Anyandera 7 - AHYERƐLƐ KRONGRON

Brasua adwamanbɔlɛniɛ nwo kɔkɔbɔlɛ

¹ Mma, di me dwirɛ so, ná fa me mmeraa dwirɛ ne sie wɔ ti anu.

² Di me mmeraa dwirɛ so ná nya ngoa; ma me ngyerɛkyerɛ nwo hia wɔ kyɛ wɔ nye kyiremvua;

³ kyekye fa bɔ wɔ sa mmɛseka, ná kyerɛ ye wɔ w’ahone nu.

⁴ Kã kyire nworɛ kyɛ, “Ɛte nniɛma brasua,” ná frɛ adwene bɔ nu pi ɔ kyɛ wɔ busuaniɛ;

⁵ amaa ɔnate so babɔ wɔ nwo waen bafi brasua sanzaniɛ sa nu, bafi brasua sanzaniɛ bɔ ye noa dwirɛ te menemene ɔ sa nu.

⁶ Né ngyi m’awuro berɛ mboma ne anu, ndole me nye nneane me mboma nu,

⁷ na nwuni ebie wɔ bɛ bɔ b’adwene te nganga nemɔ anu, nwuni ebie bɔ ɔnze nworɛ ɔ kyɛ ɔboka mmerandeɛ nemɔ aso.

⁸ Né ɔnate dwaaso nekaa bie bɔ opingye braa n’awuro ɔ, ɔfale atee bɔ ɔkɔ braa n’awuro so,

⁹ mmerɛ bɔ né aleɛ adwo, bɔ né maen nu apinipini ɔ, kɔngɔen ne awosii nu.

¹⁰ Na yieee, braa bie wale ooyiale ye. Né wahera ye tena kyɛ gyanderaniɛ, na né otira nnakannaka adwene.

¹¹ Braa ne te sona bɔ wasɛkye, na ɔnze nyanzoen, na ɔndena ye awuro.

¹² Odi mmorɔnoɛ nemɔ aso ne dwaaso akɔneaba, na ɔtetɛ wɔ ahameɛ biala.

¹³ Yeɛ braa ne to brale ye, na ɔfele ye noa, na braa ne totone ye nye lili sele ye kyɛ,

¹⁴ “Mabɔ asomdwee afɔleɛ, yeɛ matua m’aboadeɛ ɛnɛ;

¹⁵ ye sɔ ati, mafite mawa kyɛ mebaayia wɔ, mepena wɔ paa, na manwu wɔ.

¹⁶ Mafa bomo masɛ me bɛen, yeɛ Misraim mbasotam bɔ bali adwii bagua nu ɔ.

¹⁷ Mafa korobo, pɛprɛ ne ayirefona mapete me mba so fonafona.

¹⁸ Bra ma yɛɛgye yɛ nye mba so toonn kɔpem ngyerɛmɔ, maa yɛɛsɛpɛ yɛ nwo.

¹⁹ Ofikyɛ me hu nne awuro, watia ye gya si wahɔ dedeede.

²⁰ Ɔfale bɔtɔ bɔ sikaa dɔnn wɔ nu yeɛ ɔhɔle ɔ, sana bɛpakye bosome nu koraka né wasa wawa awuro.”

²¹ Ɔfale ye noa dwirɛ menemene pee tole ye mmralɛ, ɔfale ye noa dwirɛ menemene ne nyane ye.

²² Na berɛ ne ala, olili braa ne asi kyɛ nandwie bɔ bɛfa ye bɛkɔ akumyɛɛ ɔ, kyɛ kwaseaa bɔ bagua ye ngɔnzɔngɔnzɔ bɛkwaahwe ye so ɔ,

²³ kɔpem kyɛ agyaen kosina ye fure nu ɔ, kyɛ anomaa bɔ ɔpere ye nwo kowura ngaen nu, bɔ ɔnze kyɛ ɔkɔfa ye ngoa kɔpɛ so ɔ.

²⁴ Afei, me mma mɔ, ɛ́mɔtie me e, ná ɛ́mɔyɛ asoɛ bétie me noa dwirɛ.

²⁵ Nnɛma w’adwene kakyi okodi sɔ braa ne asi, nnɛdi makyebu kɔfa ye atee so,

²⁶ ofikyɛ wama amaneɛ ato mmenia pee, na mmeni titire pee yeɛ wahũhũ bɛ ɔ.

²⁷ Ye awuro te ɛborɔ atee, na ɔtorotoro kɔ ewue ye pumbu mɔ nu.