

³¹ Na agyidifoɛ nemɔ kengale krataa ne nen, bɛ nye gyele, ɔnate kyɛ benyane aworakyekyerɛ befili nu.

³² Na Yudase ne Silase bɔ bɛ koso bɛte ngɔmhyɛlɛfoɛ ne, bɛfale edwirɛ bɛtole dwirɛ nwo betuli bɛ foɛ maa benyane anwoserɛ.

³³ Bɛhyɛle Antiokia berɛ kãa, na agyidifoɛ nemɔ yakyili bɛ ate asomdwee nu maa besa bɛhɔle bɛ bɔ bɛsomane bɛ ne berɛ. [

³⁴ Nakoso Silase de, ɔyɛle kyɛ ɔkɔtena berɛ.]

³⁵ Na Pɔɔlo ne Banaba tenane Antiokia hyɛle kãa; bɛ ne mmeni pee yɛle ngyerɛkyerɛ, na bɛhane Awurade nzɛmba ne.

Pɔɔlo ne Banaba afia tetele

³⁶ Ngyẽa kãa asi ne, Pɔɔlo sele Banaba kyɛ, “Maa yɛsa yɛɛsra aliɛmaa mɔ bɔ bɛwɔ kuro biala bɔ yɛhane Awurade dwirɛ ne wɔ so ne, na yɛnea kyɛbɔ bɛ nwo si te ɔ.”

³⁷ Né Banaba pena kyɛ bɛfa Yohane, bɔ bɛfrɛ ye Marko bɛboka bɛ nwo so,

³⁸ nakoso Pɔɔlo susuli kyɛ ye nwo nhia kyɛ bɛkɔfa ye bɛkɔhɔ bie ɔ, ɔnate kyɛ ɔyakyili bɛ nu wɔ Pamfilia; na ɔne bɛ angɔanyɔ asɛmbatrɛ adwuma ne.

³⁹ Na ɛhe nwo aporowaasulɛ yɛle kyengye paa mane bɛ munyɔ b’afia tetele: Banaba fale Yohane Marko bokale ye nwo so, na ɔne ye fale ɛlɛen hɔle Kipro,

⁴⁰ nakoso Pɔɔlo de, ɔfale Silase bokale ye nwo so. Agyidifoɛ ne fale Pɔɔlo wurale Awurade adom ne sa, na osili nu hɔle.

⁴¹ Ɔɔpɛle nu wɔ Siria ne Kilikia na ɔhyɛle asɔremma nemɔ nguraen.