Anyandera 4 - AHYERƐLƐ KRONGRON

Awofoɛ foɛtulɛ

¹ Mmaa, ɛ́mɔtie ɛmɔ baba mɔ foɛtulɛ, ná ɛ́mɔyɛ asoɛ betie, amaa ɔnate so ɛmɔsua nworɛ.

² Ofikyɛ ngyerɛkyerɛ paa yeɛ mefa mema ɛmɔ ɔ, na nnɛma ɛmɔpo me foɛtulɛ ne.

³ Me ngwadaa nu bɔ né me ne me baba yɛwɔ berɛ ne, bɔ né nde kãa, ná me ni di me bahorɛ ne,

⁴ me baba tuli me foɛ sele me kyɛ, “Fa me dwirɛ bɔ mekã ne to wɔ ti anu, di me mmeraa dwirɛ so, ná nya ngoa.

⁵ Sua nworɛ, sua nworɛ bɔ nu pi ɔ. Nnɛma wɔ wora fi, yeɛ nnɛyakyi me noa dwirɛ so lilɛ.

⁶ Nnɛpo nworɛ, na ɔkɔnea wɔ so, kuro ye dwirɛ, na ɔkɔbɔ wɔ nwo waen.

⁷ Nworɛ te nikye titire, yiti sua nworɛ, w’anwonya mukoraa si ne, pena ndeaseɛ.

⁸ Nwu ye kyɛ odi mu, na ɔkɔpagya wɔ; na sɛ ɛtɔ ye nu ɛyɛ ye atuu a, ɔkɔhyɛ wɔ animnyam.

⁹ Ɔkɔfa animnyam abotire kɔbɔ wɔ, ɔkɔfa abotire nyemenenyemene kɔbɔ wɔ.”

¹⁰ Mma, tie me dwirɛ ná di so, amaa ɔnate so anya ngoa tendenn.

¹¹ Mahyirehyire wɔ nworɛ atee ne, mafa wɔ mafa atimbire turoloo ne aso.

¹² Yiti sɛ ɛnate a, wɔ gya ngɔto ngɔbrabra nu, yeɛ etu amirika koso a, engosoti.

¹³ Sɔ foɛtulɛ nu yé, nnɛyakyi nu, fa sie yé, ofikyɛ wɔ ngoa ɛne.

¹⁴ Bɔnefoɛ atee ne, nnɛfa so bie, yeɛ nnɛfa amumuyɛɛfoɛ atee so.

¹⁵ Twe wɔ nwo fi so, nnɛfa so bie, makye fi so, ná pɛ nu kɔ.

¹⁶ Ofikyɛ bɛ de bɛnna, sana bayɔ bɔne koraka, nnakorɔkorɔ tɔ bɛ so, sana bama ebie afi ase koraka.

¹⁷ Ofikyɛ bɔne yɔleɛ te be gye aleɛ, yeɛ basabasayɔlɛ te bɛ nzaa bɔ bɛno ɔ.

¹⁸ Nakoso teneneefoɛ de, b’atee te kyɛ ngyerɛmɔ yia bɔ wapukye ɔ, na ɔbɔ toonn kodwu eyia ketee.

¹⁹ Nakoso bɔnefoɛ de, b’atee te kyɛ awosii tunn, bennwu nikyee bɔ bɛfofo so ɔ.

²⁰ Mma, tie me dwirɛ, yɛ asoɛ tie edwirɛ bɔ mekã ne.

²¹ Nnɛmaa befi wɔ nye so, fa sie w’ahone nu dɔ paa.

²² Ofikyɛ ebiala bɔ onwu bɛ ne, bɛte ngoa ma ye, na ɔma ye aporɛ nu amukoraa sande ye.

²³ Adwene bɔ ɛkɔfa ne, dwene ye nwo yé paa, ofikyɛ nu yeɛ ngoa ofi ba ɔ.

²⁴ Nnɛfa wɔ noa kekã nnakannaka dwirɛ, twe wɔ nwo fi ngondombo dwirɛ kekanɛ nwo.

²⁵ Ma wɔ nye nea wɔ nyunu tee, ná ma wɔ ndo nwiaa ɔnea wɔ nyunu tee.

²⁶ Dwene nekaa bɔ ekotu wɔ gya kotia ɔ nwo, amaa ɔnate so w’atee amukoraa ayie wɔ yé.

²⁷ Nnɛmakye kɔ famaa anaa bɛen, twe wɔ gya fi bɔne nwo.