Anyandera 6 - AHYERƐLƐ KRONGRON

Asetena nu kɔkɔbɔlɛ

¹ Mma, sɛ ali eliɛngo agyinamuɛ, sɛ afa wɔ nwo asie kerɛ nu ama ɛwɔfoɛ,

² maa ɔnate so wɔ noa dwirɛ asua wɔ ngaen wahye wɔ a,

³ ye de mma, yɔ ɛhe fa tete wɔ nwo, ofikyɛ atɔ eliɛngo ngaen nu: kɔ kɔkoto eliɛngo ne, ná pa ye kyerɛ.

⁴ Nnɛma nnaa ba wɔ nye so, yeɛ nnɛtɔ ngosie.

⁵ De wɔ nwo kyɛbɔ ɛwanzane ode ye nwo fi bɔfoɛ sa nu ɔ, kyɛbɔ anomaa ode ye nwo fi sona bɔ osua nnomaa ngaen sa nu ɔ.

⁶ Ɛfoen sona, kɔ ngyiregyiraa berɛ, nea kyɛbɔ ɔyɔ ye nningyein ɔ, ná sua nworɛ.

⁷ Olle ebiala mma ɔnnea ye so, olle adwuma so neafoɛ anaa panyi biala,

⁸ nakoso wawa pe a, ɔpena ye aleɛ sie, yeɛ fieso aleɛ falɛ dwu a, ɔboaboa ye noa aleɛ noa.

⁹ O, ɛfoen sona, ɛkɔla maa okoodwu kyinzu? Mmerɛ beni yeɛ ekofi wɔ nnafelɛ nu kodwɔso ɔ?

¹⁰ ‘Maa nna kãa, maa ndɔ ngosie kãa, maa ndengyɛ me nu kãa.’

¹¹ Na ehiaa kɔwa wɔ so kyɛ awerɔm awueniɛ, yeɛ anwokyere kɔwa wɔ so kyɛ koɛhonɛniɛ bɔ otira akokyɛm ɔ.

¹² Sona mbaen, busueniɛ, ɔnate kekã nnakannaka dwirɛ,

¹³ ɔbɔ ye nye kyire, ɔfa ye gya dwudwo, yeɛ ɔfa ye sa mmɛseka dwudwo.

¹⁴ Ye ti anu adwene te tɛ, ɔbɔ nzɛmmɔne porɛ daa, na ɔkekã mmenia ti bobɔ nu.

¹⁵ Yiti musue kɔto sɔ sona ne mvum nu, na ɔkɔto ye mvum nu bɔ ongonya ye sɔbea ɔ.

¹⁶ Sɔ nningyein nzia hemɔ bɛyɛ AWURADE tɛ, amba, nningyein nzoo hemɔ bɛte ye akyiwadeɛ:

¹⁷ anyeɛ bɔ ɔtra ye ndo nwiaa, noa bɔ ɔnga nahorɛ ɔ, asaa bɔ ɔkã mogya bɔ odi be gua ɔ,

¹⁸ sona bɔ adwene tɛɛ ali ye ti ɔ, agyirɛ bɔ ye nwo yɛ nyera wɔ bɔneyɔlɛ nwo,

¹⁹ sona bɔ odi adanzewia ɔ, yeɛ sona bɔ ɔkekã aliɛmaa mɔ bɛ ti bobɔ nu ɔ.

²⁰ Mma, di wɔ baba mmeraa dwirɛ so, yeɛ nnɛpo wɔ maame foɛtulɛ.

²¹ Bɔ ye borɛ fa to wɔ ti anu daa, ná kyekye fa ya wɔ kɔme.

²² Ɛnate a, bekohyire wɔ atee, ɛda a, bɛkɔnea wɔ so, yeɛ sɛ edwɔso a, bɛ ne wɔ kotu asure.

²³ Ofikyɛ mmeraa dwirɛ ne te kanea, yeɛ ngyerɛkyerɛ ne te hyireinn, na betwi wɔ nyunu bɛtengyɛtengyɛ wɔ a, ɔte asetena nu esaa bɔ ɔla berɛ ɔ;

²⁴ bɔ ɔtwe wɔ fi musue brasua nwo, ofi adwaman brasua ye noa dwirɛ menemene nwo ɔ.

²⁵ Nnɛdi ye anwonyemene si ekuro ye, yeɛ nnɛmaa ɔfa ye ndo nwiaa ne ɔkye w’adwene.

²⁶ Ofikyɛ paanoo sii ko yeɛ bɛfa benya brasua adwamanbɔlɛniɛ ɔ, nakoso ebie aye de, ɛfa wɔ ngoa yeɛ ɛpɛ so ɔ.

²⁷ Aso sona kɔhora kɔfa see kowura ye hue so bɔ ye ndaadeɛ ngɔyera ɔ?

²⁸ Aso sona kɔhora kotiatia see gonn so bɔ ye gya ngɔyera ɔ?

²⁹ Sɔ ala yeɛ ɔkɔto ebiala bɔ ɔkɔ ebie aye nwo ɔ, na ebiala bɔ ɔkɔ sɔ braa ne nwo ne, ɔngɔfa ye nwo ngoli tɔtorɔtɔɔ.

³⁰ Sɛ ɛhɔen ku awueniɛ maa owua aleɛ kyɛ odi ma ye ko yi a, ɔnzɛ kyɛ yɛbu ye animtia.

³¹ Nakoso sɛ bɛkye ye a, okotua ye nwo mmɔhoɛ nzoo, ɔkɔhwere ye awuro nningyein amukoraa.

³² Nakoso bienzua bɔ ɔne ebie aye bɛda ne de, adwene nne ye ti anu, sona bɔ ɔyɔ sɔ ne, ɔfa sɛkye ye bɔbɔ ye kra.

³³ Ye sa kɔhã epuralɛ ne animguaseɛ, na ye nyanzoen ne ngofi ye so.

³⁴ Ofikyɛ nungunɛ ma bienzua fɛ yaa piri paa, na kyẽa bɔ ɔkɔtɔ sɔ biaa ne so wereɛ ne, ongonwu ye anwumvoin.

³⁵ Ongole mbata biala, yeɛ sɛ ɛma ye akyɛdeɛ pee po a, ɔngɔpene.