Anyandera 8 - AHYERƐLƐ KRONGRON

Nworɛ ye ye nwo ayɛ

¹ Aso nworɛ ɔndea nu mvrɛ? Aso ndeaseɛ ɔmma ye komvi so ndwudwo?

² Mmokaa ti afia, wɔ atee noa, ngwandaa so yeɛ ogyi ɔ,

³ wɔ kuro berɛ pambim ne anwo, ɔtea nu wɔ tiwaa berɛ pambim ne anu kyɛ,

⁴ “Kuro mmenia ee, ɛmɔ yeɛ metea nu mefrɛ ɛmɔ ɔ, adasa amukoraa yeɛ mefrɛ ɛmɔ ɔ.

⁵ Ɛmɔ bɔ ɛmɔ adwene te nganga ɔ, odi kyɛ ɛmɔma ɛmɔ adwene nu bukye, ɛmɔ, ngwaseafoɛ, ɛ́mɔsua nworɛ.

⁶ Ɛ́mɔtie, ofikyɛ edwirɛ bɔ ohia yeɛ mekã ɔ, na edwirɛ paa paa yeɛ ofi me noa nu ɔ.

⁷ Nahorɛ yeɛ mekã ɔ, me noa kyi amumuyɛɛ dwirɛ kekanɛ.

⁸ Me noa dwirɛ amukoraa tengyɛ, nnakannaka anaa ngondombo biala nne nu.

⁹ Ye mukoraa nu la berɛ ma bɛ bɔ b’adwene nu pi ɔ, na ɔte paa ma bɛ bɔ benya nimdeɛ ɔ.

¹⁰ Ɛ́mɔfa me foɛtulɛ ne, na nnɛma ɛmɔfa ɛdwetɛ, ɛ́mɔfa nimdeɛ, na nnɛma ɛmɔfa sikaa kɔkorɛ paa;

¹¹ ofikyɛ nworɛ te paa tra agudeɛ, na bɔ ɛpena kyɛ enya ye biala, ɛngɔhora ngɔfa ngɔtoto nworɛ nwo.

¹² Me, nworɛ, me ne adwene bɔ nu abukye yeɛ yɛte ɔ, na manya ndeaseɛ nwo nimdeɛ.

¹³ Esuro AWURADE a, né ekyi bɔne: mekyi anwomasoɛ ne ahandaen, bɔne yɔleɛ ne ngondombopɛlɛ.

¹⁴ Foɛtulɛ ne nworɛ paa te me deɛ, me ole ndeaseɛ, na me nwo yɛ se.

¹⁵ Ahemvo mɔ fa me so yeɛ bedi hene ɔ, na atitirefoɛ fa me so yeɛ bɛhyɛ mmeraa bɔ ɔtengyɛ ɔ;

¹⁶ me so yeɛ maen mbanyi bɛfa bebu maen ɔ, bɛ ne nnehyeɛ ne bɛ bɔ bebu maen nahorɛ nu amukoraa.

¹⁷ Bɛ bɔ bekuro me dwirɛ ne, mekuro bɛ dwirɛ, na bɛ bɔ bɛ nye boro bɛpena me ne, benwu me.

¹⁸ Me berɛ yeɛ anwonya ne animnyam wɔ ɔ, anwonyadeɛ bɔ ɔkyɛ, ɔne tenenee.

¹⁹ Me mmaa bɔ mesu ne, ɔte paa tra sikaa kɔkorɛ ne sikaa kɔkorɛ paa po, na me fieso aleɛ te paa tra ɛdwetɛ paa.

²⁰ Tenenee atimbire so yeɛ mefa ɔ, mefa ndɛenbualɛ turoloo atee so.

²¹ Bɛ bɔ bekuro me dwirɛ ne, memaa benya bɛ nwo, na nekaa bɔ besie bɛ nningyein ne, ngɔmaa okoyi tɛkyɛɛ.

²² AWURADE ɔ́hyɛ ye adwuma bo ne yeɛ ɔbɔle me ɔ, koraka yeɛ ɔ́hyɛ ye adwuma bɔ ofi tetetete ne abo ɔ.

²³ Ɔhyehyɛle me fili tetetete, ɔ́hyɛ ye bo ne, koraka yeɛ ɔ́bɔ aseɛ ɔ.

²⁴ Mmerɛ bɔ né buma nne berɛ ne, mmerɛ bɔ né asue ti bɔ opu nzue pee ɔnne berɛ ne yeɛ bɛwole me ɔ.

²⁵ Anzana bɛbaafa mmokaa mɔ begyinagyina berɛ ne, anzana pambaa mɔ bɛbaawa ne, né bawo me;

²⁶ anzana ɔbaabɔ aseɛ ne ɛhɔayeɛ mɔ ne, anaakyɛ ewiase nnɛterɛ bɔ oli moa ne.

²⁷ Mmerɛ bɔ ɔfale ewienu sɛle berɛ ne, né nwɔ berɛ, mmerɛ bɔ ɔpɛle kango fale ɛpo nye ne;

²⁸ mmerɛ bɔ ɔfale munungum sinzele anwuro pindinn ne, mmerɛ bɔ ɔfale ɛpo ye ti bɔ opu nzue siele berɛ ne,

²⁹ mmerɛ bɔ ɔtole ɛpo wɛen, kyɛbɔ nzue ne ngobu ye mmeraa dwirɛ so ne, mmerɛ bɔ ɔtole aseɛ fapem ne,

³⁰ né nwɔ ye nwo berɛ, kyɛ dwumvoɛ titire paa, né nde ye anika daa, na né medi ahurusi wɔ ye nyunu mmerɛ biala.

³¹ Né me nye gye wɔ ye wiase ne anu, na nyane adasa mmaa nwo anika.

³² “Afei, me mma mɔ, ɛ́mɔtie me e, bɛ bɔ bɛnate m’atee so ne, benya saleɛ.

³³ Ɛ́mɔtie foɛtulɛ ná ɛmɔnwu nworɛ, na nnɛma ɛmɔpo ye.

³⁴ Sona bɔ otie me, bɔ ɔwɛne daa biala wɔ me pambim nu, ná ɔnwondɛ wɔ m’anoa nu ne, onya saleɛ.

³⁵ Ofikyɛ ebiala bɔ ɔpena me ne, onya ngoa, na AWURADE do ye;

³⁶ nakoso bɔ ɔkɔyɔ bɔne kotia me ne de, ɔyɛ ye bɔbɔ ye kra aborɛ, ebiala bɔ ɔpɔ me ne, né ewue yeɛ okuro ɔ.”