Anyandera 9 - AHYERƐLƐ KRONGRON

Nworɛ to ye sa frɛ wɔ

¹ Nworɛ asi ye sua, wase ye bonima nzoo nemɔ.

² Wahũ ye naen nemɔ, wafrafra ye nzaa, na wato ye poen koso.

³ Wasoma ye afaneɛ nemɔ, ɔɔteane nu wɔ kuro berɛ mmokaa nemɔ aso kyɛ,

⁴ “Wɔ bɔ w’adwene te kãa ne, makye fa wa!” Sona bɔ ɔpena ndeaseɛ ne, nworɛ kã kyire ye kyɛ,

⁵ “Ɛmɔbra beeli m’aleɛ ne bie, ná ɛ́mɔno me nzaa bɔ mafrafra ne bie.

⁶ Nnɛma ɛmɔfa ɛmɔ nwo bɛbɔ ngwaseafoɛ, na ɛmɔkonya ngoa, na ɛ́mɔfa ndeaseɛ atee so.”

⁷ Ebiala bɔ ɔtengyɛtengyɛ ngorohoɛniɛ ne, ode animguaseɛ, yeɛ ebiala bɔ otwi bɔnefoɛ nyunu ne, ode nzoaa.

⁸ Nnɛtwi ngorohoɛniɛ nyunu, ná wambɔ wɔ; sɛ etwi nworɛniɛ nyunu a, okohuro wɔ dwirɛ.

⁹ Tu nworɛniɛ foɛ, na ɔkɔhɔ so konwu nworɛ; yeɛ kyirekyire teneneeniɛ nikye, na ɔkɔhɔ so konya nimdeɛ.

¹⁰ AWURADE surolɛ yeɛ ɔte nworɛnwunɛ ye bohyɛlɛ ɔ, na Krongronniɛ ne nwo nimdeɛ yeɛ ɔma nworɛ bɔ nu pi ɔ.

¹¹ Ofikyɛ ɛfa me so a, ekonyi kɔhyɛ, na ngɔma wɔ ngoa kɔyɛ tendenn.

¹² Sɛ enwu nworɛ a, enwu ma wɔ bɔbɔ wɔ nwo, yeɛ sɛ ɛyɛ ngorohoɛ a, ɔkɔbɔ wɔ ngome wɔ ti so.

¹³ Brasua kwaseaa dwudwo mbaen mbaen, ye adwene te kãa, na ɔnze huu.

¹⁴ Ɔtena ase wɔ ye awuro anoa nu, ɔtena bia so wɔ nekaa bɔ ɔte bokaa ɔ so, wɔ kuro berɛ,

¹⁵ kyɛ ɔfrɛfrɛ ebiala bɔ ɔpɛ nu kɔ ɔ, bɛ bɔ bɛkɔ bɛ nyunu tee ne kyɛ,

¹⁶ “Wɔ bɔ w’adwene te kãa ne, makye fa wa oo!” Na bienzua bɔ ɔnze nworɛ ne, braa ne kã kyire ye kyɛ,

¹⁷ “Awue nzue yɛ fɛ, na aleɛ bɔ ɛkɔfea wɔ nwo koli ne, ɔyɛ fɛ.”

¹⁸ Nakoso bienzua ne, ɔnze kyɛ berɛ te ewue kuro ɔ, na mmienzua bɔ bɛkɔ ye nekaa ne, ɛborɔ bo dɔ yeɛ baagua ɔ.